បន្ទាយមានជ័យ៖ សមត្ថកិច្ចអាវុធហត្ថខេត្តបន្ទាយមានជ័យបានកសាងសំណុំរឿងបញ្ជូនបុរសម្នាក់ទៅសាលាដំបូងខេត្តនៅថ្ងៃនេះ បន្ទាប់ពីចាប់ខ្លួនពីថ្ងៃទី ២៤ មេសា នៅភូមិសង្កែ ឃុំបឹងបេង ស្រុកម៉ាល័យ ខេត្តបន្ទាយមានជ័យ ពាក់ព័ន្ធករណីនាំពលករ ១០ នាក់ឆ្លងទៅថៃ រីឯបក្ខពួកម្នាក់ទៀតកំពុងតាមចាប់ខ្លួន។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសនៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យបានឱ្យដឹងនៅថ្ងៃនេះថា បុរសជាមេខ្យល់នោះឈ្មោះ ម៉ក់ ឈន់ អាយុ ៤៣ ឆ្នាំ ត្រូវបានសមត្ថកិច្ចរបស់លោកបញ្ជូនបន្តទៅសាលាដំបូងខេត្តបន្ទាយមានជ័យនៅថ្ងៃទី ២៥ មេសានេះ។ រីឯបក្ខពួកគេម្នាក់ទៀតឈ្មោះ សួស គិម ដែលបានរត់គេចខ្លួន គឺសមត្ថកិច្ចលោកកំពុងស្រាវជ្រាវ ដើម្បីចាប់ខ្លួន។ ចំណែកមនុស្ស ១០ នាក់ ក្នុងនោះមានក្មេង ៤ នាក់ផងត្រូវបានបញ្ជូនទៅមណ្ឌលធ្វើចត្តាឡីស័កនៅខេត្តនេះ។
លោកបានថ្លែងថា៖ «ជនល្មើសដែលយើងបញ្ជូនទៅតុលាការពាក់ព័ន្ធបទនាំចេញដោយមិនស្របច្បាប់សម្រាប់ការឆ្លងដែន។ ឯបក្ខពួកគេដែលគេចខ្លួននោះក៏ដូចគ្នាដែរ»។
លោកបានរំឭកប្រាប់ថា ជនសង្ស័យត្រូវបានសមត្ថកិច្ចរបស់លោកឃាត់ខ្លួនកាលពីថ្ងៃទី ២៤ មេសា ខណៈពួកគេកំពុងបើករថយន្ត ១ គ្រឿង ម៉ាកបាឡែនពណ៌ទឹកប្រាក់ពាក់ស្លាកលេខភ្នំពេញ 2w-9568 នៅចំណុចបង្គោលគីឡូលេខ ៣៤ ក្នុងទឹកដីភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោកបានបន្តថា ដោយមានការសង្ស័យសមត្ថកិច្ចរបស់លោកបានស្ទាក់ហៅរថយន្តនោះឱ្យឈប់តែដោយដឹងខ្លួនបុរសអ្នកបើកបរឈ្មោះ សួស គិម បានបើកទ្វាររថយន្តគេចខ្លួនបាត់នៅសល់តែពលករ ១០ នាក់ ក្នុងនោះស្ត្រី ៣ នាក់ បុរស ៣ នាក់ និងក្មេង ៤ នាក់។ ចំណែកឈ្មោះ ម៉ក់ ឈន់ ក៏ត្រូវបានឃាត់ខ្លួននាពេលនោះដែរ។
យ៉ាងណាក្ដី បើតាមលោក ព្រហ្ម ថេង ក្រោយចាប់ខ្លួនជនសង្ស័យឈ្មោះ ម៉ក់ ឈន់ ជននេះបានឆ្លើយដោះសារប្រាប់សមត្ថកិច្ចថា រូបគេគ្រាន់តែស៊ីឈ្នួលសម្រួលមើលផ្លូវឱ្យឈ្មោះ សួស គិម ប៉ុណ្ណោះ។ រីឯកម្រៃជើងសាវិញ គឺគេទទួលបានក្នុង ១ ជើងពី ១០ ទៅ ១២ ម៉ឺនរៀល ហើយថាឈ្មោះ សួស គិម តែងតែរកស៊ីលួចដឹកពលករជាញឹកញាប់ដែរ។
ដោយឡែកចំពោះពលករដែលមានទាំងក្មេងទាំងចាស់សរុប ១០ នាក់នោះ ត្រូវបានសមត្ថកិច្ចរបស់លោកបញ្ជូនទៅមណ្ឌលធ្វើចត្តាឡីស័កនៅក្រុងប៉ោយប៉ែតអស់ហើយ៕