បន្ទាយមានជ័យៈ បុរសជាសមាជិកក្រុមប្រឹក្សាសង្កាត់ប៉ោយប៉ែតម្នាក់ ត្រូវបានកម្លាំងកងរាជអាវុធហត្ថក្រុងប៉ោយប៉ែតចាប់ឃាត់ខ្លួនកាលពីម្សិលមិញ ពីបទសង្ស័យនាំមនុស្សឆ្លងដែនខុសច្បាប់ទៅប្រទេសថៃ នៅក្នុងភូមិសាមគ្គីមានជ័យ សង្កាត់- ក្រុងប៉ោយប៉ែត ។
លោក ព្រហ្ម ថេង ប្រធានមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្ត បន្ទាយមានជ័យប្រាប់ ភ្នំពេញ ប៉ុស្តិ៍ ពីម្សិលមិញថា ជនសង្ស័យឈ្មោះ យឹម នៅ អាយុ ៤៧ ឆ្នាំជាសមាជិកក្រុមប្រឹក្សាសង្កាត់ប៉ោយប៉ែតមានលំនៅភូមិសាមគ្គីមានជ័យ សង្កាត់-ក្រុងប៉ោយប៉ែត។ រីឯមនុស្សដែលជិះក្នុងរថយន្តមានចំនួន ៥ នាក់ក្នុងនោះ ៣ នាក់ជាជនជាតិខ្មែរ និងមនុស្ស ២ នាក់ទៀតជាជនជាតិថៃ។
លោកប្រាប់ថា៖ «តាមពិតទៅ ជនសង្ស័យមានតែម្នាក់ទេពាក់ព័ន្ធនាំមនុស្សឆ្លងដែននេះហើយដែលសារព័ត៌មានចុះផ្សាយថា ចាប់បាន ៣ នាក់នោះ គឺមិនពិតទេ។ ប្រហែលជាអ្នកសារព័ត៌មាននោះគាត់ច្រឡំគាត់ឃើញភ្លាមចុះផ្សាយតែម្តង ព្រោះគាត់មិនបានសួរយើង»។
លោកបានបន្តថា តាមចម្លើយរបស់ជនសង្ស័យប្រាប់ថា គាត់មានក្មួយស្រីចំនួន ៣ នាក់ ហើយមានបុរសជនជាតិថៃ ២ នាក់ជាប្តីរបស់ក្មួយស្រីគាត់មានបំណងទៅប្រទេសថៃ។ ដោយគាត់យល់ឃើញថា ពួកគេជាសាច់ញាតិផងនោះគាត់ក៏បើករថយន្តផ្ទាល់ខ្លួន Camry ពណ៌សជូនពួកគេទៅដាក់នៅព្រំដែនច្រករបៀងស្ថិតក្នុងភូមិសាមគ្គីមានជ័យ សង្កាត់- ក្រុងប៉ោយប៉ែត ហើយពួកគេក៏រត់ឆ្លងដែនចូលទៅក្នុងទឹកដីថៃបាត់ទៅ។
លោកបន្តតាមសម្តីជនសង្ស័យថា ពេលនោះដោយសារកម្លាំងសមត្ថកិច្ចអាវុធហត្ថដែលល្បាតតាមច្រករបៀងឃើញក៏រត់សំដៅមករកគាត់ (ជនសង្ស័យ) ដើម្បីឃាត់ក្មួយរបស់គាត់ ប៉ុន្តែពួកគេបានរត់ចូលទឹកដីថៃបាត់ទៅហើយ សូម្បីតែសាក់កាដូសម្លៀកបំពាក់ ក៏យកមិនទាន់ផង។ ជនសង្ស័យម្នាក់នោះនឹងត្រូវមន្ត្រីជំនាញរបស់លោកបញ្ជូនទៅសាលាដំបូងខេត្តបន្ទាយមានជ័យនៅថ្ងៃទី ៣០ មីនានេះ ដើម្បីចាត់ការតាមនីតិវិធីច្បាប់៕