.jpg)
សមាគមគ្រូបង្រៀនកម្ពុជាឯករាជ្យ ធ្វើការតវ៉ាកាលពីឆ្នាំមុន។ ផា លីណា
ភ្នំពេញៈ សមាគមគ្រូបង្រៀនកម្ពុជាឯករាជ្យគ្រោងនឹងហែក្បួនដាក់ញត្តិទៅក្រសួងអប់រំ យុវជន និងកីឡា ព្រមទាំងខុទ្ទកាល័យលោកនាយករដ្ឋមន្ត្រី ហ៊ុន សែន នាឱកាសទិវាគ្រូបង្រៀនពិភពលោកដែលនឹងប្រារព្ធធ្វើនៅថ្ងៃទី ៥ ខែតុលាខាងមុខ ដើម្បីនិយាយពីស្ថានភាពគ្រូបង្រៀន ប្រាក់ខែគ្រូ និងគុណភាពគ្រូបង្រៀននៅកម្ពុជា បើទោះបីមិនមានការអនុញ្ញាតក៏ដោយ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យប្រាប់ភ្នំពេញ ប៉ុស្ដិ៍ ពីម្សិលមិញថា លិខិតស្នើទៅអភិបាលរាជធានីភ្នំពេញកាលពីថ្ងៃទី ២១ ខែកញ្ញា សមាគមគ្រោងនឹងរៀបចំពិធីអបអរសាទរទិវាគ្រូបង្រៀនពិភពលោកដែលប្រព្រឹត្តទៅនៅថ្ងៃទី ៥ ខែតុលា នៅសួនច្បារវត្តភ្នំក្រោមប្រធានបទ «សិទ្ធិទទួលបានការអប់រំ និងសិទ្ធិទទួលបានគ្រូបង្រៀនមានគុណភាព»។
លោកស្រីបន្ដថា ក្នុងឱកាសអបអរសាទរទិវាគ្រូបង្រៀននេះ សមាគមគ្រូបង្រៀនកម្ពុជាឯករាជ្យបានអញ្ជើញលោកគ្រូ-អ្នកគ្រូមកពីជុំវិញរាជធានីភ្នំពេញ និងតាមបណ្ដាខេត្ដមួយចំនួនដែលអាចមានអ្នកចូលរួមចាប់ពី ១៥០ នាក់ឡើងទៅ។
លោកស្រីអះអាងថា៖ «យើងមានគម្រោងដង្ហែក្បួនចេញពីសួនច្បារវត្តភ្នំ ដើម្បីយកញត្តិទៅដាក់ជូនក្រសួងអប់រំ យុវជន និងកីឡា បន្ទាប់មកទៅខុទ្ទកាល័យលោកនាយករដ្ឋមន្ត្រី ហ៊ុន សែន»។
លោកស្រីបន្ថែមថា៖ «មកដល់ថ្ងៃចន្ទនេះ យើងមិនទាន់បានទទួលដំណឹងថា សាលាក្រុងអនុញ្ញាតឲ្យយើងហែក្បួន ឬអត់ទេ។ ប៉ុន្ដែក្នុងនាមយើងជាប្រធានសមាគមធ្វើការដើម្បីផលប្រយោជន៍គ្រូបង្រៀនទូទាំងប្រទេសកម្ពុជា ទោះជាគេហាមឃាត់យ៉ាងណា រាល់ឆ្នាំយើងតែងតែធ្វើ ទោះដើរដល់គោលដៅ ឬមិនដល់ក៏ត្រូវតែបង្ខំចិត្ដធ្វើ»។
លោកស្រី ឆាយ៉ាវី បញ្ជាក់ថា ក្នុងញតិ្តនោះមានគោលបំណងទាមទារឲ្យក្រសួង និងលោកនាយករដ្ឋមន្ត្រី ហ៊ុន សែន ផ្តល់ប្រាក់ខែគោលដល់លោកគ្រូ-អ្នកគ្រូ ចាប់ពីកម្រិតបឋមរហូតដល់កម្រិតវិទ្យាល័យឲ្យទទួលបានប្រាក់ខែគោលយ៉ាងតិច ២ លានរៀលក្នុង ១ ខែរួមនឹងប្រាក់ឧបត្ថម្ភផ្សេងៗទៀត។
លោកស្រីបន្តថា៖ «យើងសង្ឃឹមថារាជរដ្ឋាភិបាលនឹងយល់ចំពោះការស្នើសុំរបស់យើង ទោះការស្នើសុំនេះតិចតួចយ៉ាងណាក្ដីសម្រាប់ប្រពន្ធកូនគ្រូបង្រៀន តែយើងសង្ឃឹមថារដ្ឋាភិបាលនឹងគិតគូរឡើងវិញ ព្រោះមនុស្សម្នាក់ក្នុង ១ ខែចាយត្រឹម ៤-៥ ម៉ឺនរៀលនេះមិនគ្រាន់ទេ។ អ៊ីចឹងទើបយើងស្នើសុំចំពោះប្រាក់ឧបត្ថម្ភទាំងនេះ»។
លោកស្រីបន្ថែមថា៖ «ក្រសួងអប់រំត្រូវទប់ស្កាត់អំពើពុករលួយនៅក្នុងវិស័យអប់រំ និងបន្ថែមប្រាក់សម្រាប់កូន និងប្រពន្ធបូករួមនឹងប្រាក់អត្ថប្រយោជន៍ផ្សេងៗទៀត ជាពិសេសបញ្ឈប់ការរើសអើង និងត្រូវមានតម្លាភាព»។
លោក រស់ សុវាចា អ្នកនាំពាក្យក្រសួងអប់រំថ្លែងថា៖ «ក្រសួងនឹងស្វាគមន៍ទទួល និងឆ្លើយតបទៅតាមជាក់ស្ដែង ព្រោះក្រសួងយើងស្វាគមន៍ចំពោះការបញ្ចេញមតិរបស់ប្រជាពលរដ្ឋក៏ដូចជាមជ្ឈដ្ឋានទូទៅដែរ»។
លោក ម៉េត មាសភក្តី អ្នកនាំពាក្យសាលាក្រុងភ្នំពេញឲ្យដឹងថា៖ «យើងនឹងលើកយករឿងនេះទៅពិភាក្សាជាមួយថ្នាក់ដឹកនាំរបស់សាលាក្រុងភ្នំពេញនៅថ្ងៃធ្វើការស្អែក (ថ្ងៃអង្គារ) ដើម្បីសម្រេចចំពោះការស្នើសុំរបស់ពួកគាត់»៕
