.jpg)
ប្រាសាទព្រះវិហារ ដែលស្ថិតនៅក្នុងខេត្តព្រះវិហារប្រទេសកម្ពុជា។ រូបថត SPM
ភ្នំពេញ៖លោកនាយករដ្ឋមន្ត្រី ហ៊ុន សែន នៅថ្ងៃទី ១៥ ខែមិថុនា បានចេញសារអបអរសាទរ ដល់ខួប ៥៨ ឆ្នាំ ដែលតុលាការយុត្តិធម៌អន្តរជាតិ ក្រុងឡាអេ សម្រេចឱ្យកម្ពុជាធ្វើជាម្ចាស់កម្មសិទ្ធិលើប្រាសាទព្រះវិហារ ខណៈអ្នកប្រវត្តិសាស្ត្រ ជំរុញឲ្យយុវជនជំនាន់ក្រោយ គួរសិក្សាស្វែងយល់អំពីប្រវត្តិប្រាសាទព្រះវិហារ។
លោកនាយករដ្ឋមន្ត្រី បានសរសេរបង្ហោះនៅលើទំព័រហ្វេសប៊ុករបស់លោក យ៉ាងដូច្នេះថា៖ «ថ្ងៃទី ១៥ ខែ មិថុនា ឆ្នាំ ២០២០ នេះ ជាខួប ៥៨ ឆ្នាំ (១៥ មិថុនា ១៩៦២ - ១៥ មិថុនា ២០២០) ដែលតុលាការយុត្តិធម៌អន្តរជាតិ (ICJ) នាទីក្រុងឡាអេ ប្រទេសហូឡង់ បានសម្រេចឱ្យកម្ពុជាឈ្នះក្តីជាមួយប្រទេសថៃ ក្នុងសំណុំរឿងប្រាសាទព្រះវិហារ ដែលតុលាការយុត្តិធម៌អន្តរជាតិ សម្រេចឱ្យកម្ពុជាជាម្ចាស់កម្មសិទ្ធិលើប្រាសាទព្រះវិហារ»។
ជាមួយនឹងសារអបអរតាម Facebook លោក ហ៊ុន សែន បានថ្លែងរំឭកពីព្រះរាជស្នាដៃ របស់សម្តេចព្រះមហាវីរក្សត្រខ្មែរ ព្រះបរមរតនកោដ្ឋ ព្រះករុណា ព្រះបាទ សម្តេចព្រះនរោត្តម សីហនុ ដែលបានបំពេញព្រះរាជបូជនីយកិច្ចយ៉ាងស្វិតស្វាញបំផុត ដើម្បីទាមទារប្រាសាទព្រះវិហារ រហូតបានចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោកនាថ្ងៃទី ៧ ខែ កក្កដា ឆ្នាំ ២០០៨។
លោក សំបូរ ម៉ាណ្ណារ៉ា សាស្ត្រាចារ្យប្រវត្តិសាស្ត្រ បានថ្លែងប្រាប់ភ្នំពេញប៉ុស្តិ៍នៅថ្ងៃទី ១៥ ខែមិថុនា ថា បើទោះជាកម្ពុជា មិនប្រារព្ធពិធីធំដុំក្នុងការំឭកខួប ៥៨ ឆ្នាំ ដែលកម្ពុជាឈ្នះក្តីលើឆាកអន្តរជាតិ ដើម្បីគ្រប់គ្រងប្រាសាទព្រះវិហារក្តី ប៉ុន្តែការបង្ហោះសាររបស់ថ្នាក់ដឹកនាំក្នុងពេលនេះ គឺជាការបង្ហាញនូវនិមិត្តរូបមួយដ៏អស្ចារ្យក្នុងការទទួលខុសត្រូវរបស់ថ្នាក់ដឹកនាំក្នុងប្រវត្តិសាស្ត្រ ជាពិសេសនោះ គឺជាការរំឭកពីភាពស្ញប់ស្ញែងនូវស្នាព្រះហត្ថរបស់ព្រះបរមរតនកោដ្ឋ ដែលបានទាមទារនូវប្រាសាទព្រះវិហារពីប្រទេសជិតខាងមកវិញ។
លោកបញ្ជាក់ថា៖ «ធម្មតានៅពេលដែលថ្នាក់ដឹកនាំលោក បង្ហោះសារ នោះគឺជាការបង្ហាញប្រាប់អំពីមោទនភាពជាតិដ៏ធំមួយ។ ចឹងនេះ បានន័យថា លោកបានបង្ហាញប្រាប់នូវពិធីដែលឲ្យតម្លៃទៅបុព្វការីជន និងការយល់ដឹងអំពីប្រវត្តិសាស្ត្រ និងរំឭកដល់មហាជនទាំងឡាយ នៅក្នុងពិភពលោកនេះ។ ព្រោះមិនមែនបង្ហាញដល់ត្រឹមតែជាតិទេ ក៏បានបង្ហាញលើឆាកអន្តរជាតិ ឲ្យទទួលដឹងឮ ដែលខ្មែរបានទទួលប្រាសាទព្រះវិហារមកវិញ នាថ្ងៃទី ១៥ ខែមិថុនា»។
ជាមួយនឹងការលើកឡើងបែបនេះ លោក សំបូរ ម៉ាណ្ណារ៉ា បានរំឭកដល់ក្មេងជំនាន់ក្រោយ គួរសិក្សាស្វែងយល់ពីប្រវត្តិសាស្ត្រឲ្យបានច្បាស់លាស់ ខណៈលោកនៅតែប្រកាន់ជំហរក្នុងការផ្សព្វផ្សាយតាមរយៈការបង្រៀនមេរៀនទាំងនេះ និងណែនាំឲ្យយុវជន ចូលរួមប្រារព្ធនូវជ័យជម្នះនេះជារៀងរាល់ឆ្នាំ។
លោកបន្ថែមថា៖ «ការស្វែងយល់អំពីប្រាសាទព្រះវិហារ ដែលអ្នកទាំងអស់គ្នា បានដឹងអំពីថ្ងៃទី១៥ ខែ មិថុនា ឆ្នាំ ១៩៦២ ហើយបានដឹងអំពីហេតុដែលនាំឲ្យយើងឈ្នះក្តី រួមទាំងការខំប្រឹងប្រែងរបស់អ្នកមុខអ្នកការរបស់ខ្មែរ។ តាមរយៈការសិក្សានេះ បាននាំឲ្យយើងដឹងពីកាលប្រវត្តិ សម្រាប់ខ្ញុំជាគ្រូប្រវត្តិសាស្ត្រ ខ្ញុំអំពាវនាវឲ្យកូនៗទាំងអស់គ្នា ត្រូវយកចិត្តទុកដាក់អំពីតម្លៃ និងមោទនភាពជាតិនេះ»៕
