.jpg)
លោក ឡាយ វណ្ណៈ នៅពេលដឹកចេញពីសាលាដំបូងរាជធានីភ្នំពេញកាលពីយប់មិញ។ ផា លីណា
ភ្នំពេញៈ នៅទីបំផុតមានមនុស្សចំនួន ៤ នាក់ដែលរួមមានលោក ឡាយ វណ្ណៈ អតីតអភិបាលខេត្តតាកែវ និងបងប្រុស ឡាយ ណារិទ្ធ អតីតស្នងការរងខេត្ត ត្រូវបានតុលាការធ្វើការចោទប្រកាន់កាលពីល្ងាចម្សិលមិញពីបទ «ឃាតកម្ម» និងពីបទ «លាក់បាំងតម្រុយ» ពាក់ព័ន្ធនឹងការស្លាប់ដ៏អាថ៌កំបាំងដែលត្រូវបានគេបំប្លែងទៅជាករណីអត្តឃាតកម្មទៅលើបុគ្គលិក រដ្ឋសភាអ្នកស្រី ចេវ សុវឌ្ឍនា កាលពីខែមករាក្រោយពីមានការបញ្ជាឲ្យសើរើសំណុំរឿងនេះឡើងវិញពីលោកនាយករដ្ឋមន្ត្រី ហ៊ុន សែន ។ នេះបើតាមមន្ត្រីតុលាការ និងអ្នកនាំពាក្យក្រសួងមហាផ្ទៃ។
ជនត្រូវចោទលោក ឡាយ វណ្ណៈ និងបងប្រុសរបស់លោកគឺលោក ឡាយ ណារិទ្ធ ត្រូវបានអយ្យការអមសាលាដំបូងរាជធានីភ្នំពេញចោទប្រកាន់ពីបទ «ឃាតកម្ម» ដែលទោសនេះតាមក្រមព្រហ្មទណ្ឌអាចប្រឈមមុខជាប់ពន្ធនាគាររហូតដល់ ១៥ ឆ្នាំបើតុលាការរកឃើញថាមានកំហុស។
ជនត្រូវចោទ ឈ្មោះ ម៉េន សាម៉ៃ និង ជឹម វុធ ត្រូវចោទពីបទ «លាក់បាំងតម្រុយ» ដែលអាចប្រឈមទោសដល់ទៅ ៣ ឆ្នាំបើតុលាការរកឃើញកំហុស។
លោក លី សុផាណា អ្នកនាំពាក្យអយ្យការសាលាដំបូងរាជធានីភ្នំពេញបានឲ្យដឹងកាលពីល្ងាចថ្ងៃម្សិលមិញថា៖ «អយ្យការបានសម្រេចបើកការស៊ើបសួរ ដោយចោទប្រកាន់ទៅលើឈ្មោះ ឡាយ វណ្ណៈ និងឈ្មោះ ឡាយ ណារិទ្ធ ពីបទឃាតកម្មតាមមាត្រា ១៩៩ នៃក្រមព្រហ្មទណ្ឌ ហើយចោទប្រកាន់ទៅលើឈ្មោះ ម៉េន សាម៉ៃ និងឈ្មោះ ជឹម វុធ ពីបទលាក់បាំងតម្រុយតាមមាត្រា ៥៣២ នៃក្រមព្រហ្មទណ្ឌ និងបានសម្រេចបញ្ជូនបុគ្គលទាំងនេះ និងសំណុំរឿងទៅចៅក្រមស៊ើបសួរ ដើម្បីចាត់ការបន្តតាមនីតិវិធី»។
ទោះយ៉ាងណាមនុស្ស ២ នាក់ទៀតមានឈ្មោះ ចាន់ រី (ប្រពន្ធ ជឹម វុធ) ដែលជាអ្នកបម្រើនៅផ្ទះអ្នកស្រី ចេវ សុវឌ្ឍនា និង តាក់ រតនា (អ្នកបើកឡានឲ្យ ឡាយ ណារិទ្ធ ដែលត្រូវបានសមត្ថកិច្ចឃាត់ខ្លួនតាំងពីចុងសប្តាហ៍មុនជាមួយលោក ឡាយ ណារិទ្ធ មិនទាន់ដឹងថាតុលាការបានធ្វើការចោទប្រកាន់ ឬបានសម្រេចធ្វើការដោះលែងនោះឡើយ។
លោក ឡាយ វណ្ណៈ ដែលគេដឹងថាមានភរិយាជាព្រះរាជអាជ្ញារង ខេត្តកណ្តាល និងត្រូវជាកូនប្រសាររបស់លោក ស៊ូ ភិរិន្ទ រដ្ឋលេខាធិការទីស្តីការគណៈរដ្ឋមន្ត្រីត្រូវបានចាប់ខ្លួនពីខេត្តតាកែវកាលពីថ្ងៃអាទិត្យទី ១ ខែមេសា និងបញ្ជូនភ្លាមៗមកកាន់ក្រសួងមហាផ្ទៃដោយសង្ស័យថាមានការពាក់ព័ន្ធនឹងការសម្លាប់ អ្នកស្រី សុវឌ្ឍនា ដែលជាស្រីកំណាន់របស់លោក វណ្ណៈ កាលពីយប់ថ្ងៃទី ២៦ នាខែមករាឆ្នាំ ២០១៨។ អ្នកស្រី ចេវ សុវឌ្ឍនា គឺជាមន្ត្រីនៅរដ្ឋសភាផ្នែកពិធីការដែលបន្ទាប់ពីការស្លាប់នោះរបាយការណ៍សមត្ថកិច្ចខេត្តតាកែវបានដាក់ថា អ្នកស្រី សុវឌ្ឍនា បានធ្វើអត្តឃាតដោយចងកសម្លាប់ខ្លួន។
លោក ឡាយ ណារិទ្ធ ជាអតីតស្នងការរងខេត្តតាកែវជាបងប្រុស និងមនុស្ស ៤ នាក់ផ្សេងទៀតមាន ២ នាក់ជាអ្នកបម្រើក្នុងផ្ទះអ្នកស្រី សុវឌ្ឍនា និង ២ នាក់ទៀតជាតៃកុងឡានលោក វណ្ណៈ និងលោក ណារិទ្ធ ត្រូវបានឃាត់ខ្លួនកាលពីចុងសប្តាហ៍មុនក្រោយសមត្ថកិច្ចក្រសួងមហាផ្ទៃបើកការស៊ើបអង្កេតឡើងវិញ លើករណីដែលគេសង្ស័យថាមិនមែនជាការធ្វើអត្តឃាតរបស់ជនរងគ្រោះនោះទេ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងកាលពីម្សិលមិញថា ដើមហេតុនៃការសើរើនូវករណីឃាតកម្មដែលបំប្លែងជាករណីអត្តឃាតដ៏អាថ៌កំបាំងតាំងពីខែមករាមកនេះគឺដោយសារមានបណ្តឹងសុំសើរើពីក្រុមគ្រួសារសព និងដោយសារមានបញ្ជាពីលោកនាយករដ្ឋមន្ត្រីផងដែរ។
លោក សុភ័គ បានថ្លែងថា៖ «សម្តេចនាយករដ្ឋមន្ត្រី និងសម្តេចក្រឡាហោម បានបញ្ជាឲ្យអគ្គស្នងការដ្ឋាន (នគរបាលជាតិ) សើរើឡើងវិញ»។ លោកបន្តថា លោក ឡាយ វណ្ណៈ និងបងប្រុសនៅតែបន្តបដិសេធនៅមុខការសាកសួររបស់សមត្ថកិច្ចហើយនៅតែថា នេះជាករណី «អត្តឃាត» បើទោះបីជាមានការឆ្លើយដាក់ពីអ្នកបើកបររបស់លោក និងអ្នកបម្រើជនរងគ្រោះក៏ដោយ។ អ្នកនាំពាក្យរូបនេះឲ្យដឹងថា៖ «ឡាយ វណ្ណៈ គាត់ប្រកែកថាមិនដឹងទេ... បងគាត់ប្រកែកថា មិនដឹងដែរ ថាជាករណីអត្តឃាតដែរ»។
លោក លី សុផាន់ណា បានសរសេរបង្ហោះតាមប្រព័ន្ធតេឡេក្រាមកាលពីយប់មិញថា បន្ទាប់ពីបានពិនិត្យឯកសារសំណុំរឿង និងកិច្ចពិភាក្សាដេញដោលចំពោះមុខរួចមក ចៅក្រមស៊ើបសួរបានសម្រេចឃុំខ្លួនបណ្តោះអាសន្នលើឈ្មោះ ឡាយ វណ្ណៈ និងឈ្មោះ ឡាយ ណារិទ្ធ ពីបទឃាតកម្មតាមមាត្រា ១៩៩ នៃក្រមព្រហ្មទណ្ឌ ហើយឈ្មោះ ម៉េន សាម៉ៃ និងឈ្មោះ ជឹម វុធ ពីបទលាក់បាំងតម្រុយតាមមាត្រា ៥៣២ នៃក្រមព្រហ្មទណ្ឌ និងបានបញ្ជូនបុគ្គលទាំងនេះទៅមណ្ឌលឃុំខ្លួនតាមនីតិវិធី។
នៅមុនពេលចាប់ខ្លួនលោក ឡាយ វណ្ណៈ បានបង្ហោះតាមហ្វេសប៊ុករបស់លោកថា លោកពិតជាមានទំនាក់ទំនងស្នេហាជាមួយនឹងស្ត្រីមេម៉ាយកូន ៣ ឈ្មោះ ចេវ សុវឌ្ឍនា ពិតមែនហើយលោកក៏បានបង្ហោះរូបថតស្និទ្ធស្នាលជាច្រើនសន្លឹកជាមួយស្ត្រីមេម៉ាយរូបនេះផងដែរ។ ទោះយ៉ាងណាលោកបានបដិសេធថាលោក និងបងប្រុសរបស់លោកមិនបានប្រព្រឹត្តអំពើមនុស្សឃាតនោះទេ ប៉ុន្តែលោកថា ការស្លាប់របស់នាង ចេវ សុវឌ្ឍនា គឺមកពីការធ្វើអត្តឃាតដែលលោកអះអាងថា នាងបានប៉ុនប៉ងសម្លាប់ខ្លួនជាច្រើនលើកមកហើយ។
កាលពីយប់ថ្ងៃទី ២៦ ខែមករា ឆ្នាំ ២០១៨ អ្នកស្រី ចេវ សុវឌ្ឍនា អាយុ ៣៦ ឆ្នាំ មានកូន ៣ នាក់ក្នុងបន្ទុកដែលជាបុគ្គលិកផ្នែកពិធីការនៅរដ្ឋសភាជាង ១០ ឆ្នាំមកហើយនោះត្រូវបានអ្នកបម្រើប្រទះឃើញចងកស្លាប់នៅក្នុងបន្ទប់ដេក នៅក្នុងផ្ទះវីឡាមួយកន្លែងនាភូមិផ្សារតាកោរ សង្កាត់រកាក្នុង ក្រុង ដូនកែវ ខេត្តតាកែវ៕
