ភ្នំពេញៈ រាជរដ្ឋាភិបាលបានយល់ព្រមផ្ដល់ជាគោលការណ៍ជ្រើសរើសក្របខ័ណ្ឌថ្មីមន្ត្រីរាជការស៊ីវិល មន្ត្រីជាប់កិច្ចសន្យានិងគ្រូបង្រៀនប្រមាណជាង ២៤ ០០០ នាក់សម្រាប់ឆ្នាំ ២០១៩ ក្នុងនោះផ្ដល់បេក្ខភាពជាជនពិការដែលមានសមត្ថភាពសមរម្យ ២% និងបេក្ខនារីជាប់ជាស្ថាពរពី ២០%-៥០% នៃចំនួនក្របខ័ណ្ឌ។ យោងតាមសេចក្ដីជូនដំណឹង របស់ក្រសួងមុខងារសាធារណៈដែលភ្នំពេញប៉ុស្តិ៍ទទួលបាន។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានចុះហត្ថលេខាកាលពីថ្ងៃទី ៦ ខែ មីនា លើសេចក្ដីជូនដំណឹងដល់ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី គ្រប់ក្រសួងស្ថាប័នបានឲ្យដឹងថា៖ «រៀបចំជ្រើសរើសបេក្ខជនដែលមានលក្ខណសម្បត្តិគ្រប់គ្រាន់ឲ្យចូលបម្រើការងារ ដើម្បីបំពេញមុខតំណែងដែលទំនេរនិងសេចក្ដីត្រូវការដែលមានពិតប្រាកដនៅតាមអង្គភាពថ្នាក់ជាតិ ថ្នាក់ក្រោមជាតិ និងមន្ទីរអង្គភាពជំនាញរាជធានី ខេត្ត»។
លោក ពេជ្រ ប៊ុនធិន បានឲ្យដឹងថា ការជ្រើសរើសដោយការប្រឡងប្រជែងពីក្នុងចំណោមសិស្ស និស្សិតនិងមន្ត្រីរាជការស៊ីវិល ក្រសួង ស្ថាប័ន ត្រូវធ្វើការជ្រើសរើសចេញពីការប្រឡងប្រជែង និងត្រូវប្រកាសលទ្ធផលប្រឡងជាប់ស្ថាពរយ៉ាងយូរត្រឹមដំណាច់ខែកញ្ញា ឆ្នាំ ២០១៩ ព្រមទាំងចាត់ចែងរៀបចំបើកផ្ដល់បៀវត្សរ៍ដល់បេក្ខជនប្រឡងជាប់ឲ្យបានយ៉ាងយូរ ១ ខែក្រោយការទទួលស្គាល់លទ្ធផលពីក្រសួងមុខងារសាធារណៈ។
ការផ្ដល់ផែនការក្របខ័ណ្ឌជូនគ្រប់ក្រសួងស្ថាប័នសម្រាប់ឆ្នាំ ២០១៩ មានក្របខ័ណ្ឌមន្ត្រីរាជការស៊ីវិលចំនួន ៥ ៩៩៦ កន្លែង មន្ត្រីជាប់កិច្ចសន្យាចំនួន ១៨ ២៩២ នាក់ និងគ្រូបង្រៀនជាប់កិច្ចសន្យាចំនួន ៧ ៩៩៦ នាក់ គ្រូបង្រៀន ២ ថ្នាក់ ២ ពេលចំនួន ១២ ៨៩៧ នាក់ គ្រូបង្រៀនថ្នាក់គួប ២ ចំនួន ២ ៥៩៨ នាក់ គ្រូបង្រៀនថ្នាក់គួប ៣ ចំនួន ១២០ នាក់ គ្រូបង្រៀនជាប់កិច្ចសន្យាអប់រំក្រៅប្រព័ន្ធចំនួន ២ ៤៧២ នាក់ និងគ្រូបង្រៀនជាប់កិច្ចសន្យាខ្មែរអ៊ិស្លាមចំនួន ១៧៨ នាក់។
លោក ជុត មន្នី អនុរដ្ឋលេខាធិការនៃក្រសួងមុខងារសាធារណៈបានថ្លែងថា រាជរដ្ឋាភិបាលតែងតែប្រកាសជ្រើសរើសមន្រ្តីឆ្នើមប្រចាំឆ្នាំ ក្រោយពេលរដ្ឋាភិបាលអនុម័ត គឺត្រូវរើសដាក់តាមក្រសួង វាជាទម្លាប់ ជំនួសអ្នកចូលនិវត្តន៍។
លោកថ្លែងថា៖ «តាមគោលការណ៍របស់រាជរដ្ឋាភិបាល គឺបានកំណត់ហើយថា ចូលនិវត្តន៍ ៣ នាក់ នឹងត្រូវរើសចូលវិញតែម្នាក់ទេ កុំឲ្យមានការយល់ច្រឡំថា ម៉េចឃើញរើសមន្រ្តីអ្វីក៏ច្រើនម្ល៉េះអាហ្នឹងមិនមែនទេ គឺវាជាគោលការណ៍ ក្នុងមួយឆ្នាំ គឺត្រូវតែរើសម្ដង ព្រោះត្រូវធ្វើតាមនីតិវិធីរក្សាធនធានមនុស្ស គឺវាមានចេញ វាមានចូល តែប៉ុណ្ណឹងទេ»។
លោក ព្រាប កុល នាយកប្រត្តិបត្តិនៃអង្គការតម្លាភាពកម្ពុជា បានថ្លែងថា នៅកម្ពុជា គេឃើញមានមន្រ្តីច្រើនណាស់ទៅហើយ តែប្រសិទ្ធភាពការងារធ្វើមិនទាន់អស់ពីដៃជើង ឬសមត្ថកិច្ចគាត់ទេ មានន័យថា គាត់ធ្វើការងាររដ្ឋផង និងមានមុខរបរក្រៅផង។ ប្រសិនបើរដ្ឋតម្រូវឲ្យគាត់ធ្វើការពេញដៃពេញជើង ពេញម៉ោង អស់ពីសមត្ថភាព គ្រប់ពេល គ្រប់ម៉ោង និងត្រួតពិនិត្យត្រឹមត្រូវនោះ គឺប្រហែលជាមិនត្រូវការមន្រ្តីច្រើនបែបនេះទេ។
លោក ព្រាប កុល ថ្លែងថា៖ «ខ្ញុំយល់ឃើញថា បើវាមានតម្រូវការចាំបាច់ និងមានការកង្វះមន្រ្តី ដើម្បីបំពេញតួនាទីវានឹងមិនមានទាស់ខុសអ្វីទេ ប៉ុន្ដែខ្ញុំដូចជាមិនទាន់ឃើញមានព័ត៌មានដែលបង្ហាញថា យើងមានការងារថ្មីបន្ថែម ឬមានតម្រូវការចាំបាច់បន្ថែមទេ យើងអត់ទាន់ដឹងព័ត៌មានទេ គឺថាតើគេដាក់នៅក្នុងតួនាទីអ្វី»។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថាមន្ត្រីទាំង ២ ប្រភេទគួរត្រូវបានឲ្យចុះមូលដ្ឋានជាជាងនៅតែថ្នាក់ជាតិ ព្រោះប្រជាពលរដ្ឋត្រូវការការអភិវឌ្ឍ ជាពិសេសតំបន់ដាច់ស្រយាល។
លោកសន ជ័យ ថ្លែងថា៖ «ខ្ញុំបានសង្កេតឃើញថានៅថ្នាក់ក្រោមមិនមានមន្ត្រីគ្រប់គ្រាន់សម្រាប់ការងារអភិវឌ្ឍន៍ទេ ទោះយ៉ាងណាក៏ដោយការបង្កើនការបែងចែកធនធានហិរញ្ញវត្ថុទៅរដ្ឋបាលថ្នាក់ក្រោមជាតិ ជាពិសេសតម្រូវការឃុំ-សង្កាត់»។
យោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ ដែលបានអនុម័តដោយរដ្ឋសភាកាលពីចុងឆ្នាំ ២០១៨ បានឲ្យដឹងថា រាជរដ្ឋាភិបាលកម្ពុជាកាលពីថ្ងៃទី ២៦ តុលាកន្លងទៅ បានគ្រោងចំណាយថវិកាជាតិដល់ទៅជាង ២៧ លានលានរៀល គឺប្រមាណជា ៦.៧ ពាន់លានដុល្លារអាមេរិក សម្រាប់ឆ្នាំ ២០១៩។
ជាការកត់សម្គាល់ថវិកាសម្រាប់ចាយវាយឆ្នាំ ២០១៩ បានកើនឡើងចំនួន ១១,៤% បើប្រៀបធៀបនឹងច្បាប់ឆ្នាំ ២០១៨ ដែលមានថវិកាសរុបជាង ២៤ លានលានរៀល (២៤ ៣៧៥ ១០២ លានរៀល) ឬប្រហែល ៦០៣៣ លានដុល្លារ៕