.jpg)
ឈើរាប់ម៉ឺនដើមដែលកាប់កប់ក្នុងដី ត្រូវបានសមត្ថកិច្ចបង្ក្រាបបាននៅស្រុកអូររាំង ខេត្តមណ្ឌលគិរី។ រួបថត សហការី
មណ្ឌលគិរី: ជនសង្ស័យដែលមិនស្គាល់អត្តសញ្ញាណបានកាប់ទន្ទ្រានយកដីដោយខុសច្បាប់ប្រមាណជាង ៦០ ហិកតា នៅក្នុងតំបន់ឃុំដាក់ដាំ ស្រុងអូររាំង ខេត្តមណ្ឌលគិរី ដោយពួកគេបានកាប់ឈើរាប់ម៉ឺនដើមជីកដីកប់ ដើម្បីបំបាត់ភ័ស្តុតាងនៃបទល្មើសទន្ទ្រានដីព្រៃដោយខុសច្បាប់។
លោក អ៊ុំ វណ្ណសុភៈ នាយខណ្ឌរដ្ឋបាលព្រៃឈើខេត្តមណ្ឌលគិរី ការបង្ក្រាបបទល្មើសទន្ទ្រានកាន់កាប់ដីដោយខុសច្បាប់នេះបានធ្វើឡើងក្រោយពីប្រជាសហគមន៍បានរាយការណ៍ដល់សមត្ថកិច្ច ប៉ុន្តែជនសង្ស័យបានគេចខ្លួនមុនពេលដែលមន្ត្រីជំនាញចុះទៅដល់តំបន់នោះ។
លោក អ៊ុំ វណ្ណសុភៈ ថ្លែងថា៖ «ជនសង្ស័យទាំងអស់បាននាំគ្នារត់គេចខ្លួនចូលព្រៃបាត់ស្រមោល ដោយបន្សល់ទុកគ្រឿងចក្រចំនួន ២ គ្រឿងអេស្កាវ៉ាទ័រ និងត្រាក់ទ័រ និងម៉ូតូ ២ គ្រឿង។ បច្ចុប្បន្នវត្ថុតាងបទល្មើសទាំងនេះត្រូវបានមន្ត្រីជំនាញប្រមូលយកមករក្សាទុកនៅទីស្នាក់ការរដ្ឋបាលព្រៃឈើខេត្តមណ្ឌលគិរី ដើម្បីកសាងសំណុំរឿងបញ្ជូនទៅតុលាការតាមនីតិវិធី»។
លោក អ៊ុំ វណ្ណសុភៈ ថ្លែងថា សមត្ថកិច្ចជំនាញកំពុងធ្វើការស្រាវជ្រាវកំណត់អត្តសញ្ញាណក្រុមជនល្មើសដែលបានកាប់រំលំដើមឈើរាប់ម៉ឺនដើម ហើយបានយកគ្រឿងចក្រទៅធ្វើការឈូសឆាយដីព្រៃយ៉ាងអនាធិបតេយ្យនៅទីតាំងនោះទៅរក្សាទុកនៅទីស្នាក់ការរដ្ឋបាលព្រៃឈើខេត្តមណ្ឌលគិរី ដើម្បីកសាងសំណុំរឿងបញ្ជូនទៅតុលាការតាមនីតិវិធី ក្រោយពីការបង្ក្រាបកាលពីថ្ងៃទី ១៥ ខែតុលា។
លោក អ៊ុំ វណ្ណសុភៈ បញ្ជាក់ថា៖ «នៅពេលនេះមន្ត្រីជំនាញយើងកំពុងធ្វើការវាស់វែងឈើ ឬរាប់ចំនួនដើមឈើ និងកំពុងវាស់វែងដីព្រៃដែលជនល្មើសបានឈូសឆាយ ប៉ុន្ដែខ្ញុំមិនទាន់បានទទួលរបាយការណ៍ជាក់លាក់ទេ។ ដូច្នេះខ្ញុំមិនទាន់អាចបញ្ជាក់ចំនួនដើមឈើដែលគេកាប់ហ្នឹង និងទំហំដីគេឈូសឆាយបានទេ ដោយរង់ចាំទទួលព័ត៌មានច្បាស់សិន»។
លោក សៀក មុន្នី អភិបាលស្រុកអូររាំងពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកបានបិទមិនអាចទាក់ទងបាន។
លោក ផង់ ហៀក នាយប៉ុស្ដិ៍នគរបាលរដ្ឋបាលឃុំដាក់ដាំ ស្រុកអូររាំងបានថ្លែងពីម្សិលមិញថា៖ «ជនល្មើសបានកាប់ដើមឈើរាប់ម៉ឺនដើម ហើយបានយកទៅកប់នៅក្នុងដី ដើម្បីបំបិទភ័ស្តុតាងលាក់បាំងសមត្ថកិច្ច»។
លោកបន្តថា ឈើទាំងអស់នេះត្រូវបានកប់ក្នុងដីមួយចំនួន និងខ្លះទៀតបម្រុងនឹងកប់ ប៉ុន្ដែសមត្ថកិច្ចចុះមកបង្ក្រាបទាន់ ទើបពួកគេបានរត់គេចខ្លួនបាត់ស្រមោល។ ពួកគេបានបន្សល់ទុកគ្រឿងចក្រ និងម៉ូតូនៅនឹងកន្លែងប្រព្រឹត្តបទល្មើស ដោយសមត្ថកិច្ចកំពុងធ្វើការស្រាវជ្រាវរកជនសង្ស័យទាំងអស់នេះ។
លោក ផង់ ហៀក បញ្ជាក់ថា៖ «ឈើទាំងអស់ហ្នឹង មិនមែនជាឈើប្រណីតអីទេ គឺគ្រាន់តែឈើធម្មតាដែលកាប់ឆ្ការព្រៃ ហើយគេដុត ប៉ុន្ដែដុតឈើហ្នឹងវាអត់ឆេះ វាឆេះតែមែកតូចៗ អ៊ីចឹងនៅសល់ដើមឈើរាងធំៗល្មម។ អ៊ីចឹងពួកគេខ្លាចបែកការណ៍ដល់សមត្ថកិច្ចក៏បានកាយដីជីកកប់ឈើហ្នឹង។ ជនល្មើសមិនមែនកាប់ឈើទេ គោលដៅគេគឺទន្ទ្រានយកដី ប៉ុន្ដែយើងបង្ក្រាបទាន់ពេល»។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីពីថ្ងៃម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោក អ៊ាង ម៉េងលី មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តមណ្ឌលគិរីបានថ្លែងពីម្សិលមិញថា ដោយជំរុញឱ្យអាជ្ញាធរពាក់ព័ន្ធស្រាវជ្រាវឱ្យបានស៊ីជម្រៅតាមចាប់ជនល្មើសពាក់ព័ន្ធមកផ្ដន្ទាទោសតាមនីតិវិធីច្បាប់។ ករណីនេះអាចមានការឃុបឃិតគ្នាជាប្រព័ន្ធ ព្រោះជនល្មើសបានឈូសឆាយដីព្រៃយ៉ាងច្រើន ប៉ុន្ដែអាជ្ញាធរមូលដ្ឋានបែរជាមិនបានបង្ក្រាបបានទាន់ពេលវេលា។
លោក ម៉េងលី បានបញ្ជាក់ថា៖ «ខ្ញុំបានទទួលព័ត៌មានពីសហគមន៍ថា បទល្មើសទន្ទ្រានដីព្រៃកើតឡើងជាហូរហែ ហើយសកម្មភាពបង្ក្រាបធ្វើបាន នៅពេលដែលមានមន្ត្រីជាន់ខ្ពស់ ឬមន្ត្រីថ្នាក់ជាតិចុះបង្ក្រាបផ្ទាល់ ឬចុះទៅចង្អុលបង្ហាញផ្ទាល់ អាហ្នឹងបានមន្ត្រីថ្នាក់ក្រោមចុះអនុវត្ត អ៊ីចឹងគឺបញ្ហាកើតឡើងដដែល»៕
វីដេអូ៖
