ភ្នំពេញ៖ លោកនាយករដ្ឋមន្ត្រី ហ៊ុន សែន បញ្ជាឱ្យក្រសួងចំនួន ៣ ត្រូវកាត់ឆ្វៀលដីនៅក្នុងតំបន់ការពារផ្សេងៗ ដូចជាតំបន់ដែនជម្រកសត្វព្រៃជាដើមជូនពលរដ្ឋ ប្រសិនបើពួកគាត់ពិតជាអាស្រ័យផលជាក់ស្ដែង និងរស់នៅពិតប្រាកដលើដីនោះអស់រយៈពេលជាយូរឆ្នាំមកហើយ។ លោកក៏ព្រមានចាត់វិធានការផ្លូវច្បាប់ចំពោះអ្នកមានអំណាច និងលុយកាក់ដែលប្រើពលរដ្ឋទៅទន្ទ្រានដីព្រៃ។
ក្នុងកិច្ចប្រជុំពេញអង្គនៅទីស្ដីការគណៈរដ្ឋមន្ត្រីកាលពីថ្ងៃទី ៣ កក្កដា លោក ហ៊ុន សែន បានបញ្ជាឱ្យក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ត្រូវតែកាត់ឆ្វៀលដីជូនប្រជាពលរដ្ឋ ដែលបានរស់នៅ និងអាស្រ័យផលជាក់ស្ដែង អស់រយៈពេលជាង ១០-២០ ឆ្នាំមកហើយ ក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ។ ក្រសួងទាំង ៣ នេះត្រូវតែចេញប្លង់កម្មសិទ្ធិ ជូនពលរដ្ឋទាំងនោះ និងត្រូវធ្វើឱ្យបានហ្មត់ចត់ត្រឹមត្រូវក្នុងរយៈពេលប៉ុន្មានខែខាងមុខនេះ។
ទំព័រហ្វេសប៊ុករបស់លោកនាយករដ្ឋមន្ត្រីចេញផ្សាយពីម្សិលមិញថា៖ «រដ្ឋមានតែដីក្នុងផែនទីទេ តាមពិតមានបងប្អូនប្រជាពលរដ្ឋបានកសាងលំនៅឋានរស់នៅបង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ។ នេះជាការដោះស្រាយកង្វល់ជូនពលរដ្ឋពិតប្រាកដ។ កុំទុកប្រជាពលរដ្ឋឲ្យភ័យខ្លាច អត់ឃ្លាន រត់ទៅចំណាកស្រុកគេតទៅទៀត។ ទន្ទឹមនឹងនេះ សូមកុំឲ្យពលរដ្ឋពង្រីកថែមទៀត ព្រោះត្រូវការរក្សាទុកព្រៃសហគមន៍ខ្លះនៅជិតៗ ដើម្បីជាប្រយោជន៍សហគមន៍រស់នៅនៅផងដែរ»។
លោក ហ៊ុន សែន បញ្ជាក់ទៀតថា ពលរដ្ឋក្រៅពីទទួលបានដីពីការកាត់ឆ្វៀលតាមទំហំរស់នៅជាក់ស្តែង រដ្ឋនឹងបន្ថែមជូនផ្ទៃដី ១០% ដើម្បីប្រើប្រាស់ជាព្រៃរកអុស និងសម្រាប់សត្វគោក្របីស៊ីស្មៅជាដើម។ ចំពោះមន្ត្រីដែលកេងចំណេញយកពីការបែងចែកដីជូនពលរដ្ឋនៅពេលនេះ នឹងត្រូវទទួលទោសជាកំហិត។
លោកនាយករដ្ឋមន្ត្រីក៏សង្កេតឃើញថា កន្លងមកអ្នកមានអំណាច និងអ្នកមានទ្រព្យច្រើន ប្រើពលរដ្ឋតូចតាចឲ្យទៅកាប់រុករានទន្ទ្រានយកដីព្រៃឱ្យខ្លួន។ ក្នុងនោះ លោកក៏បានកំណត់អត្តសញ្ញាណក្រុមជនខិលខូចទៅទន្ទ្រានយកដីរដ្ឋក្នុង ១ យប់ ដែលអាចធ្វើខ្ទមពី ១០ ទៅ ២០ នៅលើទីតាំងដីទាំងនោះ។
លោកព្រមានថា អ្នកទាំងនោះនឹងត្រូវចាប់ខ្លួន ប្រសិនបើរកឃើញថា បានប្រព្រឹត្តដើម្បីរំលោភយកដីរដ្ឋពិតប្រាកដមែន។
លោកថា៖ «អ្នកមានអំណាច និងអ្នកមានទ្រព្យធនស្តុកស្តម្ភទាំងឡាយ ល្មមចេះឆ្អែត និងចេះគ្រប់គ្រាន់ហើយ ហើយឈប់ធ្វើបាបប្រជាពលរដ្ឋតទៅទៀត»។
កាលពីថ្ងៃម្សិលមិញ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានបញ្ជាក់ខ្លីថា ក្រសួងជំនាញកំពុងធ្វើបច្ចុប្បន្នភាពលើចំនួនពលរដ្ឋ ដែលបានរស់នៅ និងអាស្រ័យផលជាក់ស្ដែងនៅលើដី ដែលជាតំបន់ការពាររបស់រដ្ឋ ហើយនឹងអនុវត្តតាមបទបញ្ជារបស់នាយករដ្ឋមន្ត្រី។
កន្លងមកក្រសួងបរិស្ថានធ្លាប់បញ្ជាក់ថា ប្រទេសកម្ពុជា មានព្រៃឈើគ្របដណ្តប់ប្រមាណ ៥០% នៃផ្ទៃប្រទេស ដែលជាអត្រាខ្ពស់បំផុតនៅក្នុងតំបន់អាស៊ីអាគ្នេយ៍។ ក្នុងនោះមានចំនួនប្រហែល ៤១% គឺស្មើនឹងប្រមាណ ៧ លាន ៣ សែនហិកតា ត្រូវបានរដ្ឋាភិបាលបង្កើតផ្ទៃដីតំបន់ការពារធម្មជាតិ ដូចជាឧទ្យានជាតិ ដែនជម្រកសត្វព្រៃ តំបន់ប្រើប្រាស់ច្រើនយ៉ាង តំបន់រ៉ាមសារ តំបន់ការពារបេតិកភណ្ឌធម្មជាតិ និងរបៀងអភិរក្សជីវចម្រុះសរុបចំនួន ៦៩ កន្លែង ស្ថិតក្រោមការគ្រប់គ្រងរបស់ក្រសួងបរិស្ថាន។
លោក គ្រើង តុលា ជនជាតិដើមភាគតិចព្នង និងជាសកម្មជនការពារព្រៃឈើក្នុងខេត្តមណ្ឌលគិរី និយាយថា ការលើកឡើងរបស់លោក ហ៊ុន សែន នៅពេលនេះធ្វើឱ្យមានចំណុចអាក្រក់ច្រើនជាងចំណុចល្អ ព្រោះមិនបានបណ្តេញចេញចំពោះអ្នកដែលទៅរំលោភយកដីរដ្ឋពិតប្រាកដ។
លោកថា ការប្រកាសឱ្យកាត់ឆ្វៀលដីរបស់រដ្ឋនេះ នឹងជាឱកាសល្អសម្រាប់អ្នកមានអំណាច និងលុយកាក់ ដែលបានឃុបឃិតជាមួយអាជ្ញាធរមូលដ្ឋាន អាចទទួលបានសិទ្ធិកាន់កាប់ដី ដែលទទួលបានពីការទន្ទ្រានយកដីព្រៃ ដែលពួកគេបានប្រើប្រាស់គ្រឿងចក្រឈូសឆាយដីទាំងអស់កាលប៉ុន្មានឆ្នាំថ្មីៗនេះ ហើយបច្ចុប្បន្នបានប្រែក្លាយដីទាំងនោះទៅជាដីដែលអាស្រ័យផលជាក់ស្ដែង។
លោកថា៖ «ពួកគាត់កាប់គាស់ ហើយបានយកអាអ៊ិចទៅកាយគល់ឈើចេញអស់ ១ ឆ្នាំក្រោយមក ដីទាំងនោះ យើងមើលទៅហាក់ដូចជាដីគេប្រើប្រាស់ អស់ ១០ ទៅ ២០ ឆ្នាំ។ អ៊ីចឹង! នឹងធ្វើឱ្យក្រុមអ្នកមានលុយ និងអំណាចមានឱកាស ដើម្បីអះអាងថាពួកគេរស់នៅលើដីហ្នឹងតាំងពីឆ្នាំ ១៩៩០ អ៊ីចឹងមក ហើយអាជ្ញាធរគាំទ្រគ្នីគ្នារបស់ខ្លួនអ៊ីចឹងទៅ»។
លោកបានបន្តទៀតថា ចំពោះដីដែលប្រជាពលរដ្ឋអាស្រ័យជាក់ស្ដែងតាមបែបប្រពៃណីដែលនៅតែរក្សាគល់ឈើឱ្យនៅដដែល នឹងអាចត្រូវបានបណ្ដេញចេញ។ ចំណែកចំណុចល្អវិញ គឺលោក គ្រើង តុលា សង្ឃឹមថា នឹងអាចលែងមានហានិភ័យចំពោះពលរដ្ឋដែលរស់នៅក្នុងតំបន់ការពារមួយចំនួន ដូចជាតំបន់ដែនជម្រកសត្វព្រៃជាដើម ដែលអាជ្ញាធរតែងបណ្ដេញចេញ ដោយសារតែអះអាងថា ជាដីតំបន់ការពាររបស់រដ្ឋ៕
វីដេអូ៖