.jpg)
សកម្មភាពចូលរួមពីផ្នែកពាក់ព័ន្ធនៅថ្ងៃបើកវគ្គបណ្ដុះបណ្ដាលដល់គិលានុបដ្ឋាក និងនិស្សិត។ រូបថត សហការី
ភ្នំពេញៈ វិស័យឯកជន ក្រសួងសុខាភិបាល និងសាកលវិទ្យាល័យពុទ្ធសាស្ដ្រ កាលពីថ្ងៃពុធទី ៦ ខែវិច្ឆិកា បានសហការគ្នាបើកវគ្គ «ការបណ្ដុះបណ្ដាលជំនាញគិលានុបដ្ឋាក ការគ្រប់គ្រងថែទាំអ្នកជំងឺ» ដល់បុគ្គលិកជាគិលានុបដ្ឋាកមកពីស្ថាប័នរដ្ឋ និងនិស្សិតនៅសាកលវិទ្យាល័យនានារយៈពេល ៦ ខែ គិតចាប់ពីឆ្នាំក្រោយទៅ ដើម្បីផ្ដល់ជំនាញបន្ថែមទៀតដល់ពួកគេ ។
តាមសេចក្ដីប្រកាសព័ត៌មានស្ដីពីការបើកវគ្គបណ្ដុះបណ្តាលនេះបានបង្ហាញថា ការបណ្ដុះបណ្ដាលនេះធ្វើឡើងដោយក្រុមហ៊ុនថែទាំសុខភាពចល័តម៉ាច់ (MUCH Mobile Health Care) ដែលជាក្រុមហ៊ុនក្នុងស្រុកបង្កើតឡើងដោយកូនខ្មែរ និងកំពុងបម្រើសេវាថែទាំចាស់ជរា អ្នកជំងឺរ៉ាំរ៉ៃ អ្នកជំងឺដែលសម្រាកនៅមន្ទីរពេទ្យ និងថែទាំក្រោយចេញពីមន្ទីរពេទ្យ ដូចជាថែទាំមាតុភាពដល់គេហដ្ឋាន និងពិគ្រោះព្យាបាលជំងឺដោយវេជ្ជបណ្ឌិតជំនាញជាដើម។
លោក អ៊ុន សាន ប្រធានគណៈគិលានុបដ្ឋាកកម្ពុជានៃក្រសួងសុខាភិបាលថ្លែងថា ការផ្ដើមបង្កើតការបណ្ដុះបណ្ដាលនេះគឺជាឆន្ទៈ និងការប្តេជ្ញាចិត្តយ៉ាងមុតមាំរបស់គិលានុបដ្ឋាកក្នុងការចូលរួមចំណែកអភិវឌ្ឍជំនាញវិជ្ជាជីវៈសំដៅធ្វើឲ្យមានការរីកចម្រើននៅក្នុងសង្គមជាតិតាមរយៈការចូលរួមដោះស្រាយបញ្ហាសុខភាពចម្បងៗដែលកំពុងប្រឈមដូចជា កំណើននៃជំងឺមិនឆ្លង ការបង្ករោគ ជំងឺមនុស្សចាស់ជរា និងបញ្ហាកង្វះកម្លាំងពលកម្មគិលានុបដ្ឋាកនៅពេលបច្ចុប្បន្នក៏ដូចជាថ្ងៃអនាគតក្នុងប្រទេសក្នុងតំបន់ និងនៅទូទាំងពិភពលោកផងដែរ។
លោកបានថ្លែងថា៖« គិលានុបដ្ឋាកគឺជាកម្លាំងពលកម្មធំជាងគេដែលមានចំនួន ៦០ ភាគរយ នៅក្នុងប្រព័ន្ធសុខាភិបាលនៃប្រទេសកម្ពុជាទាំងមូល។ គិលានុបដ្ឋាកក៏ជាកម្លាំងចលកររបស់ក្រសួងសុខាភិបាលដែលជាអ្នកជំរុញឲ្យមានប្រសិទ្ធភាព ប្រសិទ្ធផលក្នុងការផ្តល់សេវាថែទាំប្រកបដោយគុណភាព និងលើកកម្ពស់សុខភាពអ្នកជំងឺ និងប្រជាពលរដ្ឋ»។
លោក អ៊ុន សាន បានបញ្ជាក់ថា៖ «ការបណ្តុះបណ្តាលនេះបានផ្សារភ្ជាប់តម្រូវការវិជ្ជាជីវៈសំដៅបង្កើនកម្រិតនៃជំនាញវិជ្ជាជីវៈថែទាំរបស់គិលានុបដ្ឋាកដើម្បីឆ្លើយតបតាមតម្រូវការជាក់ស្តែងក្នុងការដោះស្រាយបញ្ហាកង្វះខាតធនធានគិលានុបដ្ឋាកនៅកម្ពុជានាពេលបច្ចុប្បន្ន»។
លោកបានអះអាងថា ប្រព័ន្ធសុខាភិបាលកម្ពុជា និងពិភពលោកមិនអាចទទួលជោគជ័យបានឡើយ បើគ្មានគិលានុបដ្ឋាក និងការចូលរួមយ៉ាងសកម្មពីពួកគេក្នុងការងារគ្រប់កម្រិតនៃប្រព័ន្ធសុខាភិបាល។ គិលានុបដ្ឋាកគឺជាអ្នកនៅជាប់ជាមួយអតិថិជន និងពលរដ្ឋគ្រប់កម្រិតនៃគ្រឹះស្ថានថែទាំសុខភាពគ្រប់ស្រទាប់សង្គម។
លោក ប៉ិច សុភា ប្រធានចាត់ការទូទៅក្រុមហ៊ុនថែទាំសុខភាពចល័តម៉ាច់បានថ្លែងថាវគ្គបណ្ដុះបណ្ដាលនេះធ្វើឡើងរយៈពេល ៦ ខែ ដើម្បីផ្តល់ចំណេះដឹង និងជំនាញពិតប្រាកដដល់សិក្ខាកាមដែលជាការឆ្លើយតបនឹងតម្រូវការលើជំនាញនេះនាពេលបច្ចុប្បន្ន និងអនាគតក្នុងវិស័យសុខាភិបាល។
លោកថ្លែងថា៖ «ប្រទេសយើងមានច្បាប់ ព្រះរាជក្រមស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល អនុលោមតាមច្បាប់នេះ គណៈគិលានុបដ្ឋាកមានតួនាទីជានិយតករក្នុងការបង្កើតលក្ខខណ្ឌតម្រូវនានាសម្រាប់អ្នកវិជ្ជាជីវៈ និងអ្នកប្រកបវិជ្ជាជីវៈសុខាភិបាលក្នុងការផ្តល់សេវាប្រកបដោយសុវត្ថិភាព»។
យ៉ាងណាក្ដីលោក ប៉ិច សុភា បានអះអាងថាបច្ចុប្បន្នការចុះឈ្មោះចូលរៀនរបស់និស្សិតកម្ពុជានៅមានកម្រិតតិចតួចនៅឡើយ ខណៈវិជ្ជាជីវៈនេះកំពុងមានតម្រូវការច្រើន ។
លោក សុភា បានបញ្ជាក់ថា៖ «យើងជាក្រុមហ៊ុនឯកជន យើងធ្វើទៅគឺមានការគាំទ្រពីអតិថិជនច្រើនមានទាំងក្នុងស្រុក និងក្រៅស្រុក។ យើងផ្តល់សេវាគឺគុណភាពរបស់យើងត្រូវបានគេទទួលស្គាល់។ ដូច្នេះយើងបានជជែកជាមួយសាកលវិទ្យាល័យពុទ្ធិសាស្ត្រដើម្បីយកបទពិសោធនៃការអនុវត្តល្អៗបញ្ចូលទៅក្នុងកម្មវិធីសិក្សាដើម្បីឲ្យការអប់រំរបស់យើងឆ្លើយតបទៅនឹងតម្រូវការជាក់ស្តែង»។
បើតាមលោក សុភា វគ្គបណ្ដុះបណ្ដាលនេះនឹងចាប់ផ្ដើមនៅដើមឆ្នាំ ២០២០ ដោយក្នុង ១ វគ្គមានរយៈពេល ៦ ខែ ដែលត្រូវការនិស្សិតពី ៦០ ដល់ ១០០ នាក់។ រីឯការសិក្សានឹងដំណើរការនៅថ្ងៃសៅរ៍-អាទិត្យ ចុងសប្ដាហ៍ ។ លោកបន្តថា សិក្ខាកាមដែលបញ្ចប់ការសិក្សា និងមានសមត្ថភាពពេញលេញអាចធ្វើការជាមួយក្រុមហ៊ុនថែទាំសុខភាពចល័តម៉ាច់ ឬដៃគូរបស់ក្រុមហ៊ុនទាំងក្នុងប្រទេស និងក្រៅប្រទេស ហើយថែមទាំងអាចទៅធ្វើការនៅតាមស្ថាប័នរដ្ឋផ្សេងៗទៀតផងដែរ៕
