លោក ហ៊ុន ជា ត្រូវបានដឹកចេញពីតុលាការពីម្សិលមិញ។ ហុង មិនា
ភ្នំពេញៈ តុលាការរាជធានីភ្នំពេញកាលពីម្សិលមិញបានជម្រះក្ដីជាបន្ទាន់ដោយបានសម្រេចផ្ដន្ទាទោសដាក់ពន្ធនាគារ ១៨ ខែចំពោះឧត្តមសេនីយ៍ផ្កាយ៣នៃកងកម្លាំងប្រដាប់អាវុធនគរបាលជាតិ ដែលត្រូវជាក្មួយបង្កើតរបស់លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្រោយពីបានបាញ់ ១០ គ្រាប់កាលពីយប់ថ្ងៃអង្គារ។
លោក អ៊ី រិន្ទ អ្នកនាំពាក្យស្ថាប័នចៅក្រមនៃតុលាការរាជធានីភ្នំពេញបានប្រាប់ភ្នំពេញ-ប៉ុស្តិ៍កាលពីម្សិលមិញថាលោក រស់ ពិសិដ្ឋ ចៅក្រមជំនុំជម្រះបានសម្រេចផ្ដន្ទាទោស ១៨ ខែដោយចោទប្រកាន់លោក ហ៊ុន ជា ពីបទគំរាមកំហែងសម្លាប់តាមមាត្រា ២៣៣ និងធ្វើឲ្យខូចដោយចេតនាតាមមាត្រា ៤១០ នៃក្រមព្រហ្មទណ្ឌ។
លោក រិន្ទ ថ្លែងថា៖ «ពេលនេះលោក ហ៊ុន ជា ត្រូវបានបញ្ជូនទៅពន្ធនាគារព្រៃសដោយជាប់ទោស ១៨ ខែ នេះមិនមែនតែករណីមួយទេ (ដែលតុលាការសម្រេចភ្លាមៗ) មានករណីច្រើនផ្សេងទៀត ដោយសារតែសមត្ថកិច្ចបានកសាងសំណុំរឿងមូលគ្រប់គ្រាន់សម្រាប់តុលាការបើកការជម្រះបន្ទាន់»។
លោក ហ៊ុន ជា ត្រូវបានឃាត់ខ្លួនកាលពីម្សិលមិញក្រោយពីបាញ់រះប្រមាណជា ១០ គ្រាប់ឡើងលើដោយគ្មានគោលដៅនៅក្នុងសង្កាត់ផ្សារថ្មី ១ ខណ្ឌដូនពេញកាលពីយប់ថ្ងៃអង្គារ ដោយសង្ស័យថាអាចកើតជម្លោះនៅក្នុងគ្រួសារ ឬស្រវឹងស្រា។ យោងតាមប្រភពមន្ត្រីនគរបាល។
លោក សុខ ខេមរិន្ទ ប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានអះអាងប្រាប់ ភ្នំពេញប៉ុស្តិ៍កាលពីម្សិលមិញផងដែរថា៖ «ឥឡូវនេះ កម្លាំងយើងបានកសាងសំណុំរឿងបញ្ជូនទៅកាន់តុលាការរួចហើយ»។
លោក ខេមរិន្ទ ថ្លែងថានៅក្នុងអំឡុងពេលដែលពង្រឹងសន្តិសុខសម្រាប់ការរៀបចំបោះឆ្នោតជ្រើសតាំងតំណាងរាស្ត្រនៅខែកក្កដាខាងមុខគឺមិនលើកលែងដល់ជនដែលបង្កឲ្យមានការផ្ទុះអាវុធនោះទេ។
លោក ខេមរិន្ទ ថ្លែងថា៖ «ក្នុងអំឡុងពេលនេះអ្នកណាៗក៏ដោយ ឲ្យតែផ្ទុះអាវុធគឺច្បាម (តាមចាប់) ហើយ»។
លោក ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញឲ្យដឹងថា សមត្ថកិច្ចនគរបាលមកពីក្រសួងមហាផ្ទៃគឺជាអ្នកឃាត់ខ្លួនលោក ហ៊ុន ជា កាលពីព្រឹកថ្ងៃពុធ។
ទោះបីជាយ៉ាងណាក៏ដោយអាជ្ញាធរកងកម្លាំងប្រដាប់អាវុធនៅក្នុងតំបន់បានបង្ហាញនូវភាពខ្លាចរអាមិនហ៊ានប្រតិបតិ្តការឃាត់ខ្លួនលោក ហ៊ុន ជា នោះទេ បន្ទាប់ពីផ្ទុះអាវុធភ្លាមៗនោះ។
លោក ជួន សុវណ្ណ ថា៖ «នគរបាលរាជធានីមិនបានឃាត់គាត់ (ហ៊ុន ជា) ទេ តែវាជាសមត្ថកិច្ចរបស់ក្រសួងមហាផ្ទៃ»។
លោក ហួត ចាន់យ៉ារ៉ាន់ អធិការនគរបាលខណ្ឌដូនពេញបានបញ្ជាក់ថា ក្មួយប្រុសលោកនាយករដ្ឋមន្ត្រីត្រូវសមត្ថកិច្ចក្រសួងឃាត់ខ្លួនពិតមែន។ លោកថ្លែងថា៖ «ហ៊ុន ជា ហ្នឹងណា។...ក្រោយការផ្ទុះអាវុធ យើងទៅដល់ យើងអត់ធ្វើផ្ទាល់ទេ»។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា លោក ហ៊ុន ជា បានបាញ់ឡើងទៅលើអាកាស មិនបណ្ដាលឲ្យមាននរណាម្នាក់គ្រោះថ្នាក់ដោយសារគាត់នោះទេ»។
លោក ហ៊ុន ជា សព្វថ្ងៃជាឧត្តមសេនីយ៍ឯក ក្របខ័ណ្ឌនគរបាលជាតិជាកូនប្រុស លោក ហ៊ុន សាន ដែលត្រូវជាបងប្រុសលោក ហ៊ុន សែន។ លោក ហ៊ុន ជា ក៏ធ្លាប់បង្កការបាញ់បោះដោយមិនមានទោសពៃផងដែរកាលពីអតីតកាល។
ក្នុងឆ្នាំ ២០១២ លោក ហ៊ុន ជា និងលោក ហ៊ុន តូ ដែលជាបងប្អូនជីដូនមួយនឹងគ្នាត្រូវបានជាប់ចោទពីករណីបាញ់បោះដែលធ្វើឲ្យរបួសមនុស្ស ២ នាក់ តែក្រោយមកករណីនេះត្រូវបានទម្លាក់ចោលដោយសារមានភ័ស្តុតាងមិនគ្រប់គ្រាន់។
ក្នុងអំឡុងឆ្នាំ ២០១០ លោកនាយករដ្ឋមន្ត្រី ហ៊ុន សែន បានអំពាវនាវជាសាធារណៈឲ្យក្មួយប្រុសរបស់លោកគឺលោក ហ៊ុន ជា ឲ្យត្រឡប់ចូលផ្ទះ ក្រោយពីមានការចោទប្រកាន់បោកប្រាស់ប្រពន្ធ និងប្រើប្រាស់គ្រឿងញៀន។ នៅក្នុងរបាយការណ៍របស់អង្គការគ្លូបលវីតណេស ឆ្នាំ ២០១៦ លោក ហ៊ុន ជា ត្រូវបានចង្អុលបង្ហាញដោយចោទប្រកាន់ពីការរំលោភច្បាប់ព្រោះតែមានផលប្រយោជន៍ពីជំនួញ ទន្ទឹមគ្នានឹងលោកកំពុងកាន់តួនាទីនៅក្នុងរដ្ឋាភិបាល។
លោក សេង វុត្ថា នាយប៉ុស្តិ៍សង្កាត់ផ្សារថ្មីមួយបានឲ្យដឹងថា ករណីផ្ទុះអាវុធនោះបានកើតឡើងនៅមុខផ្ទះវេរលុយ ទ្រូម៉ានី ដែលមានទីតាំងស្ថិតនៅភូមិ ១១ សង្កាត់ផ្សារថ្មី ១។ អ្នកដែលបង្កការផ្ទុះអាវុធនេះគឺជាក្មួយប្រុសរបស់លោកនាយករដ្ឋមន្ត្រី។
លោក វុត្ថា ថ្លែងថា៖ «យើងមិនដឹងថាគាត់ផ្ទុះអាវុធដោយសាររឿងអ្វីនោះទេ ប៉ុន្តែទំនងជាករណីជម្លោះពាក្យសម្តីនៅក្នុងគ្រួសារ ឬដោយសារគាត់ស្រវឹងស្រា ព្រោះក្រោយការផ្ទុះអាវុធ គាត់ឡើងជិះរថយន្តចេញទៅបាត់ ហើយកម្លាំងសមត្ថកិច្ចយើងបានត្រឹមតែរាយការណ៍ពីករណីនេះទៅថ្នាក់លើតែប៉ុណ្ណោះ»៕
.jpg)
