រតនគិរីៈ សកម្មជនព្រៃឈើម្នាក់ដែលអះអាងថា ត្រូវបានគេព្រួតវាយបណ្តាលឲ្យរងរបួសយ៉ាងដំណំនៅក្នុងវេទិកាសាធារណៈមួយ ដែលរៀបចំឡើងដោយអាជ្ញាធរស្រុកលំផាត់បានឡើងមកព្យាបាលរបួសនៅភ្នំពេញ។ ការអះអាងនេះត្រូវបានអាជ្ញាធរបដិសេធ ប៉ុន្តែមន្ត្រីសង្គមស៊ីវិលស្នើឱ្យថ្នាក់ជាតិចុះស្រាវជ្រាវករណីនេះ។
លោក ឆន ផល្លា ដែលជាសកម្មជនការពារព្រៃឈើជនជាតិដើមភាគតិចទំពួននៅភូមិសមុទ្រក្រោម ឃុំសេដា ស្រុកលំផាត់បានប្រាប់ភ្នំពេញប៉ុស្ដិ៍នៅថ្ងៃ ១៣ កក្កដា ថា កាលពីថ្ងៃទី ៩ ខែកក្កដា លោកត្រូវបានក្រុមគ្រួសារនាំចេញពីមន្ទីរពេទ្យខេត្ត ដើម្បីមកបន្តសម្រាកព្យាបាលនៅមន្ទីរពេទ្យឯកជនមួយនៅទីក្រុងភ្នំពេញ ក្រោយពីរូបលោកត្រូវក្រុមពលរដ្ឋជាច្រើននាក់ព្រួតគ្នាវាយដំឱ្យរងរបួសធ្ងន់នៅក្នុងវេទិកាសាធារណៈមួយដែលរៀបចំឡើងដោយរដ្ឋបាលស្រុកលំផាត់កាលពីថ្ងៃទី ៨ ខែកក្កដា។
លោក ផល្លា បញ្ជាក់ថា នៅពេលលោកបានឡើងថ្លែងអំពីទុក្ខកង្វល់របស់លោកពាក់ព័ន្ធនឹងការបាត់បង់ព្រៃឈើនៅក្នុងវេទិកានេះ គឺស្រាប់តែមានក្រុមពលរដ្ឋដែលលោកធ្លាប់ប្ដឹងពីបទបំផ្លាញព្រៃឈើ និងទន្ទ្រានដីរដ្ឋ ដោយមានការឃុបឃិតគ្នាជាប្រព័ន្ធជាមួយអាជ្ញាធរក្នុងស្រុកគឺបាននាំគ្នាព្រួតវាយរូបលោករហូតស្ទើរដួលសន្លប់នៅនឹងកន្លែង ហើយគ្មានមន្ត្រីណាមួយនៅក្នុងវេទិកានោះជួយហាមឃាត់ឡើយ។
លោកថា៖ «ខ្ញុំក៏ជាពលរដ្ឋ និងមានសិទ្ធិចូលរួមដែរ ដោយបានចុះវត្តមានចូលរួមវេទិកា និងមានអ្នកឱ្យក្បាលមេក្រូនិយាយទៀតផង។ អ្នកវ៉ៃគឺជាអ្នកដែលខ្ញុំធ្លាប់ប្ដឹងចាប់ពីឆ្នាំ ២០១៧ មកពាក់ព័ន្ធបទល្មើសព្រៃឈើ និងការយកដីព្រៃរដ្ឋលក់ ដូចជាដីក្នុងដែនជម្រកសត្វព្រៃ ដីកប់សព ដីតំបន់ទេសចរណ៍និងដីសហគមន៍ដែលជាទ្រព្យសម្បត្តិរបស់ជនជាតិដើមភាគតិច ប៉ុន្តែត្រូវបានលក់ដូរឱ្យក្លាយជាសម្បត្តិរបស់បុគ្គលអស់ហើយ»។
លោកបន្ថែមថា៖ «នៅពេលគេវ៉ៃហ្នឹង ខ្ញុំខំរត់ទៅកាន់អាជ្ញាធរឱ្យជួយហើយបានទៅដល់កន្លែងរបស់អភិបាលស្រុកលោក នូ ថេរ ឱ្យជួយ។ ប៉ុន្តែនៅពេលរត់ទៅដល់កន្លែងលោក នូ ថេរ គាត់បានសួរថា តើអ្នកណាឱ្យខ្ញុំប្ដឹង? ហើយខ្ញុំបានរៀបរាប់ថាខ្ញុំប្ដឹងតាមផ្លូវច្បាប់។ ក្រោយមកក៏មានគេ (ពលរដ្ឋ) មកវ៉ៃ និងដកទូរស័ព្ទទៀតហើយម្ដងហ្នឹង គឺខ្ញុំបានដេកដួលលើដីនៅនឹងមុខលោក នូ ថេរ ហ្នឹង»។
លោកបញ្ជាក់ទៀតថា នៅពេលដួលលោកបានខំប្រឹងដោយខ្លួនឯង ដើម្បីងើប និងរកផ្លូវរត់ចេញពីកន្លែងដែលមានការព្រួតវាយ ដើម្បីជិះម៉ូតូមកផ្ទះវិញ។ នៅពេលទៅដល់ផ្ទះបានមួយសន្ទុះ ដើម្បីឱ្យប្រពន្ធដាំទឹកថ្នាំផឹក កុំឱ្យគ្រាំក្នុង ស្រាប់តែមានប៉ូលិសប៉ុស្ដិ៍ និងពលរដ្ឋជាច្រើននាក់បាននាំគ្នាទៅព័ទ្ធផ្ទះរបស់លោកថែមទៀត។
សកម្មជនដដែលនេះអះអាងថា ការមកសម្រាកព្យាបាលរបួសនៅភ្នំពេញគឺដោយសារលោកមានជំងឺប្រចាំកាយផង គឺជំងឺទឹកនោមផ្អែម និងជំងឺលើសឈាម ហើយក្រោយពីពេទ្យចាក់ថ្នាំ និងព្យួរសេរ៉ូមគឺលោកអាចចាប់ផ្ដើមនិយាយបានឡើងវិញ ប៉ុន្តែនៅពុំទាន់អាចដើរបានស្រួលដូចមុននៅឡើយ ខណៈខ្លួនប្រាណលោកនៅមានស្នាមជាំ និងហើម។
លោក ផល្លា អះអាងទៀតថា នៅក្រោយពីមានករណីហិង្សានេះគឺបានធ្វើឱ្យសកម្មជនការពារព្រៃឈើចំនួន ៧ នាក់ផ្សេងទៀត ដែលរស់នៅក្នុងឃុំជាមួយលោកដែលសហការដាក់ពាក្យប្ដឹងបរិហាររឿងបាត់បង់ព្រៃឈើបានរត់ភៀសខ្លួនចេញពីផ្ទះ ដើម្បីទៅលាក់ខ្លួននៅទីរួមខេត្ត ដោយសារភ័យខ្លាចរងការវាយដំដូចរូបលោក។
លោក ខាំ លោក សកម្មជនព្រៃឈើម្នាក់ដែលរត់គេចខ្លួនថ្លែងថា ការរត់គេចខ្លួននេះគឺ ១ ថ្ងៃបន្ទាប់ពីដឹងថា លោក ឆន ផល្លា ត្រូវបានគេព្រួតវាយ និងបន្ទាប់ពីមានប្រជាការពារភូមិ ៦ នាក់ បានចុះទៅឃ្លាំមើលដល់ផ្ទះរបស់លោក។ ប៉ុន្តែលោកបញ្ជាក់ថា មកដល់ពេលនេះលោកបានសម្រេចចិត្តត្រឡប់មកផ្ទះវិញហើយ ក្រោយពីទទួលបានដំណឹងពីគ្រួសារថា លែងមានអ្នកចុះទៅឃ្លាំមើលដល់ផ្ទះដូចមុន។
ទោះជាយ៉ាងណាលោក នូ ថេរ អភិបាលស្រុកលំផាត់បានបដិសេធការលើកឡើងរបស់លោក ឆន ផល្លា និងបានបញ្ជាក់ថា ប្រជាពលរដ្ឋពុំបានវាយសកម្មជនរូបនេះឱ្យរងរបួសឡើយ ហើយសកម្មជនរូបនេះបានរត់មកស្នាក់នៅភ្នំពេញជាមួយមន្ត្រីសមាគមអាដហុកប៉ុណ្ណោះ។ លោកថា៖ «វាហ្នឹងសម្ភាសន៍ថា វាត្រូវបានប្រជាពលរដ្ឋវ៉ៃវាបាក់ជើងហើយមើលវាបាក់ជើងអត់ តែការពិតវារត់ភៀសខ្លួនទៅនៅជាមួយ ប៉ែន ប៊ុណ្ណារ៍ (មន្ត្រីអាដហុក) នៅភ្នំពេញ»។
កាលពីថ្ងៃទី ៨ ខែកក្កដា លោក នូ ថេរ បានធ្វើលិខិតប្រាប់ទៅលោក ថង សាវុន អភិបាលខេត្តរតនគិរីថា លោក ឆន ផល្លា បានចូលមកក្នុងវេទិកាដោយគ្មានការអញ្ជើញ ហើយបាននិយាយខុសពីប្រធានបទ អុកឡុកបង្កការរំខានក្នុងវេទិកា និងថតបង្ហោះគ្មានការអនុញ្ញាត ហើយនៅពេលអាជ្ញាធរឃាត់មិនព្រមស្ដាប់ទើបប្រជាពលរដ្ឋបាននាំគ្នាដកហូតទូរស័ព្ទមករក្សាទុក។
ចំណែកលិខិតរបស់ស្នងការនគរបាលខេត្តរតនគិរីផ្ញើមកអគ្គស្នងការនគរបាលជាតិបានបញ្ជាក់ដែរថា លោក ផល្លា បានឡើងនិយាយក្នុងវេទិកាបរិហារកេរ្តិ៍ចោទប្រកាន់ពលរដ្ឋ និងអាជ្ញាធរធ្វើឱ្យពលរដ្ឋខឹងសម្បាងើបតវ៉ា បង្កឱ្យមានភាពច្របូកច្របល់ក្នុងពិធីហើយត្រូវអាជ្ញាធរឃាត់រារាំងដើម្បីរៀបចំសណ្ដាប់ធ្នាប់ឡើងវិញ។
ទោះជាយ៉ាងលោក លោក ស៊ឹង សែនករុណា អ្នកនាំពាក្យសមាគមអាដហុកបានថ្លែងថា តាមចម្លើយពីប្រជាពលរដ្ឋដែលចូលរួមក្នុងវេទិកានោះ និងសុំលាក់អត្តសញ្ញាណបានអះអាងថា ពួកគាត់ពិតជាបានឃើញមានការព្រួតវៃទៅលើលោក ឆន ផល្លា មែន ហើយបច្ចុប្បន្នក្រុមការងាររបស់សមាគមអាដហុកកំពុងប្រមូលព័ត៌មានបន្ថែមទៀតអំពីករណីហិង្សានេះ។
លោកថ្លែងថា ក្នុងនាមជាសហគមន៍លោក ឆន ផល្លា គឺបានដាក់បណ្ដឹងបរិហារតាមផ្លូវច្បាប់ ដើម្បីឱ្យអាជ្ញាធរពាក់ព័ន្ធដែលមានតួនាទីទទួលខុសត្រូវក្នុងការបំពេញតួនាទីរបស់ខ្លួនឱ្យបានត្រឹមត្រូវ ដោយមិនត្រូវបណ្ដែតបណ្ដោយឱ្យមានការបំផ្លិចបំផ្លាញព្រៃឈើ ដីសាធារណៈរបស់រដ្ឋ ឬដីសហគមន៍ជាដើម។
លោកបន្តថានៅពេលមានការប្រើអំពើហិង្សាក្រៅច្បាប់ទៅលើសហគមន៍វិញបែបនេះ វាគឺជារឿងមួយធ្វើឱ្យមានការសោកស្ដាយយ៉ាងខ្លាំង។
លោកថា៖ «អ៊ីចឹង! យើងអំពាវនាវឱ្យថ្នាក់ជាតិកុំជឿតែរបាយការណ៍ពីថ្នាក់ក្រោមជាតិពេក ហើយគួរតែមានការចុះធ្វើការស្រាវជ្រាវឱ្យបានច្បាស់ ព្រោះរឿងរ៉ាវទាំងនេះ យើងពិនិត្យឃើញថា មានភាពមិនប្រក្រតីច្រើន ហើយកើតឡើងស្ទើរជាប្រព័ន្ធទៅហើយនៅក្នុងតំបន់ហ្នឹងដែលគួរមានការស្រាវជ្រាវឱ្យបានស៊ីជម្រៅដើម្បីរកយុត្តិធម៌ដល់ភាគី (ជនត្រូវគេវាយ) ចៀសវាងគ្រាន់តែទទួលបានរបាយការណ៍តែពីថ្នាក់ក្រោម...»។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា លោកពុំទាន់បានទទួលរបាយការណ៍ស្ដីអំពីការប្រើអំពើហិង្សានេះនៅឡើយ ដូច្នេះលោកមិនអាចធ្វើការបកស្រាយបានទេ៕