.jpg)
លោក កឹម សុខា និងមន្ត្រីអបដំណើរនៅខេត្តសៀមរាបក្នុងខែកក្កដានេះ។ រូបថត FB
ភ្នំពេញៈ អតីតប្រធានអតីតគណបក្សសង្គ្រោះជាតិ លោក កឹម សុខា ក្រោយស្ងប់ស្ងាត់រយៈពេលវែងនោះកាលពីពេលថ្មីៗនេះចាប់ផ្ដើមធ្វើដំណើរទៅតាមខេត្តមួយចំនួនដើម្បីគោរពវិញ្ញាណក្ខន្ធចំពោះអ្នកស្នេហាជាតិ និងស្វែងយល់ពីផលប៉ះពាល់ដោយជំងឺកូវីដ១៩លើកសិករ និងវិស័យទេសចរណ៍ ប៉ុន្តែលោកមិនបានធ្វើសកម្មភាពនយោបាយប៉ះពាល់ដល់បម្រាមពីតុលាការទេ។ នេះបើយោងតាមការអះអាងរបស់មេធាវីរបស់លោក។
អតីតប្រធានអតីតគណបក្សសង្គ្រោះជាតិដែលត្រូវបានតុលាការកំពូលរំលាយកាលពីឆ្នាំ ២០១៧ លោក កឹម សុខា រយៈពេលចុងក្រោយនេះបានបង្ហាញវត្តមាននៅទីសាធារណៈមួយចំនួន បន្ទាប់ពីលោកបន្តភាពស្ងប់ស្ងាត់ជាយូរមកហើយ ក្រោយពីតុលាការបានអនុញ្ញាតឲ្យលោកដើរហើរក្នុងប្រទេសកម្ពុជាតាំងពីថ្ងៃទី ១០ វិច្ឆិកា ២០១៩។
លោក ចាន់ ចេន មេធាវីមួយរូបរបស់លោក កឹម សុខា ថ្លែងពីម្សិលមិញថា លោក កឹម សុខា បានធ្វើដំណើរទៅខេត្តកំពង់ចាម និងត្បូងឃ្មុំកាលពីថ្ងៃទី ៦ កក្កដា ដើម្បីស្វែងយល់ពីកសិផល និង ជីវភាពកសិករក្នុងស្ថានភាពកូវីដ។ កាលពីថ្ងៃទី ១០ កក្កដា លោកបានទៅខេត្តតាកែវ ដើម្បីទៅអុជធូបនៅកន្លែងពិធីបុណ្យខួប ៤ ឆ្នាំរបស់លោក កែម ឡី ដើម្បីគោរពគាត់ចំពោះការលះបង់របស់លោក។ នៅថ្ងៃ ១៧ និង ១៨ កក្កដានេះលោកបានទៅខេត្តនៅភាគពាយព្យរួមមានបន្ទាយមានជ័យ និងសៀមរាប។
លោក ចាន់ ចេន បានថ្លែងថា៖ «នេះមិនមែនជាសកម្មភាពនយោបាយអ្វីទេ ហើយក៏មិនបានបំពានបម្រាមអ្វីដែរ។ លោកទៅដើម្បីធ្វើបូជនីយកិច្ចដល់វិញ្ញាណក្ខន្ធចំពោះបុព្វបុរសស្នេហាជាតិ ដូចជាលោកឧកញ៉ា ឃ្លាំង មឿង មហាវីរក្សត្រកសាងអង្គរវត្ត នគរធំ ។ល។ ហើយក៏បួងសួងសុំសេចក្តីសុខសម្រាប់ប្រទេស ប្រជាពលរដ្ឋខ្មែរផងដែរ។ ជាងនេះទៀតស្វែងយល់អំពីទេសចរណ៍ដែលស្ថិតក្នុងសម័យកូវីដដែលកំពុងវាយលុកផងដែរ»។
អ្នកស្រី ម៉េង សុភារី មេធាវីមួយរូបទៀតរបស់លោកបានថ្លែងថា លោក កឹម សុខា អាចជួបជាមួយមនុស្សទូទៅ អ្នកនយោបាយ និងសហការីចាស់ដើម្បីសួរសុខទុក្ខ និងសម្ដែងការនឹករឭក កុំឲ្យតែរៀបចំសកម្មភាពនយោបាយ ដែលតុលាការបានហាមឃាត់។
លោកស្រីបន្តថា៖ «មែនទែនទៅ ទាំងអស់នេះមិនមែនជាការចាប់ផ្ដើមធ្វើដំណើរចេញក្រៅផ្ទះរបស់ឯកឧត្តម កឹម សុខា ឡើយ។ គិតចាប់ពីមានសេចក្ដីសម្រេចខែវិច្ឆិកា ឆ្នាំ ២០១៩ មក ឯកឧត្តម កឹម សុខា ក៏ធ្លាប់បានចេញទៅក្រៅផ្ទះដែរ គ្រាន់តែថា ការដើរហើររបស់លោកមិនត្រូវបានធ្វើការផ្សព្វផ្សាយប៉ុណ្ណោះ។ ជាធម្មតាទេ មនុស្សយើងបើនៅមួយកន្លែងតែងមានអារម្មណ៍ធុញទ្រាន់តប់ប្រមល់ខ្លះដែរ ហើយគាត់ចាកចេញពីផ្ទះគាត់ទៅតាមខេត្ត ជាពិសេសទៅលេងចម្ការរបស់គាត់ ដើម្បីស្រូបយកខ្យល់អាកាស មើលទេសភាព»។
លោក មាជ សុវណ្ណារ៉ា អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ដែលបានទទួលដំណើរលោក កឹម សុខា នៅខេត្តបន្ទាយមានជ័យបានថ្លែងថា លោក កឹម សុខា មិនបានទៅជួបសកម្មជនទាក់ទងនឹងរឿងនយោបាយទេ គ្រាន់តែមានការជួបដោយចៃដន្យជាមួយអតីតសកម្មជនដែលស្កាត់មកជួបសួរសុខទុក្ខលោក ឬទៅជួបសួរសុខទុក្ខអតីតសមាជិកបក្សដែលកំពុងធ្លាក់ខ្លួនឈឺ។
លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងថា តាមការសម្រេចរបស់ចៅក្រមស៊ើប លោក កឹម សុខា ត្រូវបានហាមឃាត់តែ ២ ករណីទេ គឺធ្វើសកម្មភាពនយោបាយ និងចាកចេញទៅក្រៅប្រទេស។
ទោះយ៉ាងណាលោកបញ្ជាក់ដូច្នេះថា៖ «ករណីលោក កឹម សុខា មិនមានស្ថាប័នណាអាចបកស្រាយជំនួសចៅក្រម និងតុលាការដែលជាស្ថាប័នឯករាជ្យបានទេ។ ខាងតុលាការគេហាមតែ ២ ទេ គឺធ្វើដំណើរទៅក្រៅប្រទេស និងធ្វើសកម្មភាពនយោបាយ។ ត្រង់ថាសកម្មភាពរបស់គាត់ជាសកម្មភាពនយោបាយឬអត់នោះ គឺអាស្រ័យលើចៅក្រមស៊ើបជាអ្នកកំណត់ និងសន្និដ្ឋាន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា ការចេញដំណើរទៅតាមខេត្តរបស់លោក កឹម សុខា បញ្ជាក់ថាស្ថានភាពសម្រាប់លោកធូរស្រាលច្រើន។ ជាពិសេសបន្ទាប់ពីលោកបានទៅចូលរួមរំលែកទុក្ខដល់លោកនាយករដ្ឋមន្ត្រី ហ៊ុន សែន ដែលបាត់បង់ម្ដាយក្មេកកាលពីដើមខែឧសភា និងសកម្មភាពជាបន្តបន្ទាប់។
លោកបន្តថា ភាពធូរស្រាលសម្រាប់លោក កឹម សុខា ក៏កើតមានស្របពេលដែលភាពរកាំរកូសផ្ទៃក្នុងនៃអតីតគណបក្សសង្គ្រោះជាតិកាន់តែលេចរូបរាងឡើងច្បាស់ ពោលគឺក្រុមដែលគាំទ្រលោក កឹម សុខា និងក្រុមអ្នកគាំទ្រលោក សម រង្ស៊ី បានចេញវាយប្រហារគ្នាតាមបណ្ដាញសង្គម។ បើក្រុមទាំង ២ បែកបាក់គ្នានោះ ស្ថានភាពនឹងវិលទៅរកស្ថានភាពមួយដូចក្រោយការបោះឆ្នោតឆ្នាំ ២០០៨ ដល់ឆ្នាំ ២០១២ ដែលពេលនោះ គេឃើញគណបក្សរបស់លោក កឹម សុខា និងគណបក្សរបស់លោក សម រង្ស៊ី វាយប្រហារគ្នា។
លោកថ្លែងថា៖ «ឥឡូវនេះ បើនិយាយពីសម្ព័ន្ធភាព កឹម សុខា សម រង្ស៊ី វាមិនមែនជាមនុស្សតែមួយទៀតទេ។ ប៉ុន្តែក្រុមទាំង ២ នេះរង់ចាំមើលគ្នាទៅវិញទៅមក ថា តើអ្នកណាចេញពីទ្រនំ រួមមុន គឺចេញពីអតីត CNRP មុន។ ឥឡូវនេះនៅខ្លាចរៀងខ្លួន តែជាយុទ្ធសាស្ត្រ ឬទិសដៅនយោបាយ វាខុសគ្នារួចស្រេចទៅហើយ។ ពីមុនគាត់រួមកម្លាំងគ្នាវាយសត្រូវរួមគឺផ្ដួលគណបក្សប្រជាជនកម្ពុជា។ តែពេលនេះទាំងលោក សម រង្ស៊ី និងលោក កឹម សុខា មិនមានអ្នកណាហ៊ានប្រកាសទៅបង្កើតបក្សថ្មីទេ ខ្លាចអ្នកគាំទ្រអស់ជំនឿ»។
លោក កឹម សុខា កំពុងស្ថិតក្នុងការជំនុំជម្រះសំណុំរឿងសន្ទិដ្ឋភាពជាមួយបរទេស។ ប៉ុន្តែសាលាដំបូងរាជធានីភ្នំពេញបានផ្អាកដំណើរការជម្រះរឿងក្ដីនេះដើម្បីចូលរួមទប់ស្កាត់ការឆ្លងជំងឺកូវីដ១៩៕
វីដេអូ៖
