ភ្នំពេញ៖ លោកនាយករដ្ឋមន្រ្តី ហ៊ុន សែន បានផ្តល់ថវិកាប្រមាណ ៥៧ ម៉ឺនដុល្លារបន្ថែមទៀត ទៅដល់បណ្តាខេត្តទាំងអស់នៅទូទាំងប្រទេសលើកលែងតែរាជធានីភ្នំពេញសម្រាប់ប្រើប្រាស់លើការធ្វើចត្តាឡីស័កក្នុងរយៈពេល ១ សប្ដាហ៍ទៀត ដើម្បីប្រយុទ្ធប្រឆាំងនឹងជំងឺកូវីដ ១៩។
យោងតាមលិខិតមួយច្បាប់ចេញដោយក្រសួងសុខាភិបាលដាក់ជូនលោកនាយករដ្ឋមន្ត្រី ហ៊ុន សែន បានឲ្យដឹងថា ថវិកាផ្តល់ជូនសរុបទៅដល់បណ្តាខេត្តទាំង ២៤ គឺមានចំនួន ៣២ ៦៦៥ ០០០ ០០០ រៀល ឬស្មើជាង ៨ លានដុល្លារ ក្នុងនោះថវិកាដែលនៅសល់មានចំនួន ២៤៤ ៥៣២ ០០០ រៀល ឬស្មើនឹងជាង ៦ ម៉ឺនដុល្លារ។ រីឯថវិកាស្នើសុំបន្ថែមមានប្រមាណ ២ ២៨០ ០០០ ០០០រៀល ឬស្មើ ៥៧ ម៉ឺនដុល្លារ។
លិខិតនេះបានបញ្ជាក់ថា៖ «ថវិកាទាំងនេះសម្រាប់ឲ្យបណ្តាខេត្តទាំងនោះប្រើប្រាស់ និងត្រៀមចាប់ពីថ្ងៃទី ៩ ដល់ថ្ងៃទី ១៥ ខែ ឧសភា ឆ្នាំ ២០២១ ខាងមុខនេះ»។
លិខិតដដែលបានឲ្យដឹងបន្តថា បន្ទាប់ពីទទួលបានថវិកាទាំងនេះ បណ្តាខេត្តទាំងនោះត្រូវធ្វើការចំណាយទៅលើការធ្វើចត្តាឡីស័ករបស់ប្រជាពលរដ្ឋសរុបទូទាំង ២៤ ខេត្ត ដែលមានជាង ៥ ម៉ឺននាក់ ដោយក្នុងនោះ ខេត្តដែលត្រូវចំណាយលើអ្នកធ្វើចត្តាឡីស័កច្រើនជាងគេ គឺខេត្តបន្ទាយមានជ័យ ខេត្តបាត់ដំបង និងខេត្តឧត្តរមានជ័យ។
ចំណែកខេត្តដែលមានចំនួនអ្នកធ្វើចត្តាឡីស័កច្រើនជាងគេ គឺខេត្តព្រះសីហនុដែលមានជាង ៣៧ ០០០ នាក់ ខណៈខេត្តកំពត និងខេត្តមណ្ឌលគិរី មិនមានចំនួនអ្នកធ្វើចត្តាឡីស័កនោះទេ។ នេះបើតាមលិខិតស្នើថវិការបស់ក្រសួងសុខាភិបាលនេះ។
លោក វ៉ិត វឌ្ឍនា នាយករដ្ឋបាលខេត្តកំពត ដែលជាខេត្តមួយគ្មានអ្នកធ្វើចត្តាឡីស័កក្នុងមណ្ឌលដែលរដ្ឋបាលខេត្តបានរៀបចំបានប្រាប់ ភ្នំពេញ ប៉ុស្តិ៍ថា មណ្ឌលចត្តាឡីស័កទាំងអស់របស់ខេត្ត គឺមិនមានអ្នកសម្រាកនោះទេ ព្រោះភាគច្រើនជាអ្នកចំណូលថ្មី ដែលតម្រូវឲ្យធ្វើចត្តាឡីស័កនៅផ្ទះ ខណៈអ្នកដែលរកឃើញថា មានវិជ្ជមាន គឺបញ្ជូនទៅសម្រាកព្យាបាលនៅមន្ទីរពេទ្យ។
លោកបានបន្តថា ដោយសារតែគ្មានចំនួនអ្នកធ្វើចត្តាឡីស័កនៅមណ្ឌលរដ្ឋ ដូច្នេះរដ្ឋបាលខេត្តមិនបានស្នើកញ្ចប់ថវិកាបន្ថែមសម្រាប់ប្រយុទ្ធប្រឆាំងនឹងជំងឺកូវីដ ១៩ ក្នុងសប្តាហ៍ថ្មីនេះទេ ព្រោះថវិកាដែលបានផ្តល់ជូនដោយលោកនាយករដ្ឋមន្ត្រីនាពេលកន្លងទៅ គឺនៅសល់សម្រាប់ត្រៀមប្រើប្រាស់ក្នុងពេលខាងមុខ។
លោកបានបញ្ជាក់ថា៖ «គិតត្រឹមថ្ងៃទី ៩ ឧសភា ខេត្តកំពតមកទល់ពេលនេះ គឺមិនមានអ្នកធ្វើចត្តាឡីស័កនៅក្នុងមណ្ឌលរបស់រដ្ឋនោះទេ ដែលជាហេតុនាំឲ្យយើងមិនចាំបាច់ចំណាយថវិកាដែលតម្រូវដល់ការហូបចុកដល់ពួកគាត់។ យើងឲ្យពួកគាត់គោរពតាមគោលការណ៍ ៣ កុំ ៣ ការពារ»។
លោក វ៉ិត វឌ្ឍនា បានឲ្យដឹងថា សរុបជារួមមកអ្នកដែលបានធ្វើចត្តាឡីស័កនៅមណ្ឌលចត្តាឡីស័ករបស់រដ្ឋបាលខេត្តកំពត គឺចំនួន ៦៣៨ នាក់ ដែលពួកគេបានចេញពីមណ្ឌលអស់ហើយ។ ចំណែកអ្នកធ្វើចត្តាឡីស័កនៅតាមផ្ទះសរុប គឺមាន ៣ ៤៤០ នាក់ ខណៈអ្នកតេស្តរកឃើញវិជ្ជមានកូវីដ ១៩ គឺមានចំនួន ២០ នាក់៕