ភ្នំពេញៈ រូបសំណាកស្ត្រីកំពុងអង្គុយឱបកូនស្ថិតនៅក្នុងបរិវេណមជ្ឈមណ្ឌលប្រល័យពូជសាសន៍ជើងឯក ដែលជាស្លាកស្នាមនៃប្រវត្តិសាស្ត្រដ៏សែនជូរចត់ ក្នុងរបបខ្មែរក្រហមនាពេលអតីតកាលត្រូវបានសាលារាជធានីភ្នំពេញបើកសម្ពោធជាផ្លូវការកាលពីព្រឹកថ្ងៃអង្គារ។
ការកសាងរូបសំណាក «ស្ត្រីកំពុងអង្គុយឱបកូន» នេះគឺដើម្បីរំឭកឡើងវិញនូវសច្ចធម៌ប្រវត្តិសាស្ត្រនៃជីវិតរស់នៅរបស់ប្រជាពលរដ្ឋទូទៅក្នុងរបបប្រល័យពូជសាសន៍ ប៉ុល ពត ចន្លោះឆ្នាំ ១៩៧៥-១៩៧៩ ដែលត្រូវបានព្រាត់ប្រាស់ក្រុមគ្រួសារ។
លោក ឃួង ស្រេង អភិបាលរាជធានីភ្នំពេញដែលបានចូលរួមក្នុងពិធីសម្ពោធរូបសំណាកនេះបានថ្លែងថា ក្រឡេកមើលអតីតកាល ទោះបីនាពេលបច្ចុប្បន្ន ប្រជាជនកម្ពុជាបាននិងកំពុងរស់នៅយ៉ាងសុខដុមរមនាក្រោមពន្លឺនៃសន្តិភាព និងការអភិវឌ្ឍក្តីក៏ទាំងអស់គ្នា នៅតែចងចាំជានិច្ចនូវអតីតកាលដ៏សែនឈឺចាប់ និងខ្មៅងងឹតបំផុតរបស់ប្រទេសជាតិដែលបណ្តាលមកពីភ្លើងសង្គ្រាម និងអំពើប្រល័យពូជសាសន៍ដ៏សាហាវយង់ឃ្នងបំផុត។
លោកថា៖ «ដូច្នេះហើយ យើងត្រូវតែចងចាំគ្មានថ្ងៃបំភ្លេច និងត្រូវផ្សព្វផ្សាយដល់មនុស្សជំនាន់ក្រោយឱ្យបានយល់ដឹងកុំឱ្យរបបព្រៃផ្សៃនេះ វិលត្រឡប់មកលើសង្គមជាតិយើងជាលើកទី ២ ទៀតឱ្យសោះ»។
ពិធីសម្ពោធរូបសំណាកស្ត្រីកំពុងអង្គុយឱបកូននេះ ធ្វើឡើងស្របពេលដែលប្រជាពលរដ្ឋកម្ពុជាដែលជាពុទ្ធសាសនិក ទ្រទ្រង់វិស័យព្រះពុទ្ធសាសនានៅទូទាំងប្រទេសបាននិងកំពុងចូលរួមប្រារព្ធពិធីបុណ្យកាន់បិណ្ឌតាមទីវត្តអារាមទាំងនៅទីក្រុង និងជនបទ ដែលជាពិធីបុណ្យសាសនាដ៏សំខាន់ ដើម្បីឧទ្ទិសកុសលផលបុណ្យជូនដល់បុព្វការីជន និងញាតិសន្តានដែលស្លាប់ទៅ។
រូបសំណាកស្ត្រីកំពុងអង្គុយឱបកូននេះ ធ្វើឡើងពីស្ពាន់មានទម្ងន់ប្រមាណជិត ១ ពាន់គីឡូក្រាម កម្ពស់ជាង ៣ ម៉ែត្រ និងទទឹង ១,៣ ម៉ែត្រ។ ការធ្វើរូបសំណាកនេះចំណាយថវិកាជាង ៤០ ០០០ ដុល្លារអាមេរិក ដោយរួមជាមួយនឹងការធ្វើកំណាយ និងធ្វើផ្លូវដើរព័ទ្ធជុំវិញដែលបានប្រើប្រាស់រយៈពេល ៦ ខែក្នុងការសាងសង់។ រូបសំណាកនេះមានចារឹកអក្សរជាភាសាខ្មែរ និងអង់គ្លេស ដែលមានខ្លឹមសារថា «ចងចាំគ្មានថ្ងៃភ្លេចនូវឧក្រិដ្ឋកម្មក្នុងរបបកម្ពុជាប្រជាធិបតេយ្យ ១៧.០៤.១៩៧៥-០៦.០១.១៩៧៩»។ រូបសំណាកនេះមានកម្ពស់សរុប ៣,២២ ម៉ែត្រ៕