ភ្នំពេញៈ មូលនិធិក្រុមប្រឹក្សាអាជ្ញាកណ្ដាលចាប់ពីឆ្នាំ ២០០៣-២០១៩ បានទទួលសំណុំរឿងលើវិវាទការងារចំនួន ២ ៨៨២ ករណី ដែលមានកម្មករនិយោជិតពាក់ព័ន្ធចំនួនជាង ១ លាននាក់ មកពីវិស័យកាត់ដេរ និងវិស័យផ្សេងៗទូទាំងប្រទេសដែលក្នុងចំណោមសំណុំរឿងវិវាទទាំងនេះ ក្រុមប្រឹក្សាអាជ្ញាកណ្ដាលបានដោះស្រាយជោគជ័យ ៧៥ ភាគរយ។ នេះបើតាមមន្ត្រីក្រុមប្រឹក្សាអាជ្ញាកណ្តាល។
ថ្លែងក្នុងពិធីចុះកិច្ចព្រមព្រៀងស្ដីពីការផ្ដល់ជំនួយពីស្ថានទូតស៊ុយអែត និងទីភ្នាក់ងារសម្រាប់ការអភិវឌ្ឍអន្តរជាតិសហរដ្ឋអាមេរិកគាំទ្រដល់មូលនិធិក្រុមប្រឹក្សាអាជ្ញាកណ្ដាល ដើម្បីពង្រឹងសេវាដោះស្រាយវិវាទការងារនៅកម្ពុជាកាលពីថ្ងៃទី ២៧ ខែកុម្ភៈ លោក ម៉ែន និម្មិត នាយកប្រតិបត្ដិមូលនិធិក្រុមប្រឹក្សាអាជ្ញាកណ្ដាលបញ្ជាក់ថា ក្រុមប្រឹក្សាអាជ្ញាកណ្ដាលដើរតួនាទីយ៉ាងសំខាន់ និងសម្រេចបានសមិទ្ធផលគួរឲ្យកត់សម្គាល់ជាច្រើន។ ក្រុមប្រឹក្សាអាជ្ញាកណ្តាល រួមចំណែកជួយដល់ផ្នែកសង្គមកិច្ច និងសេដ្ឋកិច្ចជាតិ។ ព្រមទាំងទទួលបានកេរ្តិ៍ឈ្មោះ និងការទទួលស្គាល់ថ្នាក់ជាតិ និងអន្តរជាតិក្នុងការដោះស្រាយវិវាទការងារនាពេលកន្លងមក។
លោក ម៉ែន និម្មិត ថ្លែងថា៖ «មកទល់នឹងឆ្នាំ ២០១៩ មូលនិធិក្រុមប្រឹក្សាអាជ្ញាកណ្តាលបានទទួលសំណុំរឿងចុះបញ្ជីចំនួន ២ ៨៨២ ករណី ដែលមានកម្មករនិយោជិតពាក់ព័ន្ធចំនួនជាង ១ លាននាក់ មកពីវិស័យកាត់ដេរ និងវិស័យផ្សេងៗនៅទូទាំងប្រទេសកម្ពុជា។ ក្នុងចំណោមសំណុំរឿងដែលបានចុះបញ្ជីទាំងអស់នេះក្រុមប្រឹក្សាអាជ្ញាកណ្ដាលសម្រេចបាននូវអត្រាជោគជ័យក្នុងការដោះស្រាយវិវាទចំនួន ៧៥ ភាគរយ»។
លោកសម្ដែងនូវអំណរគុណចំពោះម្ចាស់ជំនួយសប្បុរសនានាដូចជាទីភ្នាក់ងារសម្រាប់ការអភិវឌ្ឍអន្តរជាតិសហរដ្ឋអាមេរិក និងប្រទេសស៊ុយអែតដែលបានគាំទ្រអស់រយៈពេលជាច្រើនឆ្នាំកន្លងមក។ ទីភ្នាក់ងារសម្រាប់ការអភិវឌ្ឍអន្តរជាតិសហរដ្ឋអាមេរិកបានគាំទ្រដល់មូលនិធិក្រុមប្រឹក្សាអាជ្ញាកណ្ដាល តាំងពីឆ្នាំ ២០១៤ មកបានបន្ដចុះកិច្ចព្រមព្រៀងផ្ដល់ជំនួយឥតសំណងបន្ថែមពីម្សិលមិញក្នុងរយៈពេល ៥ ឆ្នាំទៅមុខទៀត ក្នុងទឹកប្រាក់ចំនួន ១ លាន ៥ សែនដុល្លារអាមេរិក។ ចំណែកស្ថានទូតស៊ុយអែតបានបន្ដផ្ដល់ជំនួយសរុបចំនួនប្រមាណ ៥ សែន ៣ ម៉ឺនដុល្លារអាមេរិក។
សេចក្ដីប្រកាសព័ត៌មានស្ដីពីការផ្ដល់ជំនួយទាំង ២ នេះពីម្សិលមិញបញ្ជាក់ថា ការបន្ដផ្ដល់មូលនិធិទាំង ២ នេះមានគោលបំណងដូចគ្នា គឺដើម្បីធ្វើឲ្យប្រព័ន្ធទំនាក់ទំនងការងារ និងសេវាដោះស្រាយវិវាទការងារក្នុងប្រទេសកម្ពុជាកាន់តែមានប្រសិទ្ធភាព។ បង្កើនការយល់ដឹងពីក្រុមប្រឹក្សាអាជ្ញាកណ្ដាល និងលើកកម្ពស់ជំនាញក្នុងការដោះស្រាយវិវាទការងារដល់កម្មករនិយោជិត និងនិយោជក និងដើម្បីរក្សាការលើកកម្ពស់សុចរិតភាព និងនិរន្តរភាពរបស់ស្ថាប័នក្រុមប្រឹក្សាអាជ្ញាកណ្ដាល។
សេចក្ដីប្រកាសព័ត៌មាននេះឲ្យដឹងថា មូលនិធិក្រុមប្រឹក្សាអាជ្ញាកណ្ដាលត្រូវបានបង្កើតឡើងនៅឆ្នាំ ២០០៥ គឺជាអង្គការមិនមែនរដ្ឋាភិបាលក្នុងស្រុកដែលផ្ដល់ការគាំទ្រផ្នែកបច្ចេកទេស និងគ្រប់គ្រងទៅដល់ក្រុមប្រឹក្សាអាជ្ញាកណ្ដាល។ ក្រុមប្រឹក្សាអាជ្ញាកណ្ដាលជាស្ថាប័នជាតិឯករាជ្យមួយមានអំណាចដោះស្រាយ វិវាទការងាររួមនៅកម្ពុជាតាមច្បាប់ការងារ។ ក្រុមប្រឹក្សាអាជ្ញាកណ្តាលត្រូវបានទទួលស្គាល់ថា ជាស្ថាប័នចម្បងជាសារវន្តមួយសម្រាប់ការដោះស្រាយវិវាទការងារនៅកម្ពុជាដើម្បីជួយឲ្យមានស្ថិរភាពទីផ្សារការងារ និងរួមចំណែកក្នុងការអភិវឌ្ឍសង្គម និងសេដ្ឋកិច្ចជាតិ។
លោក Samuel Hurtig ប្រធានផ្នែកកិច្ចសហប្រតិបត្ដិការអភិវឌ្ឍន៍អន្តរជាតិរបស់ស្ថានទូតស៊ុយអែតប្រចាំកម្ពុជាថ្លែងថា ទីផ្សារការងារនៅគ្រប់ប្រទេសទាំងអស់កំពុងតែរីកលូតលាស់ទៅមុខហើយត្រូវការសម្របទៅតាមការប្រែប្រួល។ អ្នកផលិតទាំងឡាយត្រូវតែបង្កើនគុណភាព ទំនិញនិងរក្សាផលចំណេញដោយថ្លឹងថ្លែងជាមួយនឹងតម្រូវការសិទ្ធិការងារមានជាអាទិ៍ស្ដង់ដាការងារ សមរម្យ និងប្រាក់ឈ្នួលដោយយុត្ដិធម៌ សមភាពយេនឌ័រក៏ដូចជាបញ្ហាបរិស្ថានដែលប៉ះពាល់ដល់ផលិតកម្ម និងលក្ខខណ្ឌការងារនានា។
លោកថ្លែងថា៖ «តួនាទីរបស់រដ្ឋាភិបាលគឺបង្កើតគោលនយោបាយដែលធ្វើឲ្យមានការអភិវឌ្ឍទីផ្សារការងារយោងតាមច្បាប់ និងបទដ្ឋានគតិយុត្ដនានា។ សហជីពគឺជាតួអង្គសំខាន់ដើម្បីតំណាងឲ្យសិទ្ធិកម្មករ និងគួរត្រូវបានការពារដោយច្បាប់។ យន្តការដោះស្រាយវិវាទការងារដែលអាចជឿជាក់បាន និងឯករាជ្យ គឺជាធាតុផ្សំចាំបាច់សម្រាប់ទីផ្សារការងារដែលដំណើរការប្រកបដោយប្រសិទ្ធភាព»។
លោកបន្តថា៖ «តួនាទីរបស់មូលនិធិក្រុមប្រឹក្សាអាជ្ញាកណ្ដាលក្នុងការដោះស្រាយវិវាទនៅក្នុងទីផ្សារការងារគឺមានសារៈសំខាន់ណាស់។ ស្ថានទូតស៊ុយអែតនឹងបន្តគាំទ្រមូលនិធិក្រុមប្រឹក្សាអាជ្ញាកណ្ដាលដើម្បីធានាថាក្រុមប្រឹក្សាអាជ្ញាកណ្ដាលនឹងបន្តដើរតួនាទីរបស់ខ្លួនដោយឯករាជ្យ និងប្រកបដោយវិជ្ជាជីវៈ»។
លោក Javier Castano ប្រធានស្ដីទីនៃទីភ្នាក់ងារសម្រាប់ការអភិវឌ្ឍអន្តរជាតិសហរដ្ឋអាមេរិកថ្លែងថា វាគឺជារឿងសំខាន់ដែលត្រូវថែរក្សាប្រព័ន្ធដោះស្រាយវិវាទការងាររួមដែលមានអំណាចកាត់សេចក្ដី និងដោះស្រាយដោយសន្តិវិធី ដោយស្ថាប័នខាងកម្មករនិយោជិត និងនិយោជកទទួលស្គាល់ថាមានអព្យាក្រឹតភាព មិនលម្អៀង។
លោកបន្តថា៖ «នេះគឺជាមូលហេតុដែលយើងជ្រើសរើសគាំទ្រដល់តួនាទីស្នូលសំខាន់របស់ក្រុមប្រឹក្សាអាជ្ញាកណ្ដាលក្នុងការបង្កើតនូវបរិយាកាសប្រកបដោយការជឿជាក់សម្រាប់កម្មករនិយោជិត និយោជក និងអ្នកវិនិយោគនានាជាប្រព័ន្ធដោះស្រាយវិវាទដែលមានការចូលរួមពីគ្រប់ភាគីពាក់ព័ន្ធ»។
លោកស្រី សុវណ្ណ វណ្ណារតន៍ អនុរដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈសាទរចំពោះការចុះកិច្ចព្រមព្រៀងបន្តផ្ដល់ជំនួយទាំង ២ ដល់មូលនិធិក្រុមប្រឹក្សាអាជ្ញាកណ្ដាលនេះ។ លោកស្រីគាំទ្រការលើកឡើងរបស់ប្រធានស្ដីទីនៃទីភ្នាក់ងារសម្រាប់ការអភិវឌ្ឍន៍អន្តរជាតិសហរដ្ឋអាមេរិក និងប្រធានផ្នែកកិច្ចសហប្រតិបត្ដិការអភិវឌ្ឍន៍អន្តរជាតិរបស់ស្ថានទូតស៊ុយអែតប្រចាំកម្ពុជា។
លោកស្រីបានថ្លែងថា ការបន្ដគាំទ្រផ្ដល់ជំនួយហិរញ្ញវត្ថុរបស់ភាគីទាំង ២ នេះលើយន្តការរបស់មូលនិធិក្រុមប្រឹក្សាអាជ្ញាកណ្តាលឲ្យដំណើរការទៅមុខបានទៀត គឺជាចំណុចសំខាន់ក្នុងការសម្រេចបាននូវការបន្តធានាបានលើយន្តការនៃការដោះស្រាយវិវាទការងាររួមរបស់ក្រុមប្រឹក្សាអាជ្ញាកណ្ដាលឲ្យកាន់តែរឹងមាំនឹងធានាបាននូវនិរន្តរភាព។
លោកស្រីបានបញ្ជាក់ថា៖ «រឹតតែសំខាន់គឺយើងអាចបន្តដំណើរទៅមុខទៀតក្នុងការជំរុញវិសាលភាពរបស់ក្រុមប្រឹក្សាអាជ្ញាកណ្ដាលក្នុងការដោះស្រាយវិវាទការងារ និងវិវាទការងារបុគ្គលក្នុងវិស័យការងារ»។
លោក ប៉ាវ ស៊ីណា ប្រធានសហជីពចលនាកម្មករកម្ពុជាដែលបានចូលរួមក្នុងពិធីចុះកិច្ចព្រមព្រៀងផ្ដល់ជំនួយនេះដែរពីម្សិលមិញបានថ្លែង៖ «អ្វីដែលសំខាន់ក្នុងនាមយើងជាភាគីកម្មករ យើងមើលឃើញថា ស្ថាប័នក្រុមប្រឹក្សាអាជ្ញាកណ្ដាលពិតជាមានផលប្រយោជន៍ខ្លាំងមែនទែនទៅដល់បងប្អូនកម្មករដោយបានជួយពួកគាត់លើការប្រឹក្សាផ្នែកច្បាប់ និងដំណើរការនៃការដោះស្រាយវិវាទ។ ប៉ុន្ដែអ្វីដែលសំខាន់យើងចង់ឃើញស្ថាប័ននេះអនុវត្ដការងារមានប្រសិទ្ធភាពខ្លាំងជាងនេះតាមរយៈសេចក្ដីបង្គាប់របស់ខ្លួន»។
លោក ស៊ីណា បានបញ្ជាក់ថា៖ «គឺយើងចង់ឲ្យសេចក្ដីបង្គាប់ដែលក្រុមប្រឹក្សាអាជ្ញាកណ្ដាលបានធ្វើនោះមានប្រសិទ្ធភាពដល់គូភាគីយកទៅអនុវត្ដតែម្ដងមិនមែនយកសេចក្ដីបង្គាប់នេះទុកគ្រាន់តែជាក្រដាសមួយ ឬគ្រាន់តែបង្ហាញអំពីដំណើរការនៃការឈ្នះ និងចាញ់ក្នុងវិវាទការងារណាមួយនោះទេ»៕