ភ្នំពេញៈ អតីតប្រធានគណបក្សខ្មែររួបរួមជាតិលោក ញឹក ប៊ុនឆៃ ដែលទើបត្រូវបានដោះលែងពីពន្ធនាគារឲ្យនៅក្រៅឃុំបណ្តោះអាសន្នកាលពីខែមុន នឹងត្រូវតែងតាំងឲ្យធ្វើជាប្រធានបក្សនេះវិញនៅក្នុងសមាជដែលនឹងរៀបចំធ្វើនាចុងសប្តាហ៍នេះ ដើម្បីចូលរួមប្រកួតប្រជែងការបោះឆ្នោតនៅចុងខែក្រោយ ប៉ុន្តែមន្ត្រីជាន់ខ្ពស់ថាលោក ប៊ុនឆៃ ត្រូវតែចូលមកប្រឈមនឹងផ្លូវច្បាប់វិញ ក្នុងករណីតុលាការបន្តនីតិវិធី។
លោក សឹង្ហ គីរី ប្រធានគណបក្សខែ្មររួបរួមជាតិប្រាប់ភ្នំពេញ-ប៉ុស្តិ៍ម្សិលមិញថា គណៈកម្មាធិការអចិន្រៃ្តយ៍គណបក្សបានប្រជុំសម្រេចប៉ុន្មានថ្ងៃមុននេះថានឹងធ្វើសមាជនាថ្ងៃទី ៩ ខែមិថុនាដើម្បីផ្លាស់ប្តូររូបលោកដែលជាប្រធានបក្សបច្ចុប្បន្នចេញហើយតែងតាំងលោក ញឹក ប៊ុនឆៃ ដែលជាអតីតប្រធានគណបក្សនេះឲ្យលោកធ្វើជាប្រធានបក្សវិញ ក្រោយពីលោក ញឹក ប៊ុនឆៃ ត្រូវបានដោះលែងឲ្យនៅក្រៅឃុំបណ្តោះអាសន្នដោយសារថាលោកគ្រាន់តែមានការសង្ស័យពាក់ព័ន្ធនឹងផ្លូវច្បាប់ហើយថាការចោទប្រកាន់នោះមិនទាន់រកឃើញអ្វីធំដុំនៅឡើយទេ ហើយគណៈកម្មាធិការជាតិរៀបចំការបោះឆ្នោត (គជប) ក៏មិនជំទាស់នឹងបេក្ខភាពលោក ញឹក ប៊ុនឆៃ ក្នុងការឈរជាប្រធានបក្សដើម្បីចូលរួមប្រកួតប្រជែងក្នុងការបោះឆ្នោតនោះដែរ។
លោកថាលោក ញឹក ប៊ុនឆៃ មានប្រជាប្រិយភាពក្នុងស្រទាប់ប្រជាពលរដ្ឋ និងអាចមានជ័យជម្នះក្នុងការដឹកនាំរបស់លោក។
លោក សឹង្ហ គីរី ថ្លែងថា៖ «បើតាមខ្ញុំយល់ បើគេយល់ព្រមឲ្យឈរជាបេក្ខភាពហើយ ខ្ញុំថាដូចជាអត់អីទេ។ ខ្ញុំដាក់បេក្ខភាព (លោក ញឹក ប៊ុនឆៃ) ទៅឈរជាតំណាងរាស្ត្រហើយ គ.ជ.ប. យល់ព្រមមិនមានបញ្ហាអីទេមានន័យថាមិនមានទោសអីទេ»។
លោកបានបន្ថែមថា៖ «ខ្ញុំមានសង្ឃឹមខ្លះដែរ តែយើងក៏មិនទាន់ស្មានថា យើងអាចឈានទៅរកកៅអីក្នុងរដ្ឋសភាបានប៉ុន្មានដែរ ប៉ុន្តែគ្រាន់តែថា សមាជិកសមាជិការបស់យើង ហើយប្រជាពលរដ្ឋមានការគាំទ្រច្រើន»។
បើតាមលោក ហង្ស ពុទ្ធា អ្នកនាំពាក្យ គ.ជ.ប ឲ្យដឹងថាទោះបីលោក ញឹក ប៊ុនឆៃ ត្រូវបានទទួលស្គាល់ឲ្យឈរឈ្មោះជាបេក្ខជន តំណាងរាស្ត្រ និងជាប្រធានគណបក្សក៏ដោយ ប៉ុន្តែប្រសិនបើតុលាការចាប់ផ្តើមបន្តនីតិវិធីរឿងក្តីរបស់គាត់ពេលណាឡើងវិញលោក ញឹក ប៊ុនឆៃ ត្រូវទៅបំពេញកាតព្វកិច្ចទៅតាមផ្លូវច្បាប់របស់តុលាការ។
លោក ហង្ស ពុទ្ធា មានប្រសាសន៍ថា៖ «[បើតុលាការបន្តនីតិវិធីកោះហៅ] គាត់ត្រូវចូលខ្លួនទៅដើម្បីដោះស្រាយទៅតាមនីតិវិធីរបស់តុលាការ។ បើកាលណាគាត់ស្ថិតក្នុងស្ថានភាពជាប់ពន្ធនាគារបានន័យថាគាត់ជាប់ខាងផ្លូវច្បាប់ គាត់មិនអាចធ្វើជាបេក្ខជនបានទេ។ បើសិនជាត្រូវកាត់ទោសហើយគាត់ត្រូវវិលត្រឡប់ទៅពន្ធនាគារវិញ»។
លោកបន្តថាការទទួលស្គាល់លោក ប៊ុនឆៃ ជាបេក្ខភាពគឺដោយសារតែលោកមិនទាន់មានការសម្រេចពីសាលក្រមរបស់តុលាការកំពូលនៅឡើយ បើទោះបីជានីតិវិធីរបស់តុលាការដំបូងបាននិងកំពុងបន្តក៏ដោយ។
លោក ជិន ម៉ាលីនអ្នកនាំពាក្យក្រសួងយុត្តិធម៌ថ្លែងស្រដៀងគ្នានេះដែរថា លោក ញឹក ប៊ុនឆៃ អាចនឹងត្រូវកោះហៅមកសួរចម្លើយឡើងវិញ នៅពេលណាក៏បានឲ្យតែតុលាការរកឃើញថាលោកជាប់ពាក់ព័ន្ធក្នុងសំណុំរឿងដូចការចោទប្រកាន់។
លោក ជិន ម៉ាលីន បានថ្លែងថា៖ «ដំណាក់កាលចោទប្រកាន់ស្ថិតក្នុងដំណើរការនៃការស៊ើបអង្កេតរបស់ចៅក្រមស៊ើបសួរ។ អ៊ីចឹងចៅក្រមស៊ើបសួរដាក់ឲ្យគាត់នៅក្រៅឃុំបណ្តោះអាសន្ន។ ក្នុងដំណាក់កាលហ្នឹង តុលាការអាចកោះហៅគាត់មកវិញ ឬបន្តនីតិវិធីទៀតបានគ្រប់ពេលវេលាទាំងអស់»។
លោក ញឹក ប៊ុនឆៃ ត្រូវបានចោទប្រកាន់ និងចាប់ខ្លួនកាលពីខែសីហាឆ្នាំ ២០១៧ ពាក់ព័ន្ធនឹងសំណុំរឿងថាលោកបានឃុបឃិតក្នុងការបង្កើតទីតាំង និងផលិតគ្រឿងញៀនដ៏ធំនៅតំបន់ត្រែងត្រយឹង ខេត្តកំពង់ស្ពឺដែលករណីនេះបានកើតឡើងតាំងពីប្រមាណ ១០ ឆ្នាំមុនមកម្ល៉េះ។ ក៏ប៉ុន្តែករណីនេះត្រូវបានគេចាប់ផ្តើមសើរើបន្តនីតិវិធីកាលពីឆ្នាំមុនក្រោយពីលោក ញឹក ប៊ុនឆៃ ត្រូវបានសង្ស័យថាលួចទាក់ទងជាមួយនឹងថ្នាក់ដឹកនាំរបស់អតីតគណបក្សសង្គ្រោះជាតិដែលជាបក្សប្រឆាំងដ៏ធំនៅកម្ពុជារបស់លោក កឹម សុខា ដែលក៏កំពុងជាប់ពន្ធនាគារក្នុងអំឡុងពេលបោះឆ្នោតឃុំ សង្កាត់ កាលពីខែមិថុនា ឆ្នាំ២០១៧។ កាលនោះអតីតបក្សប្រឆាំងបានឈ្នះកៅអីឃុំសង្កាត់ជិត ៥០០ កៅអី និងកៅអីក្រុមប្រឹក្សាឃុំសង្កាត់ជាង ៥០០០ កៅអី។ ដោយឡែក គណបក្សខ្មែររួបរួមជាតិរបស់លោក ញឹក ប៊ុនឆៃ ឈ្នះបានកៅអីមេឃុំមួយក្នុងខេត្តបន្ទាយមានជ័យ និងកៅអីក្រុមប្រឹក្សា ឃុំ សង្កាត់ជាច្រើនទៀត។
លោកមេធាវី សុក សំអឿន ចាត់ទុកការជាប់ពន្ធនាគាររបស់លោក ញឹក ប៊ុនឆៃ គឺគ្រាន់តែជាការឃុំខ្លួនបណ្តោះអាសន្នក្រោយពីលោកត្រូវបានចោទប្រកាន់តែប៉ុណ្ណោះ ហើយថាលោកនៅមានសិទ្ធិគ្រប់បែបយ៉ាង៕