លោកនាយករដ្ឋមន្ត្រី ហ៊ុន សែន នាពេលកន្លងមក។ រូបថត SPM
ភ្នំពេញ៖ លោកនាយករដ្ឋមន្រ្តី ហ៊ុន សែន បានត្រៀមបម្រុងថវិកា ដើម្បីទិញវ៉ាក់សាំងប្រឆាំងវីរុសកូរ៉ូណា រហូតដល់ជាង ១ លានដូស ដើម្បីយកមកចាក់ជូនប្រជាពលរដ្ឋខ្មែរដោយឥតគិតថ្លៃ ក្នុងដំណាក់កាលដំបូង សម្រាប់អ្នកដែលធ្វើការនៅកន្លែងដែលមានហានិភ័យខ្ពស់។
ការប្រកាសត្រៀមទិញវ៉ាក់សាំងប្រឆាំងកូវីដ ១៩ នេះ ត្រូវបានលោកនាយករដ្ឋមន្រ្តី ហ៊ុន សែន ប្រកាសនៅលើបណ្តាញសង្គមរបស់លោកនៅយប់ថ្ងៃទី ០៧ ខែ ធ្នូ ឆ្នាំ ២០២០ នេះ។
លោក ហ៊ុន សែន បានលើកឡើងថា៖ «កន្លងមកជាមួយនឹងការតាមដាន នូវដំណើរការផលិតវ៉ាក់សាំងប្រឆាំងកូវីដ ១៩ របស់ប្រទេសនានា ខ្ញុំបានណែនាំរដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងសេដ្ឋកិច្ច ហិរញ្ញវត្ថុឱ្យត្រៀមបម្រុងថវិកាសម្រាប់ទិញវ៉ាក់សាំងនេះ យកមកចាក់ជូនប្រជាជនយើងដោយឥតគិតថ្លៃជាជំហានដំបូងផងដែរ»។
លោកបានបន្តទៀតថា ពេលនេះប្រទេសមួយចំនួន ផលិតបាននិងដាក់ឱ្យប្រើប្រាស់ហើយនិងកំពុងបញ្ចេញលក់ឱ្យប្រទេសនានាផងដែរ។
លោកបានបញ្ជាក់ថា៖ «ល្ងាចនេះ (៧ ធ្នូ ២០២០) ខ្ញុំបានណែនាំឱ្យរដ្ឋមន្ត្រីក្រសួងសុខាភិបាលពិភាក្សាជាមួយដៃគូអភិវឌ្ឍន៍ ពិសេសអង្គការសុខភាពពិភពលោក ដើម្បីកំណត់ថា តើយើងគួរទិញវ៉ាក់សាំងពីប្រទេសណា? ខ្ញុំក៏បានណែនាំរដ្ឋមន្ត្រីក្រសួងសេដ្ឋកិច្ចហិរញ្ញវត្ថុ ត្រៀមថវិកាសម្រាប់ការទិញ ១ លានដូស (មួយលានដូស) ក្នុងដំណាក់កាលដំបូង ដើម្បីចាក់ជូនចំពោះអ្នកដែលធ្វើការនៅកន្លែងដែលមានហានិភ័យខ្ពស់ និងអ្នកដែលមានហានិភ័យ»។
បើតាមលោកនាយករដ្ឋមន្ត្រី មួយលានដូសចាក់បានត្រឹមតែមនុស្ស ៥០ ម៉ឺននាក់ប៉ុណ្ណោះ (ព្រោះម្នាក់ត្រូវការចាក់ ២ ដង) ក្នុងពេលដែលកម្ពុជាមានប្រជាជន ១៦ លាននាក់ ទាំងចាស់ទាំងក្មេង ដែលក្នុងនោះ អាចមានមនុស្សប្រមាណ ១០ លាននាក់ ត្រូវការចាក់វ៉ាក់សាំង។
លោក ហ៊ុន សែន បានបន្ថែមថា៖ «ក្នុងស្ថានភាពដែលប្រទេសយើង នៅក្រខ្វះថវិកាសម្រាប់ទិញបន្ថែម ខ្ញុំបានណែនាំរដ្ឋមន្ត្រីទាំង២រូប ឱ្យពិភាក្សាជាមួយដៃគូអភិវឌ្ឍន៍ទាំងទ្វេភាគី ទាំងពហុភាគី ដើម្បីស្វែងរកជំនួយបន្ថែមមកជួយដល់ប្រជាជនយើង»។
យ៉ាងណាក៏ដោយលោកនាយករដ្ឋមន្រ្តីសង្ឃឹមថា ដៃគូអភិវឌ្ឍន៍របស់កម្ពុជា នឹងផ្តល់ជំនួយដល់ប្រជាជនខ្មែរ ឬយ៉ាងហោចវ៉ាក់សាំងប្រឆាំងកូវីដ ១៩ ត្រូវបានគេលក់ក្នុងតម្លៃថោកសមរម្យមកដល់ប្រទេសកម្ពុជា។ ជាមួយគ្នានេះ លោក ហ៊ុន សែន ក៏បានបង្ហើមផងដែរថា លោកបានណែនាំរដ្ឋមន្ត្រីក្រសួងសេដ្ឋកិច្ចហិរញ្ញវត្ថុ ត្រៀមថវិកាសម្រាប់ទិញពី ២ ទៅ ៣ លានដូសថែមទៀតផងដែរ សម្រាប់ដំណាក់កាលបន្ទាប់៕
វីដេអូ៖
.jpg)
