ភ្នំពេញៈ សមត្ថកិច្ចនគរបាលរាជធានីភ្នំពេញកំពុងស៊ើបអង្កេតរកអត្តសញ្ញាណជនល្មើសពាក់ព័ន្ធករណីបើករថយន្តស៊េរីទំនើបបុកយុវតីជាសិស្សសាលាស្លាប់ ២ នាក់នៅសង្កាត់កោះដាច់ ខណ្ឌជ្រោយចង្វារកាលពីយប់ថ្ងៃទី ១១ ធ្នូ ឆ្នាំ ២០១៩ ខណៈក្រុមគ្រួសារជនរងគ្រោះក៏បានស្វែងរកអន្តរាគមន៍ពីលោកនាយករដ្ឋមន្ត្រី ហ៊ុន សែន ផងដែរ។
លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានប្រាប់ភ្នំពេញ-ប៉ុស្តិ៍ពីម្សិលមិញថា ករណីគ្រោះថ្នាក់ចរាចរណ៍នោះសមត្ថកិច្ចរបស់លោកកំពុងបន្តស្រាវជ្រាវយ៉ាងយកចិត្តទុកដាក់ ដើម្បីកំណត់អត្តសញ្ញាណជនល្មើស បន្ទាប់ពីជននោះបើករថយន្តបុកជនរងគ្រោះហើយរត់គេចខ្លួន។
លោកបានបញ្ជាក់ថា៖ «រឿងហ្នឹងកម្លាំងសមត្ថកិច្ចជំនាញរបស់លោកកំពុងបើកការស្រាវជ្រាវហើយ»។
រីឯលោក សៀម សុត្ថាវុធ អធិការនគរបាល ខណ្ឌជ្រោយចង្វារប្រាប់ពីម្សិលមិញដែរថា បញ្ហាគ្រោះថ្នាក់ចរាចរណ៍នេះកំពុងបង្កឲ្យមានភាពរំជើបរំជួលដោយមានប្រព័ន្ធផ្សព្វផ្សាយខ្លះចុះផ្សាយបំផ្លើសខ្លាំងពេក ប៉ុន្តែគ្រោះថ្នាក់ចរាចរណ៍នោះក្មេងរងគ្រោះដួលបោកក្បាលស្លាប់ទេ។
លោកបានប្រាប់ថា៖ «សារព័ត៌មានដែលចុះពីបញ្ហាគ្រោះថ្នាក់ចរាចរណ៍នោះមើលទៅដូចជាមិនសមរម្យទេ។ គ្មានភ័ស្តុតាងណាដែលត្រូវចោទប្រកាន់គេទេ...»។
លោក សៀម សុត្ថាវុធ បញ្ជាក់ថា ការចុះផ្សាយរបស់អ្នកសារព័ត៌មាននោះគ្មានមូលដ្ឋានណាច្បាស់លាស់ទេ ហើយមុនចុះផ្សាយគឺគាត់មិនបានសួរព័ត៌មានពីសមត្ថកិច្ចទេ។
លោកថ្លែងថា៖ «ពួកខ្ញុំធ្វើការងារនេះផ្ទាល់តែគាត់អត់បានសួរពួកខ្ញុំទេ»។
ប៉ុន្តែបើតាមសារព័ត៌មានក្នុងស្រុកដែលបានដកស្រង់សម្ដីសាក្សីនៅកន្លែងកើតហេតុឲ្យដឹងថាកាលពីម៉ោងប្រមាណជា ៧ យប់ថ្ងៃទី ១១ ខែធ្នូ ឆ្នាំ ២០១៩ យុវតីឈ្មោះ ខេន កូរ៉ា អាយុ ១៣ ឆ្នាំរៀននៅថ្នាក់ទី ៨ និងឈ្មោះ ភ័ណ្ឌ ភីរ៉ាដា អាយុ ១២ ឆ្នាំ ជាសិស្សរៀននៅថ្នាក់ទី ៧ នៃសាលាបឋមសិក្សាក្នុងភូមិរនះ សង្កាត់កោះដាច់បានជិះម៉ូតូឌុបគ្នាចេញពីរៀនគួរភាសាអង់គ្លេសត្រឡប់មកផ្ទះវិញ។
ប៉ុន្តែពេលកំពុងជិះតាមផ្លូវក៏ស្រាប់តែមានរថយន្តទំនើប ១ គ្រឿងបើកក្នុងល្បឿនលឿនបុកក្មេងរងគ្រោះទាំង ២ នាក់ស្លាប់នៅនឹងកន្លែងកើតហេតុ ហើយបានបើកគេចខ្លួនបាត់។
ដោយឡែកលោក ជុំ សំណាង នាយរងនគរបាលប៉ុស្តិ៍កោះដាច់បញ្ជាក់ប្រាប់ពីម្សិលមិញថា ករណីគ្រោះថ្នាក់ចរាចរណ៍នេះសមត្ថកិច្ចលោកកំពុងបន្តស្រាវជ្រាវ ខណៈមានរូបភាពពីកាមេរ៉ាសុវត្ថិភាពរបស់ម្ចាស់កំពង់ដកោះដាច់។ ប៉ុន្តែលោកថា ក្មេងរងគ្រោះមិនមែនត្រូវរថយន្តបុកដាច់ក្បាលដូចការផ្សព្វផ្សាយនោះទេ។
លោកប្រាប់ថា៖ « វីដេអូនោះឃើញរូបភាពឡានច្បាស់តែមិនច្បាស់ត្រង់ស្លាកលេខ»។
ទាក់ទងករណីនេះដែរ បើតាមលិខិតសរសរដោយដៃ និងមានស្នាមផ្តិតមេដៃមួយច្បាប់ តែគ្មានកាលបរិច្ឆេទរបស់ឈ្មោះ ព្រេម សុភ័ណ និងឈ្មោះ សៀប សោភា, ឈ្មោះ សូ ស្រីមុំ និងឈ្មោះ គាំ គឹមសុង ដែលថាជាឪពុកម្តាយក្មេងរងគ្រោះទាំង ២ នាក់បានជម្រាបជូនលោកនាយករដ្ឋមន្ត្រី ហ៊ុន សែន ថា ពួកគាត់មិនទាន់ទទួលបានតម្រុយយុត្តិធម៌ឡើយ ដោយសារសមត្ថកិច្ចអះអាងថា មិនអាចកំណត់អត្តសញ្ញាណជនបង្កបានទោះបីមានវីដេអូពីកាមេរ៉ាថតជាប់រថយន្តជនបង្កក្ដី។
លិខិតនោះបានរៀបរាប់ទៀតថា វីដេអូនេះត្រូវបានថតដោយកាមេរ៉ាសុវត្ថិភាពរបស់ម្ចាស់កំពង់ដកោះដាច់។ ប៉ុន្តែនៅពេលសួររកវីដេអូ (ម្ចាស់កំពង់ដ) ព្រមប្រគល់ឲ្យត្រឹមតែវីដេអូព្រាលៗមិនច្បាស់មួយចំនួនដល់សមត្ថកិច្ច។ រីឯ វីដេអូមួយចំនួនទៀតដែលច្បាស់ គេបានអះអាងថា លុបចោលហើយ។ អាស្រ័យហេតុនេះ «សូមសម្តេចតេជោ មេត្តាជួយអន្តរាគមន៍ដោយក្តីអនុគ្រោះដល់ប្រជាពលរដ្ឋក្រីក្រផង» ៕