រូបសំណាកហៅ តាខ្មៅ នៅក្រុងតាខ្មៅ ដែលត្រូវបានកែសម្រួលព្រំប្រទល់រដ្ឋបាល។ ផា លីណា
ភ្នំពេញ: រាជរដ្ឋាភិបាលបានសម្រេចកែសម្រួលព្រំប្រទល់រដ្ឋបាលខេត្ត និងបង្កើតស្រុក/ខណ្ឌ និងក្រុងមួយចំនួននៅក្នុងខេត្តកណ្ដាល កំពង់ធំ ពោធិ៍សាត់ ស្ទឹងត្រែងនិងភ្នំពេញ ដើម្បីងាយស្រួលគ្រប់គ្រងផ្នែករដ្ឋបាល និងដាក់ទីតាំងបម្រើសេវាសាធារណៈឲ្យកៀកនឹងប្រជាពលរដ្ឋ ប៉ុន្ដែសង្គមស៊ីវិលមើលឃើញថា វាជាការចំណាយថវិកាជាតិខ្ជះខ្ជាយ។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានថ្លែងកាលពីម្សិលមិញថាសេចក្ដីសម្រេចរបស់រាជរដ្ឋាភិបាល គឺជាការប្ដេជ្ញាចិត្តដើម្បីធ្វើកំណែទម្រង់ផ្នែករដ្ឋបាលថ្នាក់ក្រោមជាតិក្នុងការពង្រឹង និងពង្រីកសេវាសាធារណៈឲ្យទៅកៀកនឹងប្រជាពលរដ្ឋ។
លោក ស៊ីផាន ថ្លែងថា៖ «ដោយសារមើលឃើញការលំបាកក្នុងការទទួលសេវាសាធារណៈរបស់ប្រជាពលរដ្ឋ ទើបរដ្ឋាភិបាលត្រូវសម្រេចបែបនេះ»។
ទោះជាយ៉ាងណាក៏ដោយលោកអះអាងថា ចំពោះមតិរិះគន់ទាំងឡាយ គឺសិទ្ធិរបស់ពលរដ្ឋ ប៉ុន្ដែពួកគេនៅមិនទាន់យល់ច្បាស់ការងាររដ្ឋបាល និងមិនដឹងច្បាស់ពីការលំបាករបស់ប្រជាពលរដ្ឋ។
លោកថ្លែងថា៖ «ការទិតៀនហ្នឹង គ្រាន់តែជាការបញ្ចេញមតិរបស់គេទេ វាគ្មានប្រយោជន៍អ្វីសម្រាប់ជាតិទេ។ គេថាបង្កើតហ្នឹងអស់លុយរដ្ឋ ចុះរដ្ឋហ្នឹងក្រែងអ្នកបម្រើរាស្ត្រហ្អី បើរដ្ឋរកការងារឲ្យរាស្ត្រធ្វើ តើមានអ្វីខុស? អ៊ីចឹងគេថា ក៏ចេះតែថាទៅ»។
យ៉ាងហោចណាស់មានអនុក្រឹត្យចំនួន ៥ ដែលបានចុះហត្ថលេខានៅថ្ងៃទី ៨ ខែមករានេះ ដោយលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
យោងតាមអនុក្រឹត្យទាំងនោះបានឲ្យដឹងថារាជរដ្ឋាភិបាលបានបង្កើតថ្មីនូវក្រុងកោះរ៉ុងនៃខេត្តព្រះសីហនុ ដោយកាត់យកសង្កាត់ចំនួន ២ ពីក្រុងព្រះសីហនុនៃខេត្តព្រះសីហនុ គឺសង្កាត់កោះរ៉ុង និងសង្កាត់កោះរ៉ុងសន្លឹម មកធ្វើការបង្កើតក្រុងកោះរ៉ុង នៃខេត្តព្រះសីហនុវិញ ដែលទីតាំងសាលាក្រុងកោះរ៉ុង ត្រូវស្ថិតនៅក្នុងសង្កាត់កោះរ៉ុងសន្លឹម និងមានការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលក្រុងកោះរ៉ុង ទៅតាមអនុលោមច្បាប់ផងដែរ។
-ត្រូវបានបង្កើត «ស្រុកបុរីអូរស្វាយសែនជ័យ» នៃខេត្តស្ទឹងត្រែង ដោយកាត់យកឃុំចំនួន ៣ គឺឃុំអូរស្វាយ ឃុំកោះស្នែង និងឃុំព្រះរំកិលពីស្រុកថាឡាបរីវ៉ាត់។ ត្រូវបានកែសម្រួលព្រំប្រទល់រដ្ឋបាលឃុំអូរស្វាយ ដោយកាត់យកផ្ទៃដីមួយផ្នែកពីសង្កាត់សាមគ្គី នៃក្រុងស្ទឹងត្រែង ផ្ទៃដីមួយផ្នែកពីឃុំស្ដៅ នៃស្រុកសេសាន និងកាត់យកភូមិចំនួន ១ គឺភូមិណាអូង ពីឃុំស្រែសំបូរនៃស្រុកសៀមប៉ាង មកឲ្យឃុំអូរស្វាយ នៃស្រុកបុរីស្វាយសែនជ័យ។ ចំណែកទីតាំងសាលាស្រុក នឹងត្រូវសាងសង់នៅឃុំអូរស្វាយ។
-ត្រូវបានបង្កើត «ស្រុកតាលោសែនជ័យ» ដោយកាត់យកឃុំចំនួន ២ គឺឃុំតាលោ នៃស្រុកបាកាន និងឃុំផ្ទះរុង នៃស្រុកភ្នំក្រវាញ នៃខេត្តពោធិ៍សាត់។ ត្រូវបានកាត់ភូមិចំនួន ២ គឺភូមិកោះស្វាយ និងភូមិកោះវត្ត ពីឃុំខ្នារទទឹងនៃស្រុកបាកានមកឲ្យឃុំតាលោ នៃស្រុកតាលោសែនជ័យ។ ព្រំប្រទល់រដ្ឋបាលស្រុកតាលោ សែនជ័យ ត្រូវបានកំណត់ដូចមានក្នុងផែនទីជាឧបសម្ព័ន្ធនៃអនុក្រឹត្យនេះ។ ចំណែកទីតាំងសាលាស្រុកតាលោសែនជ័យ ត្រូវស្ថិតនៅក្នុងឃុំផ្ទះរុង។
-ត្រូវបង្កើត «ស្រុកតាំងគោក» នៃខេត្តកំពង់ធំ ដោយកាត់យកឃុំចំនួន ៨ ពីស្រុកបារាយណ៍រួមមាន ឃុំពង្រ ឃុំច្រនាង ឃុំជ្រលង ឃុំទ្រៀល ឃុំសូយោង ឃុំស្រឡៅ ឃុំស្វាយភ្លើង និងឃុំអណ្តូងពោធិ៍។ ព្រំប្រទល់រដ្ឋបាល ស្រុកតាំងគោក ត្រូវបានកំណត់ដូចមានក្នុងផែនទីជាឧបសម្ព័ន្ធនៃអនុក្រឹត្យនេះ។ ទីតាំងសាលាស្រុកតាំងគោក នឹងត្រូវបានជ្រើសយកឃុំសូយោង ធ្វើជាទីតាំងសាលាស្រុក។
-ត្រូវបានបង្កើតខណ្ឌបឹងកេងកង នៃរាជធានីភ្នំពេញ ដោយកាត់យកសង្កាត់ចំនួន ៧ ពីខណ្ឌចំការមន គឺសង្កាត់បឹងកេងកងទី ១ សង្កាត់បឹងកេងកងទី ២ សង្កាត់បឹងកេងកងទី ៣ សង្កាត់អូឡាំពិក សង្កាត់ទំនប់ទឹក សង្កាត់ទួលស្វាយព្រៃទី ១ និងសង្កាត់ទួលស្វាយព្រៃទី ២។ ត្រូវបានផ្ទេរទីតាំងសាលាខណ្ឌចំការមនដែលស្ថិតក្នុងសង្កាត់បឹងកេងកងទី ៣ ទៅឲ្យសាលាខណ្ឌបឹងកេងកងវិញ។ ចំណែកទីតាំងសាលាខណ្ឌចំការមន ត្រូវស្ថិតនៅក្នុងសង្កាត់ទន្លេបាសាក់វិញ។
ត្រូវបានបង្កើតខណ្ឌកំបូលនៃរាជធានីភ្នំពេញ ដោយកាត់យកសង្កាត់ចំនួន ០៦ ពីខណ្ឌពោធិ៍សែនជ័យ គឺសង្កាត់កំបូល សង្កាត់កន្ទោក សង្កាត់ឱឡោក សង្កាត់ស្នោរ សង្កាត់ភ្លើងឆេះរទេះ សង្កាត់បឹងធំ និងកាត់យកសង្កាត់ចំនួន ០១ ពីខណ្ឌដង្កោ គឺសង្កាត់ប្រទះឡាង។ ដូច្នេះ ខណ្ឌកំបូល មានចំនួន ០៧ សង្កាត់ គឺសង្កាត់កំបូល សង្កាត់កន្ទោក សង្កាត់ឱឡោក សង្កាត់ស្នោរ សង្កាត់ភ្លើងឆេះរទេះ សង្កាត់បឹងធំ និងសង្កាត់ប្រទះឡាង។
ចំណែកទីតាំងសាលាខណ្ឌ នឹងត្រូវបានប្រកាសដោយក្រសួងមហាផ្ទៃ។ ជាមួយគ្នានេះដែរ អនុក្រឹត្យខ្លះបានសម្រេចកែសម្រួលព្រំប្រទល់រដ្ឋបាលរវាងក្រុងតាខ្មៅ ជាមួយស្រុកស្អាង និងស្រុកកណ្តាលស្ទឹង ខេត្តកណ្តាល ដោយកាត់យកឃុំចំនួន ៤ ពីស្រុកស្អាង គឺឃុំស្វាយរលំ ឃុំកោះអន្លង់ចិន ឃុំសិត្បូ ឃុំរកាខ្ពស់ និងដីមួយផ្នែកនៃស្រុកកណ្តាលស្ទឹង មកឲ្យក្រុងតាខ្មៅដែរ។ អនុក្រឹត្យនោះឲ្យដឹងទៀតថា ត្រូវប្តូរឃុំទាំង ៤ ចំណុះឲ្យក្រុងតាខ្មៅ ខេត្តកណ្តាល ទៅជាសង្កាត់ មានដូចខាងក្រោម៖ ទី១-ឃុំស្វាយរលំ ទៅជាសង្កាត់ស្វាយរលំ, ទី ២-ឃុំកោះអន្លង់ចិន ទៅជាសង្កាត់កោះអន្លង់ចិន, ទី៣-ឃុំសិត្បូ ទៅជាសង្កាត់សិត្បូ, និងទី ៤-ឃុំរកាខ្ពស់ ទៅជាសង្កាត់រកាខ្ពស់។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងកាលពីម្សិលមិញថា មិនចាំបាច់ទៅបំបែកឬបង្កើតស្រុកទេ ដោយគ្រាន់តែពង្រឹងភាពជាអ្នកដឹកនាំរបស់មន្ត្រី និងជំរុញមន្ត្រីធ្វើការឲ្យសកម្មជាមួយពលរដ្ឋជាការស្រេច។
លោក ជ័យ ថ្លែងថា៖ «បើយើងចង់ឲ្យការគ្រប់គ្រងមានប្រសិទ្ធភាព គឺយើងត្រូវពង្រឹងសមត្ថភាពមន្ត្រីពាក់ព័ន្ធហើយបែងចែកថវិកាតាមតម្រូវការរដ្ឋបាលស្រុក (នីមួយៗ)៕
.jpg)
