ភ្នំពេញៈ លោកនាយករដ្ឋមន្ត្រី ហ៊ុន សែន នៅថ្ងៃទី ៥ ខែមេសា បានផ្ញើលិខិតអបអរសាទរ លោក ង្វៀង សួនហ៊្វុក ដែលត្រូវបានតែងតាំងជាប្រធានាធិបតីថ្មីរបស់ប្រទេសវៀតណាម ហើយជាមួយគ្នានេះ លោកនាយករដ្ឋមន្ដ្រីបានប្ដេជ្ញាបន្តធ្វើការយ៉ាងជិតស្និទ្ធជាមួយនឹងអ្នកបន្តវេន ដើម្បីលើកកម្ពស់ភាពជាដៃគូយូរអង្វែងរវាងប្រទេសទាំង ២។
លោកនាយករដ្ឋមន្ដ្រីបានថ្លែងតាមរយៈលិខិតថា៖ «ខ្ញុំជឿជាក់ថា ទោះបីជានៅក្នុងពេលបច្ចុប្បន្ននេះ យើងមានតួនាទីផ្សេងគ្នាក៏ដោយទំនាក់ទំនងដ៏ស្និទ្ធស្នាលរបស់យើងនឹងនៅតែរឹងមាំ និងបន្តជាកត្តាជំរុញកិច្ចសហប្រតិបត្តិការរវាងប្រទេសយើងទាំង ២ ឱ្យកាន់តែមានវិសាលភាពធំធេងជាងមុន»។
លោកថ្លែងថា ការទទួលបាននូវតំណែងថ្មីនេះបានបង្ហាញអំពីជំនឿជឿជាក់ និងទំនុកចិត្តយ៉ាងខ្លាំងរបស់បក្សកុម្មុយនីស្ត និងប្រជាជនវៀតណាមទាំងមូលមកលើភាពជាអ្នកដឹកនាំដ៏វាងវៃរបស់លោក ង្វៀង សួនហ៊្វុក។
លោកនាយករដ្ឋមន្ដ្រីជឿជាក់ថា ក្រោមការគ្រប់គ្រង និងការដឹកនាំដ៏ឈ្លាសវៃរបស់លោក ង្វៀង សួនហ៊្វុក សាធារណរដ្ឋសង្គមនិយមវៀតណាមនឹងបន្តទទួលបាននូវការរីកចម្រើនផ្នែកសេដ្ឋកិច្ច និងសង្គមកាន់តែធំធេងថែមទៀត ឈានទៅសម្រេចបាននូវគោលដៅក្លាយទៅជាប្រទេសអភិវឌ្ឍន៍នៅឆ្នាំ ២០៤៥ និងបន្តបំពេញតួនាទីដ៏សកម្មទាំងនៅលើឆាកតំបន់ និងអន្តរជាតិ។
លោក ហ៊ុន សែន បានសម្តែងនូវអំណរអរគុណចំពោះលោក ង្វៀង សួនហ៊្វុក ដែលបានថែរក្សាពូនផ្តុំនូវចំណងមិត្តភាពជាប្រពៃណី និងធ្វើឲ្យកាន់តែសម្បូរបែបនូវកិច្ចសហប្រតិបត្តិការដ៏ជិតស្និទ្ធរបស់ប្រទេសទាំង ២ នៅក្នុងអាណត្តិលោកសួនហ៊្វុកជានាយករដ្ឋមន្ត្រី។
លោកបន្ដថា៖ «ខ្ញុំសូមអះអាងជាថ្មី នូវការប្តេជ្ញាចិត្តដ៏មុតមាំនឹងធ្វើការយ៉ាងជិតស្និទ្ធជាមួយនឹងអ្នកបន្តវេនរបស់ឯកឧត្តម ដើម្បីលើកកម្ពស់ភាពជាដៃគូយូរអង្វែងផ្អែកលើស្មារតីភាពជាអ្នកជិតខាងល្អ សាមគ្គីភាពការយោគយល់គ្នា និងកិច្ចសហប្រតិបត្តិការ ដែលមានផលប្រយោជន៍ទៅវិញទៅមក ជាពិសេសការជម្នះបាននូវបញ្ហាប្រឈមនានា ដែលមិនធ្លាប់បានជួបប្រទះកន្លងមក បណ្តាលមកពីការរាតត្បាតនៃជំងឺកូវីដ១៩»។
លោកនាយករដ្ឋមន្ដ្រីបញ្ជាក់ថា ការប្ដេជ្ញានេះគឺដើម្បីរួមចំណែកដល់សន្តិភាព ស្ថិរភាពការអភិវឌ្ឍប្រកបដោយចីរភាព និងវិបុលភាពរបស់ប្រជាជាតិនៃប្រទេសទាំង ២ តំបន់ និងសកលលោកទាំងមូល។
លោក ង្វៀង សួនហ៊្វុក អតីតនាយករដ្ឋមន្ត្រីវៀតណាមត្រូវបានសភាវៀតណាមបោះឆ្នោតជ្រើសតាំងជាប្រធានាធិបតីវៀតណាមនៅថ្ងៃទី ៥ ខែមេសាឆ្នាំ ២០២១ បន្ទាប់ពីលោកបានបញ្ចប់តំណែងជានាយករដ្ឋមន្ត្រី។ ការបោះឆ្នោតនេះបានធ្វើឡើងក្នុងសម័យប្រជុំលើកទី ១៤ នៃរដ្ឋសភាវៀតណាម។ នេះយោងតាម AFP ចេញផ្សាយកាលពីម្សិលមិញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាលើកឡើងថា ទំនាក់ទំនងរវាងប្រទេសកម្ពុជា និងវៀតណាមចាប់ពីក្រោយឆ្នាំ ១៩៧៩ មកគឺជាទំនាក់ទំនងបែបប្រពៃណី និងប្រវត្ដិសាស្ដ្រនៃអ្នកជិតខាងល្អ។ ប៉ុន្ដែក្នុងនាមជាប្រទេសជិតខាង គឺត្រូវគោរពអធិបតេយ្យភាព និងបូរណភាពទឹកដីគ្នាទៅវិញទៅមក។
លោកថ្លែងថា៖ «យើងឃើញថា តាមរយៈឯកសារ និងការអះអាងផ្លូវការគ្រប់ជំនាន់នៃមេដឹកនាំរវាងប្រទេសកម្ពុជា និងវៀតណាមទាំងក្របខ័ណ្ឌបក្ស និងក្របខ័ណ្ឌរដ្ឋ គឺថ្នាក់ដឹកនាំនៃប្រទេសទាំង ២ តែងតែប្ដេជ្ញាចិត្ដប្រឹងរឹតចំណងមិត្ដភាព និងកិច្ចសហប្រតិបត្ដិការនៃប្រទេសទាំង ២ ឱ្យកាន់តែរឹងមាំស៊ីជម្រៅគ្រប់ជ្រុងជ្រោយ»។
លោក គិន ភា សង្កេតឃើញថា ទំនាក់ទំនងរវាងប្រទេសកម្ពុជា និងវៀតណាមគ្មានសញ្ញាណាមួយធ្លាក់ចុះជាអវិជ្ជមាននោះទេ គឺនៅរក្សាភាពរឹងមាំដដែល ថ្វីបើប្រទេសទាំង ២ ជួបប្រទះបញ្ហាមិនប្រក្រតីខ្លះទៅលើបញ្ហាតំបន់។
លោកបានបញ្ជាក់ថា៖ «កម្ពុជាតែងតែចាត់ទុកប្រទេសជិតខាងជាប្រទេសដែលមានកិច្ចសហប្រតិបត្ដិការល្អទាំងនយោបាយ សេដ្ឋកិច្ច ជាពិសេសទំនាក់ទំនងរវាងប្រជាជន និងប្រជាជន»៕