.jpg)
សំណង់ដែលរំលោភលើដីផ្លូវត្រូវបានរុះរើ ដោយមានការស្ម័គ្រចិត្តពីម្ចាស់សំណង់ក្នុងកិច្ចសហការ។ រូបថត រដ្ឋបាលខេត្តសៀមរាប
ក្រោយពីទទួលបានកាសហការពីប្រជាពលរដ្ឋរយៈពេលជាង ១០ ថ្ងៃកន្លងមកនេះ រដ្ឋបាលខេត្ដសៀមរាបបានរុះរើសំណង់នានាដែលសង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងបានជិត ១០០% ហើយ ក្នុងចំណោមសំណង់ប៉ះពាល់សរុបជាង២ពាន់កន្លែងនៃគម្រោងការស្ថាបនាផ្លូវទាំង ៣៨ ក្នុងក្រុងនេះ ដោយមិនមានការតវ៉ាពីប្រជាពលរដ្ឋឡើយ។
លោក លី សំរិទ្ធ អភិបាលរង និងជាអ្នកនាំពាក្យរដ្ឋបាលខេត្តសៀមរាបប្រាប់ ភ្នំពេញ ប៉ុស្ដិ៍ នៅថ្ងៃនេះថា បន្ទាប់ពីរដ្ឋបាលខេត្ដកំណត់រយៈពេល ១០ ថ្ងៃ គិតចាប់ពីថ្ងៃទី ២៣ កញ្ញា ដល់ថ្ងៃទី ២ តុលា ប្រជាពលរដ្ឋដែលមានសំណង់ សង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងក្នុងក្រុងសៀមរាបបានសហការជាមួយក្រុមការងាររបស់រដ្ឋបាលខេត្ដ រុះរើសំណង់ចេញបានជិត ១០០ ភាគរយហើយ។ រីឯសំណង់ដែលនៅសល់ ដោយសារប្រជាពលរដ្ឋមិនអាចរកជាងមករុះរើទាន់ពេល ព្រោះថា ចំនួនជាងក្នុងខេត្ដមានមិនគ្រប់គ្រាន់។
លោកបានថ្លែងថា៖ «នៅសល់សំណង់តិចតួចទៀតទេ ដោយសារតែប្រជាពលរដ្ឋយើងរកជាងមករុះរើមិនបាន ដូច្នេះទើបធ្វើឲ្យមានភាពយឺតយ៉ាវ។ ប៉ុន្ដែពលរដ្ឋបាននិយាយជាមួយជាងរួចរាល់ហើយដើម្បីរុះរើ គ្រាន់តែថា ជាងមិនទាន់រុះរើមកដល់សំណង់ពួកគាត់»។
បើតាមមន្ត្រីនាំពាក្យរូបនេះ គឺប្រជាពលរដ្ឋដែលមានសំណង់ប៉ះពាល់បានសហការចូលរួម ១០០ ភាគរយ ជាមួយក្រុមការងារក្នុងការរុះរើសំណង់របស់ពួកគាត់។ លោកថា សម្រាប់សំណង់ដែលប៉ះពាល់ ប្រភេទសំណង់របងផ្ទះ ឬសំយាបផ្ទះ មានភាពងាយស្រួលក្នុងការរុះរើ និងចំណាយពេលតិច។ ប៉ុន្ដែចំពោះសំណង់ជាប្រភេទ អគារ ឬផ្ទះ គឺមានការលំបាកក្នុងការរុះរើទើបត្រូវការពេលយូរ ដើម្បីសិក្សាលើបច្ចេកទេសក្នុងការរុះរើ។
លោក លី សំរិទ្ធ បញ្ជាក់ថា៖ «ដូច្នេះប្រហែល ១-២ ថ្ងៃទៀត ទើបយើងសរុបលទ្ធផលទាំងអស់នៃការរុះរើសំណង់នេះ។ គ្រាន់តែថា តាមលទ្ធផលការប្រជុំសំណង់ដែលប៉ះពាល់នេះមានមិនតិចជាង ២ ពាន់កន្លែងទេ។ ប៉ុន្ដែសំណង់ទាំងនោះ ភាគច្រើនជាសំយាប និងរបងផ្ទះ»។
លោក សួស ណារិន មន្ដ្រីអង្កេតនៃសមាគមអាដហុកប្រចាំខេត្ដសៀមរាបដែលបានអង្កេតមើលការរុះរើសំណង់ប៉ះពាល់ទាំងនេះឲ្យដឹងនៅថ្ងៃនេះដែរថា តាមការសង្កេតឃើញរបស់លោក គឺពលរដ្ឋស្ម័គ្រចិត្តរុះរើសំណង់ដោយភាពស្ងប់ស្ងាត់មិនមានការតវ៉ាណាមួយកើតឡើងដែរ។
លោកថ្លែងថា៖ «រហូតមកដល់ពេលនេះយើងមិនទាន់ទទួលពាក្យបណ្ដឹងណាមួយពីប្រជាពលរដ្ឋកើតឡើងពីការរុះរើសំណង់នេះទេ។ យើងឃើញថាបន្ទាប់ពីអាជ្ញាធរសមត្ថកិច្ចចុះវាស់វែងរួច ប្រជាពលរដ្ឋក៏យល់ព្រមវាយសំណង់ចេញដោយខ្លួនឯង។ យើងក៏មិនឃើញមានការតវ៉ា ឬការប្រឆាំងចំពោះការរុះសំណង់នេះពីសំប្រជាពលរដ្ឋណាម្នាក់ដែរ»។
បើតាមការស៊ើបសួរពីមន្ត្រីសិទ្ធិមនុស្សរូបនេះទៅលើពលរដ្ឋ ដែលមានសំណង់ត្រូវរុះរើជាច្រើននាក់នោះ គឺការរុះរើសំណង់នេះ គឺរដ្ឋបាលខេត្ដមិនមានសំណងគោលនយោបាយណាមួយដល់ប្រជាពលរដ្ឋឡើយ។
អភិបាលខេត្តសៀមរាបលោក ទៀ សីហា ថ្លែងក្នុងកិច្ចប្រជុំត្រួតពិនិត្យលទ្ធផលនៃការកំណត់នូវផលប៉ះពាល់ក្នុងការស្ថាបនាផ្លូវទាំង ៣៨ ខ្សែ ក្នុងក្រុងសៀមរាប ជាមួយមន្រ្ដីពាក់ព័ន្ធ កាលពីថ្ងៃទី ១ ខែតុលា បានអរគុណដល់ប្រជាពលរដ្ឋ ដែលមានស្មារតីចូលរួមសហការជាមួយគណៈកម្មការអន្តរក្រសួង និងរដ្ឋបាលខេត្ត ក្នុងការរុះរើសំណង់ប៉ះពាល់បានទាន់ពេលវេលា។
លោកថ្លែងថា៖ «ទោះបីក្នុងដំណាក់កាលនេះ យើងខ្វះខាតជាងសំណង់ក៏ដោយ ក៏បងប្អូនបានខិតខំ ដើមី្បឲ្យកិច្ចដំណើរការស្ថាបនាផ្លូវក្នុងក្រុងសៀមរាបឲ្យក្លាយជាទីក្រុងស្រស់ស្អាតប្រកបដោយបរិស្ថានល្អបរិសុទ្ធ ក្នុងការទទួលស្វាគមន៍ភ្ញៀវទេសចរណ៍ជាតិ អន្តរជាតិ ក្រោយពេលបញ្ចប់កូវីដនេះទៅ»។
កាលពីថ្ងៃទី ៤ ខែតុលា នេះ លោក ទៀ សីហា ក៏បានដឹកនាំប្រតិភូទៅបំពេញទស្សនកិច្ចនៃការស្ថាបនាផ្លូវ ៣៤ ខ្សែក្នុងខេត្ដព្រះសីហនុ។ បច្ចុប្បន្នគម្រោងនេះសាងសង់ស្ទើរួចរាល់ ១០០ ភាគរយ ដើម្បីជាមូលដ្ឋានក្នុងការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវទាំង ៣៨ ខ្សែនៅក្រុងសៀមរាប ខេត្តសៀមរាប។
យោងតាមកិច្ចប្រជុំគណៈកម្មការអន្តរក្រសួងលើកទី១ ដើម្បីសិក្សា និងអនុវត្តគម្រោងស្ថាបនាផ្លូវនេះ ដែលដឹកនាំដោយលោកទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួងកាលពីថ្ងៃទី ២៥ កញ្ញា បានសម្រេចស្ថាបនា និងកែលម្អផ្លូវទាំង ៣៨ ខ្សែ ក្នុងក្រុងសៀមរាបនេះឡើងវិញទាំងអស់។ ផ្លូវទាំងនេះ ត្រូវធ្វើឲ្យក្លាយទៅជាផ្លូវដែលមានមេត្រីភាពជាមួយវប្បធម៌ ប្រវត្តិសាស្ត្រ និងទេសចរណ៍ និងស្របតាមភូមិសាស្ត្រទីក្រុង។
លោកនាយករដ្ឋមន្ដ្រីហ៊ុន សែន បានប្រកាសបញ្ចេញកញ្ចប់ថវិកាជាតិចំនួន ១៥០ លានដុល្លារ សម្រាប់ស្ថាបនាផ្លូវទាំងនេះឱ្យបានលឿនជាទីបំផុត។ ប្រសិនបើគ្មានការប្រែប្រួលទេនោះ ផ្លូវទាំង ៣៨ ខ្សែនេះ នឹងត្រូវបើកការដ្ឋានស្ថាបនាជាផ្លូវការដោយលោក ហ៊ុន សែន នៅថ្ងៃទី ១៦ ខែ វិច្ឆិកា ឆ្នាំ ២០២០ ខាងមុខនេះ»៕
