.jpg)
សមត្ថកិច្ចចុះបង្ក្រាបឡដុតធ្យូងនៅក្នុងភូមិកញ្ចន់រុន ឃុំប្រាសាទកាលពីថ្ងៃទី ២៣ ខែមករា។ រូបថត សហការី
សៀមរាបៈ សមត្ថកិច្ចខណ្ឌរដ្ឋបាលព្រៃឈើខេត្តសៀមរាបរួមសហការជាមួយអាជ្ញាធរស្រុកវ៉ារិន បានចុះបង្ក្រាបទីតាំងឡដុតធ្យូង ៦ កន្លែង នៅភូមិកញ្ចន់រុន ឃុំប្រាសាទ បន្ទាប់ពីមានបណ្ដឹងពីអ្នកភូមិផ្សេងទៀតថា បានបង្កឲ្យមានផលប៉ះពាល់ដល់សុខភាពរស់នៅរបស់ពួកគេ ដោយសារតែក្លិនឈ្ងៀមនៃផ្សែងចេញពីឡធ្យូងទាំងនោះ។
លោក សាន សុង នាយប៉ុស្តិ៍ឃុំប្រាសាទ បានប្រាប់ភ្នំពេញ-ប៉ុស្តិ៍កាលពីថ្ងៃទី ២៣ ខែមករា ថា ឡដុតធ្យូងទាំង ៦ នោះកំពុងដំណើរការដុតបានរយៈពេលចន្លោះពី ១០ ថ្ងៃទៅ ២ សប្ដាហ៍មកហើយ ខណៈឡធ្យូងជាង ៣០ កន្លែងទៀតនៅក្នុងឃុំនេះកំពុងរៀបចំគរអុសនៅក្នុងឡ ដើម្បីដុតធ្វើជាធ្យូង ហើយខ្លះទៀតត្រូវបានគេប្រមូលធ្យូងចេញពីឡអស់ហើយ។
លោក សុង ថ្លែងថា៖ «ក្រុមមន្ត្រីជំនាញមិនបានប្រើវិធានការក្ដៅវាយកម្ទេចឡធ្យូងទាំង ៦ ដែលកំពុងដំណើរការដុតជិតបានសម្រេចនោះទេ ដោយបារម្ភខ្លាចនៅពេលវាយកម្ទេចអាចមានការផ្ទុះបែកផ្កាភ្លើង ឬរងើកភ្លើងខ្ទាតចេញពីឡទាំងនោះទៅបង្កឲ្យឆេះលំនៅឋានរបស់ប្រជាពលរដ្ឋនៅក្នុងតំបន់នោះ។ ប៉ុន្តែបានតម្រូវឲ្យម្ចាស់ឡធ្យូងទាំងនោះ ធ្វើកិច្ចសន្យាបញ្ឈប់សកម្មភាពផលិតអុសធ្យូងដោយប្រើឡទាំងនោះតទៅទៀត និងត្រូវរុះរើឡទាំងនោះចេញក្រោយពីប្រមូលផលធ្យូងរួច»។
បើតាមលោក សុង ក្រុមមន្ត្រីជំនាញនៅថ្ងៃទី ២៣ ខែមករា បានបន្តចុះត្រួតពិនិត្យ និងណែនាំដល់អ្នកភូមិផ្សេងទៀតដែលប្រកបមុខរបរឡអុសធ្យូងនេះឲ្យបញ្ឈប់សកម្មភាពរបស់ខ្លួនជាបន្ទាន់ដោយប្រាប់ថា មុខរបរនេះធ្វើឲ្យប៉ះពាល់ទៅដល់ធនធានព្រៃឈើនៅកម្ពុជា។
លោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាបថ្លែងថា ឡដុតធ្យូង គឺជាផ្នែកមួយនៃការបង្កឲ្យមានវិនាសកម្មព្រៃឈើនៅកម្ពុជា ព្រោះឈើ ឬអុសដែលអ្នកភូមិបានកាប់យកមកដើម្បីដុតផលិតធ្វើជាធ្យូងនោះ ភាគច្រើនគឺមានការលួចកាប់ចេញពីព្រៃសហគមន៍ និងព្រៃការពាររបស់រដ្ឋ។ កន្លងមក ដីព្រៃរបស់រដ្ឋដែលរងការកាប់បំផ្លាញទាំងនោះត្រូវបានជនខិលខូចមួយចំនួនលួចទន្ទ្រានយកមកធ្វើជាកម្មសិទ្ធិឯកជន ដោយខុសច្បាប់ថែមទៀត។
លោកថា៖ «ការធ្វើអាជីវកម្មឡដុតធ្យូងដែលគ្មានច្បាប់អនុញ្ញាត ឬគ្មានបទដ្ឋានបច្ចេកទេស វាមិនគ្រាន់តែបង្កឲ្យមានទំនាស់ផ្លូវច្បាប់ប៉ុណ្ណោះទេថែមទាំងបង្កឲ្យមានហានិភ័យខ្ពស់ដល់ធនធានព្រៃឈើជាតិ សុខភាពសាធារណៈ និងបរិស្ថានផងដែរ»។
លោកបន្តថា ក្លិនឈ្ងៀមនៃជ័រឈើ ផ្សែង ព្រមទាំងផេះផង់ ដែលភាយពីក្នុងឡដុតធ្យូងដែលគ្មានបទដ្ឋានបច្ចេកទេសត្រឹមត្រូវនោះ វាបង្កឲ្យមានការបំពុលនៅក្នុងខ្យល់ដែលអាចបង្កឲ្យកើតមានជំងឺផ្លូវដង្ហើម និងជំងឺឆ្លងផ្សេងៗតាមរយៈការស្រូបយកខ្យល់ដែលមានជាតិពុលនោះ។
លោកបន្តថា ទោះយ៉ាងណារដ្ឋាភិបាលមិនហាមឃាត់ពលរដ្ឋមិនឲ្យប្រកបរបរឬ ធ្វើអាជីវកម្មឡដុតធ្យូងនោះទេ ប្រសិនបើពួកគាត់អនុវត្តត្រឹមត្រូវតាមគោលការណ៍បច្ចេកទេស និងច្បាប់ពោលគឺពួកគាត់ត្រូវប្រើប្រាស់ឈើដែលដកហូតចេញពីចម្ការព្រៃដាំរបស់ពួកគាត់ និង រៀបចំឡដុតធ្យូងដែលមានបទដ្ឋានបច្ចេកទេស និងមានច្បាប់អនុញ្ញាតត្រឹមត្រូវពីស្ថាប័នជំនាញ និងអាជ្ញាធរពាក់ព័ន្ធ។
ជុំវិញករណីនេះ អ្នកស្រី ជី នឿត អាយុ ៤៤ ឆ្នាំ រស់នៅភូមិកញ្ចន់រុន ឃុំប្រាសាទ ដែលមានឡដុតធ្យូងចំនួន ២ ដែលអាចផលិតធ្យូងបានប្រមាណជាង ៣០០ គីឡូក្រាម ក្នុង ១ ឡនោះបាននិយាយថា អ្នកស្រីគ្មានជម្រើសអ្វីក្រៅពីការផ្អាកលើមុខរបរនេះមួយរយៈនោះទេដោយហេតុថា អាជ្ញាធរបានព្រមានចាត់វិធានការតឹងរ៉ឹងបំផុតលើមុខរបរនេះ។
អ្នកស្រីបានថ្លែងថា៖ «ក្រៅពីមុខរបរដាំដំឡូងមី មុខរបរឡដុតធ្យូងជាមុខរបរបន្ទាប់បន្សំ ដែលអាចជួយរកចំណូលដោះស្រាយជីវភាពគ្រួសាររបស់ខ្ញុំ ព្រោះពួកយើងមិនចង់ធ្វើចំណាកស្រុកទៅរកការងារនៅខេត្តផ្សេង ឬប្រទេសជិតខាង ចោលកូន ចោលផ្ទះសំបែង និងស្រែចម្ការនោះទេ»។
អ្នកស្រី នឿន បានបន្តថានៅលើដីស្រែចំនួន ៣,៥ ហិកតា របស់អ្នកស្រីមានដើមឈើមួយចំនួនដែលអ្នកស្រីអាចកាប់យកមកដុតផលិតធ្វើជាធ្យូងបាន ដូចជាដើមចំបក់ ដើមសង្កែ ដើមថ្លុង និងត្បែង។ ជាទូទៅប្ដីរបស់អ្នកស្រី តែងតែកាប់ឈើទាំងនោះនៅរដូវវស្សា ហើយដឹកយកមកគរទុកនៅខាងក្រោយផ្ទះ ដើម្បីទុកដុតផលិតជាធ្យូងនៅក្នុងរដូវប្រាំង ព្រោះក្រោយពីការកាប់រួច ដើមឈើទាំងនោះអាចដុះលូតលាស់ថ្មី ដែលអាចឲ្យពួកអ្នកស្រីកាប់យកមកធ្វើជាធ្យូងនៅឆ្នាំក្រោយទៀតបាន៕
