អភិបាលរាជធានីភ្នំពេញ នាំយកអំណោយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់បងប្អូនប្រជាពលរដ្ឋដែលរស់នៅក្នុងតំបន់បិទខ្ទប់ និងមានជីវភាពខ្វះខាតចំនួន ៨១៧ គ្រួសារមកពីសង្កាត់ផ្សារចាស់ សង្កាត់វត្តភ្នំ និងសង្កាត់ផ្សារថ្មីទី២ នៃខណ្ឌដូនពេញកាលពីថ្ងៃទី២៤ ខែមេសា ឆ្នាំ២០២១។រូបថត រដ្ឋបាលរាជធានីភ្នំពេញ
ភ្នំពេញៈ រាជរដ្ឋាភិបាលកម្ពុជាតាមរយៈក្រសួងសង្គមកិច្ចអតីតយុទ្ធជន និងយុវនីតិសម្បទា កំពុងបន្តកម្មវិធីឧបត្ថម្ភសាច់ប្រាក់ជូនជនក្រីក្រ និងងាយរងគ្រោះដោយវិបត្តិកូវីដ១៩ នៅជុំទី ៤ លើកទី ៣ និងបន្តដល់ជុំទី ៥ រហូតដល់ខែឧសភាឆ្នាំ ២០២១ បន្ទាប់ពីបានចំណាយថវិការដ្ឋអស់ជាង ២៩១ លានដុល្លារ ជួយពលរដ្ឋជាង ៦៩ ម៉ឺនគ្រួសារ។
សេចក្តីជូនដំណឹងរបស់ក្រសួងសង្គមកិច្ចចុះថ្ងៃទី ២៤ មេសា នេះបានឱ្យដឹងថា ចាប់ពីថ្ងៃទី ២៥ ខែមិថុនា ឆ្នាំ ២០២០ ដល់ថ្ងៃទី ២៤ ខែ មេសា ២០២១ រាជរដ្ឋាភិបាលបានចំណាយថវិការដ្ឋចំនួន ២៩១, ៩៨ លាន ដុល្លារជួយដល់ជនក្រីក្រ និងងាយរងគ្រោះដោយវិបត្តិជំងឺកូវីដ១៩។
បើគិតមកទល់បច្ចុប្បន្ន រដ្ឋាភិបាលបានដំណើរការឧបត្ថម្ភសាច់ប្រាក់ក្នុងកម្មវិធីនេះឈានដល់ជុំទី ៤ លើកទី ៣ ហើយ បន្ទាប់ពីជុំទី ១ និងជុំទី ២ ធ្វើឡើង ២ លើក ជុំទី ៣ និងទី ៤ ធ្វើឡើង ៣ លើក និងជុំទី ៥ ផងដែរ។
សេចក្តីជូនដំណឹងបន្តថា ដោយគិតមកទល់ត្រឹមថ្ងៃទី ២៤ មេសា ឆ្នាំ ២០២១ ក្នុងជុំទី ៤ លើកទី ៣ ក្រសួងសង្គមកិច្ចបានឧបត្ថម្ភសាច់ប្រាក់ជូនជនក្រីក្រសរុប ២ ៧៤៨ ៦៣៩ នាក់នៃចំនួន ៦៩៣ ៣៣៣ គ្រួសារ។
ដោយឡែកសម្រាប់ការបើកប្រាក់ឧបត្ថម្ភជុំទី ៥ លើកទី ១ នឹងចាប់ផ្តើមពីថ្ងៃទី ២៥ មេសា ឆ្នាំ ២០២១ រហូតដល់ថ្ងៃទី ២៤ ឧសភា ឆ្នាំ ២០២១ ដែលមានរយៈពេល ៣០ ថ្ងៃ។
លោក ឈួ សុបញ្ញា ប្រធាននាយកដ្ឋានសុខុមាលភាពសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទាធ្លាប់បានប្រាប់ភ្នំពេញប៉ុស្តិ៍ថា ដោយសារវិបត្តិកូវីដនៅបន្តអូសបន្លាយនៅកម្ពុជា ទើបរាជរដ្ឋាភិបាលបន្តការបើកប្រាក់ឧបត្ថម្ភដល់គ្រួសារជនក្រីក្រជាបន្តបន្ទាប់។
លោក ឈួ សុបញ្ញា បានឱ្យដឹងថា សម្រាប់ការឧបត្ថម្ភដល់ជនក្រីក្រត្រូវបានចែកចេញជា ៣ ប្រភេទ គឺជនក្រីក្រនៅទីប្រជុំជនក្នុងរាជធានីភ្នំពេញ ជនក្រីក្រទីប្រជុំជនក្រៅរាជធានីភ្នំពេញ និងជនក្រីក្រនៅជនបទ។ គ្រួសារនីមួយៗនឹងទទួលបានសាច់ប្រាក់ទៅតាមទំហំគ្រួសារ។
លោកបានបញ្ជាក់ថា ជាមធ្យមក្នុង ១ គ្រួសារនឹងទទួលបានប្រាក់ ២០ ម៉ឺនរៀល សម្រាប់ជនក្រីក្រនៅតាមជនបទ និង ៨០ ដុល្លារ សម្រាប់ជនក្រីក្រនៅទីប្រជុំជនភ្នំពេញ។
លោកថា៖ «ជាមធ្យមនៅជនបទទទួលបាន ២០ ម៉ឺនរៀលក្នុង ១ ខែសម្រាប់ ១ គ្រួសារ។ ចំណែកអ្នកនៅទីក្រុងជាមធ្យម ៨០ ទៅ ១០០ ដុល្លារ។ ការដែលផ្តល់នេះមិនមែនសុខៗយើងឱ្យសាច់ប្រាក់ខុសគ្នាទេ ផ្តល់នេះផ្អែកលើមូលដ្ឋាននៃការសិក្សាលើប្រាក់ចំណូល។ ការសិក្សានេះមានការចូលរួមពី (ធនាគារពិភពលោក) និង (ធនាគារអភិវឌ្ឍន៍អាស៊ី)»។
បើតាមក្រសួងសង្គមកិច្ច ចំពោះគ្រួសារដែលបានផ្ទៀងផ្ទាត់ទាំង ៤ ជុំរួចហើយ សូមទៅបើកប្រាក់នៅតាមបញ្ជរវីងណាមួយដោយមិនតម្រូវឱ្យមកសាលាឃុំ សង្កាត់ជាថ្មីទេ។
ប៉ុន្តែចំពោះគ្រួសារមានបណ្ណសមធម៌មានសុពលភាព ហើយមិនទាន់បានផ្ទៀងផ្ទាត់ក្នុងជុំទី ៤ និងគ្រួសារក្រីក្រដែលទើបបានបណ្ណថ្មី សូមទៅផ្ទៀងផ្ទាត់នៅតាមឃុំ សង្កាត់ដើម្បីទទួលបានការឧបត្ថម្ភសាច់ប្រាក់ក្នុងជុំទី ៥៕
.jpg)
