.jpg)
កុងតឺន័រចំនួន ៨៣ ទូ ដែលផ្ទុកពេញដោយសំរាម ត្រូវបានបង្ក្រាបនៅខេត្តព្រះសីហនុ កាលពីថ្ងៃម្សិលមិញ។ ក្រសួងបរិស្ថាន
ព្រះសីហនុៈ ទូកុងតឺន័រចំនួន ៨៣ ដែលផ្ទុកពេញទៅដោយកាកសំណល់សំរាមត្រូវបានសមត្ថកិច្ចចម្រុះចុះបង្រ្កាប បន្ទាប់ពីមានជនខិលខូចលួចនាំចូលពីបរទេសយកមកប្លុងចោល នៅកំពង់ផែអន្តរជាតិខេត្តព្រះសីហនុ ប៉ុន្ដែមន្រ្តីមិនទាន់ស្វែងរកឃើញប្រភពសំរាមទាំងនោះនៅឡើយ។ នេះបើតាមលោក នេត្រ ភក្ត្រា រដ្ឋលេខាធិការនិងជាអ្នកនាំពាក្យក្រសួងបរិស្ថាន។
លោក នេត្រ ភក្ត្រា បានប្រាប់ភ្នំពេញប៉ុស្ដិ៍កាលពីម្សិលមិញថា កុងតឺន័រចំនួន ៨៣ ទូ ដែលមានផ្ទុកកាកសំណល់សំរាមនាំចូលពីបរទេសត្រូវកម្លាំងសមត្ថកិច្ចនៃអគ្គនាយកដ្ឋានគយ និងរដ្ឋាករសហការជាមួយសមត្ថកិច្ចពាក់ព័ន្ធបើកប្រតិបត្តិការបង្ក្រាប នៅរសៀលថ្ងៃទី ១៦ ខែ កក្កដា ម្សិលមិញ ដើម្បីពិនិត្យជាក់ស្ដែងនៅក្នុងកំពង់ផែខេត្តព្រះសីហនុ។
ការគាស់ទូកុងតឺន័រនេះ ដឹកនាំដោយលោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករ និងលោក សាយ សំអាល់ រដ្ឋមន្ដ្រីក្រសួងបរិស្ថាន លោក គួច ចំរើន អភិបាលខេត្តព្រះសីហនុ និងលោក លូ គឹមឈន់ ប្រតិភូរាជរដ្ឋាភិបាល ទទួលបន្ទុកជាអគ្គនាយកកំពង់ផែស្វយ័តព្រះសីហនុ។ លោកបន្ថែមថា ការបង្ក្រាបលើការនាំចូលសំរាម ពីបរទេសមកប្រទេស កម្ពុជា នៅពេលនេះ បញ្ជាក់ពីកិច្ចសហការយ៉ាងល្អ រវាងក្រសួងបរិស្ថាន និងស្ថាប័នពាក់ព័ន្ធរួមមានអគ្គនាយកដ្ឋានគយ និងរដ្ឋាករ និងកំពង់ផែស្វយ័ត ក្នុងការទប់ស្កាត់ទំនិញហាមឃាត់មិនឲ្យចូលមកកម្ពុជា។
លោក ភក្ត្រា បញ្ជាក់ថា៖ «សមត្ថកិច្ចនឹងកំណត់ថា ទំនិញហាមឃាត់ទាំងនេះ មកពីប្រភពណា ហើយនឹងត្រូវបញ្ជូនទៅប្រភពដើមវិញ និងធ្វើការផាកពិន័យលើក្រុមហ៊ុនដែលនាំចូលមកនោះតាមច្បាប់ជាធរមាន។ ក្រសួងបរិស្ថាន និងសមត្ថកិច្ចពាក់ព័ន្ធនឹងធ្វើការស៊ើបអង្កេតស៊ីជម្រៅបន្ថែមទៀត ដើម្បីស្វែងរកប្រភព និងឫសគល់ដែលនាំឲ្យមានការនាំចូលសំណល់សំរាមនេះមកកាន់ប្រទេស កម្ពុជា»។
មន្ត្រីជាន់ខ្ពស់នៃស្ថាប័នគយ និងរដ្ឋាករម្នាក់ ដែលស្នើសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍ថា កុងតឺន័រផ្ទុកសំរាមទាំងនោះ ត្រូវបានគេបញ្ជូនមកកំពង់ផែអន្តរជាតិខេត្តព្រះសីហនុជាច្រើនដំណាក់កាល ប៉ុន្តែវាមិនទាន់ត្រូវបានគេដឹងអំពីប្រភពច្បាស់លាស់នៅឡើយទេ ហើយក៏នៅមិនទាន់ដឹងច្បាស់ថាវាជាកាកសំណល់ «មានជាតិវិទ្យុសកម្ម» ឬយ៉ាងណានោះដែរ តែវាមានចំនួនច្រើនមិនចាញ់នៅប្រទេស ហ្វីលីពីន នោះទេ។
សមត្ថកិច្ចកំពុងពិនិត្យទូកុងតឺន័រដែលផ្ទុកសំរាម។ សហការី
លោកបញ្ជាក់ថា៖ «នៅព្រឹកថ្ងៃពុធនេះ នឹងមានការរៀបចំសន្និសីទមួយស្ដីពីបញ្ហានេះ ហើយនឹងមានការចូលរួមពីថ្នាក់ដឹកនាំសំខាន់ៗនៃស្ថាប័នពាក់ព័ន្ធផងដែរ»។
លោកបន្ថែមថា មូលហេតុដែលកាកសំណល់នេះ អាចនាំចូលមកប្រទេស កម្ពុជា បាន ព្រោះប្រទេសប្រភពដើមបានក្លែងបន្លំឯកសារនាំចូល ដោយមិនបញ្ជាក់ប្រភេទទំនិញច្បាស់លាស់ ពោលគ្រាន់តែសរសេរថា ប្រភេទទំនិញកែច្នៃ ប៉ុន្ដែពេលមកដល់កម្ពុជា ទើបស្គែនឃើញថា ជាសំរាម។
លោក សាមុត សុធារិទ្ធិ ប្រធានមន្ទីរបរិស្ថានខេត្តព្រះសីហនុ បានថ្លែងកាលពីម្សិលមិញថា លោកកំពុងជាប់រវល់ត្រួតពិនិត្យកិច្ចការនេះមិនទាន់អាចនិយាយអ្វីបានទេ។ បើតាមរូបភាពដែលត្រូវបានគេថតបង្ហោះ សំរាមទាំងនោះ មើលទៅដូចជាកាកសំណល់ស្បោងប្លាស្ទិកឬក៏អាចជាសំណល់ដែលបញ្ចេញពីរោងចក្រ។
បើតាមលោក នេត្រ ភក្ត្រា លោកនាយករដ្ឋមន្រ្តី ហ៊ុន សែន ធ្លាប់បានគូសបញ្ជាក់ជាច្រើនលើករួចមកហើយថា «រាជរដ្ឋាភិបាលកម្ពុជាមិនអនុញ្ញាតឲ្យមានជាដាច់ខាតចំពោះការនាំចូលសំណល់ប្លាស្ទិកមកកែច្នៃនៅកម្ពុជា។ កម្ពុជាមិនមែនជាធុងសំរាមសម្រាប់ការបោះចោលបច្ចេកវិទ្យាហួសសម័យនោះទេ ហើយរដ្ឋាភិបាលជំទាស់ជានិច្ចនឹងការនាំចូលសំណល់ប្លាស្ទិក និងប្រេងម៉ាស៊ីនមកកែច្នៃនៅកម្ពុជា»៕
វីដេអូ៖
