.jpg)
អាជ្ញាធរបិទខ្ទប់មិនអោយចេញចូលនៅសង្កាត់ស្ទឹងមានជ័យ ខណ្ឌមានជ័យ កាលពីម្សិលមិញ។ ហ៊ាន រង្សី
ភ្នំពេញ៖ លោក ឃួង ស្រេង អភិបាលរាជធានីភ្នំពេញស្នើឱ្យអាជ្ញាធរខណ្ឌទាំង ១៤ ត្រូវអនុវត្តសេចក្តីសម្រេចរបស់រដ្ឋបាលរាជធានីភ្នំពេញលើបម្រាមគោចរ ការត្រួតពិនិត្យ ការផ្អាកលក់គ្រឿងស្រវឹង ពិសេសត្រូវត្រួតពិនិត្យខណ្ឌទាំង ៣ ដែលពាក់ព័ន្ធនឹងតំបន់បិទខ្ទប់ទាំងអស់ ជាពិសេសត្រូវថតរូបពលរដ្ឋដែលត្រូវបានចេញដើរទិញម្ហូមអាហារ។
ក្នុងកិច្ចប្រជុំជាមួយនឹងមន្ត្រីខណ្ឌទាំង ១៤ កាលពីព្រលប់ថ្ងៃទី ១១ លោក ឃួង ស្រេង បានឱ្យដឹងថា លោកក៏ឱ្យអាជ្ញាធរខណ្ឌដែលត្រូវបិទខ្ទប់មើលពលរដ្ឋកុំឱ្យដើររហេតរហូត ដោយពុំបានត្រួតពិនិត្យ ប៉ុន្តែត្រូវធ្វើយ៉ាងណាកុំឱ្យផ្ទុយពីការកំណត់ និងការណែនាំរបស់រដ្ឋបាលរាជធានី ដូចជាការចេញចូល ទិញម្ហូបអាហារ ត្រូវកំណត់មុខសញ្ញាគាត់ឱ្យបានច្បាស់ ជាមួយនឹងការថតរូបគាត់ទុក។
លោក ឃួង ស្រេង ពន្យល់ថា ការថតរូបពលរដ្ឋរូបណាដែលបានធ្វើដំណើរចេញ ដើម្បីកំណត់មុខសញ្ញាពលរដ្ឋ ២ ទៅ ៣ ថ្ងៃក្រោយ ត្រូវតែជាមនុស្សម្នាក់នេះជាអ្នកចេញទៅទិញបន្លែបង្ការត្រីសាច់។
លោកបានបញ្ជាក់ថា៖ «កម្លាំងដែលអនុវត្តរាល់សកម្មភាពត្រូវរាយការណ៍ជាប្រចាំមករដ្ឋបាលរាជធានីភ្នំពេញ។ ត្រូវពិនិត្យពីស្ថានភាពជាក់ស្តែង ចំពោះការនាំយកអំណោយទៅចែកជូនប្រជាពលរដ្ឋ ពោលគឺត្រូវផ្តល់ជូនចំពោះប្រជាពលរដ្ឋដែលងាយរងគ្រោះជាងគេមុន។ បន្ថែមពីនេះ ការរក្សាគម្លាតសុវត្ថិភាព ក្នុងពេលចែកអំណោយត្រូវតែអនុវត្តឱ្យបានល្អប្រសើរ។ នេះជារឿងសំខាន់ដែលត្រូវធ្វើឱ្យខាងតែបាន»។
តាមរបាយកាណ៍របស់រដ្ឋបាលរាជធានីភ្នំពេញបានឱ្យដឹងថា មកទល់ពេលនេះអាជ្ញាធររាជធានីភ្នំពេញបានបិទខ្ទប់ ភូមិ សង្កាត់ជាច្រើន នៅក្នុងមូលដ្ឋានរាជធានីភ្នំពេញ ដើម្បីទប់ស្កាត់ ការរីករាលដាលជំងឺកូវីដ ១៩ ក្នុងព្រឹត្តិកាណ៍សហគមន៍ ២០ កុម្ភៈ ក្នុងនោះមានដូចជា ភូមិត្រពាំងថ្លឹង ២ និងភូមិទួលពង្រនៃសង្កាត់ចោមចៅទី១ ភូមិចម្ការឪឡឹក ១ ភូមិប៉ប្រកខាងត្បូង ភូមិប៉ប្រកខាងជើង និងភូមិត្រពាំងល្វា ១ នៃសង្កាត់កាកាបទី១ និងភូមិចម្ការឪឡឹក ២ ក្នុងសង្កាត់កាកាបទី២ ខណ្ឌពោធិ៍សែនជ័យ ។
របាយការណ៍ដដែលបន្តថា ខណ្ឌមានជ័យមានភូមិទ្រា ៤ ភូមិដំណាក់ធំ ២ និងភូមិដំណាក់ធំ ៣ នៃសង្កាត់ស្ទឹងមានជ័យ ៣ សង្កាត់ស្ទឹងមានជ័យ ១ និងស្ទឹងមានជ័យ ២ រីឯខណ្ឌសែនសុខមានភូមិទ្រុងមាន់ សង្កាត់អូរបែកក្អម ដែលជាភូមិ និងសង្កាត់ មានការរីករាលដាលជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ។
ភូមិឋានដែលបិទខ្ទប់នេះហើយដែលអាជ្ញាធររាជធានីភ្នំពេញ អាជ្ញាធរខណ្ឌ សង្កាត់ និងកងកម្លាំងមានសមត្ថកិច្ចទាំងអស់ត្រូវយកចិត្តទុកដាក់ឱ្យបានខ្លាំងក្លាបំផុត ទាំងការអនុវត្ត ការធ្វើចត្តាឡីស័កឱ្យគ្រប់ ១៤ ថ្ងៃ មិនឱ្យមានការជួបជុំ និងការប្រគល់អំណោយជូនពួកគាត់៕
