ភ្នំពេញ៖ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានស្នើឱ្យគ្រប់អភិបាលរាជធានី-ខេត្ត ត្រូវត្រៀមបម្រុងបង្កើតក្រុមគ្រូពេទ្យថែទាំ និងព្យាបាលនៅតាមផ្ទះសម្រាប់អ្នកជំងឺកូវីដ។
យោងតាមលិខិតរបស់លោក ម៉ម ប៊ុនហេង នៅថ្ងៃអង្គារ ទី ០៦ ខែ មេសា ឆ្នាំ ២០២១ នេះ បានឱ្យដឹងថា ដើម្បីជួយសម្រាលបន្ទុកមន្ទីរពេទ្យរដ្ឋនានាក្នុងរាជធានី-ខេត្ត ក្រសួងស្នើឲ្យត្រៀមបម្រុងបង្កើតក្រុមគ្រូពេទ្យថែទាំ និងព្យាបាលនៅតាមផ្ទះ សម្រាប់អ្នកជំងឺកូវីដ ១៩ ដែលគ្មានរោគសញ្ញា និងករណីជំងឺស្រាល ក្នុងលក្ខខណ្ឌដែលមានការរាតត្បាតធ្ងន់ធ្ងរជាយថាហេតុ ដែលហួសពីចំណុះនៃមន្ទីរពេទ្យរដ្ឋ ឬកន្លែងព្យាបាលដែលតាមរាជធានី-ខេត្ត បានរៀបចំរួចជាស្រេចហើយ។
លោក ម៉ម ប៊ុនហេង ថា៖ «ការត្រៀមបម្រុងនេះ ត្រូវយកក្រុមគ្រូពេទ្យនៅតាមមូលដ្ឋានសុខាភិបាលផ្ទាល់របស់ខ្លួន ដោយរៀបចំជាក្រុម និងដឹកនាំដោយប្រធានការិយាល័យសុខាភិបាលស្រុកប្រតិបត្តិ»។
រដ្ឋមន្រ្តីរូបនេះបានបន្ថែមថា ក្រសួងនឹងធ្វើការបណ្តុះបណ្តាលក្រុមគ្រូពេទ្យទាំងនោះ ដោយអនុវត្តន៍តាមនីតិវិធីប្រតិបត្តិស្តង់ដា (SOP) ដែលក្រសួងនឹងរៀបចំជូន។
គួរបញ្ជាក់ផងដែរថា ការត្រៀមបម្រុងនេះ តបតាមអនុសាសន៍របស់លោកនាយករដ្ឋមន្រ្តី ហ៊ុន សែន ដែលបានស្នើឱ្យមានការត្រៀមរៀបចំទុកជាមុនក្នុងករណីដែលការឆ្លងវីរុសកូវីដ ១៩ ក្នុងសហគមន៍នេះមិនមានការថមថយ៕