.jpg)
លោក Doug Ericksen សមាជិកព្រឹទ្ធសភារដ្ឋវ៉ាស៊ីនតោន ជួបជាមួយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា កាលពីម្សិលមិញ។
ភ្នំពេញៈ សមាជិកព្រឹទ្ធសភារដ្ឋវ៉ាស៊ីនតោនលោក Doug Ericksen កាលពីថ្ងៃពុធបានសម្ដែងឆន្ទៈត្រឡប់មកប្រទេសកម្ពុជាធ្វើជាអ្នកសង្កេតការណ៍ម្នាក់ក្នុងអំឡុងការបោះឆ្នោតជាតិដែលគ្រោងនឹងធ្វើឡើងនៅថ្ងៃទី ២៩ ខែកក្កដាដែលមជ្ឈដ្ឋានសហគមន៍អន្តរជាតិខ្លះមានក្តីបារម្ភអំពីបរិយាកាសបោះឆ្នោតនាពេលខាងមុខនេះ។
លោក Ericksen និងប្រតិភូរបស់លោក កាលពីថ្ងៃពុធ បានជួបប្រជុំទ្វេភាគីជាមួយលោក ប្រាក់ សុខុន រដ្ឋមន្ត្រីការបរទេសកម្ពុជានៅក្រសួងការបរទេសក្នុងរាជធានីភ្នំពេញក្នុងគោលបំណងពង្រឹងសហប្រតិបត្តិការទ្វេភាគីរវាងប្រទេសកម្ពុជា និងសហរដ្ឋអាមេរិក។
លោក មាស គីមហេង អនុរដ្ឋលេខាធិការក្រសួងការបរទេសបានប្រាប់អ្នកយកព័ត៌មានបន្ទាប់ពីកិច្ចប្រជុំថា៖ «ក្នុងអំឡុងកិច្ចប្រជុំនេះលោក Ericksen បានសង្កត់ធ្ងន់ធ្ងរថាដោយសារកម្ពុជានឹងរៀបចំការបោះឆ្នោតនាប៉ុន្មានខែខាងមុខ ដូច្នេះលោកចង់ត្រឡប់មកប្រទេសកម្ពុជាវិញជាអ្នកសង្កេតការណ៍បោះឆ្នោត»។
លោក គីមហេង ថា៖ «លោកចង់ឃើញកម្ពុជា និងសហរដ្ឋអាមេរិកមានទំនាក់ទំនងល្អ និងជាពិសេសតាមរយៈក្តីសង្ឃឹមខ្លាំងក្លាមួយនៃគោលនយោបាយការបរទេសថ្មីរបស់លោកប្រធានាធិបតី ដូណាល់ ត្រាំ ដែលអាមេរិកមិនជ្រៀតជ្រែកអធិបតេយ្យភាពនៃប្រទេសដទៃ»។
លោក ហេង បានថ្លែងបន្តថាលោក Ericksen ក៏បានសម្តែងការពេញចិត្តចំពោះការបោះឆ្នោតឃុំ សង្កាត់ក្នុងឆ្នាំ ២០១៧ ផងដែរ។
ក្នុងអំឡុងដំណើរទស្សនកិច្ចមកកម្ពុជាលោក Ericksen និងប្រតិភូរបស់លោកបានមានជំនួបដោយឡែកមួយជាមួយលោក សាយ ឈុំ ប្រធានព្រឹទ្ធសភា លោកនាយករដ្ឋមន្ត្រី ហ៊ុន សែន និងមន្ត្រីរដ្ឋាភិបាលជាន់ខ្ពស់មួយចំនួនទៀត។
លោក កៅ គឹមហួន ប្រតិភូអមនាយករដ្ឋមន្ត្រី បានថ្លែងកាលពីថ្ងៃចន្ទថាលោក Ericksen បានប្រាប់លោកនាយករដ្ឋមន្ត្រីនៅក្នុងអំឡុងកិច្ចជំនួបថាលោកចង់ឃើញកិច្ចសហប្រតិបត្តិការល្អជាបន្តរវាងអាមេរិក និងកម្ពុជា ជាពិសេសទំនាក់ទំនងរវាងប្រជាជននៃប្រទេសទាំង ២។
លោក គឹមហួន បានដកស្រង់សម្តីរបស់លោក Ericksen ដែលបានប្រាប់លោកនាយករដ្ឋមន្ត្រីថា៖ «ប្រជាជនកម្ពុជាជាមិត្តភក្តិរបស់អាមេរិកមិនមែនជាសត្រូវហើយគណបក្សប្រជាជនកម្ពុជាក៏ដូច្នេះដែរ។ ហេតុដូច្នេះយើងត្រូវខិតខំប្រឹងប្រែងឲ្យអស់ពីសមត្ថភាពដើម្បីកសាងទំនាក់ទំនងល្អរវាងប្រទេសទាំង ២»។
លោក សំ គន្ធាមី នាយកប្រតិបត្តិ អង្គការ និចហ្វិក ដែលជាអង្គការឃ្លាំមើលការបោះឆ្នោតនៅកម្ពុជាបានថ្លែងថា រដ្ឋាភិបាល និងគណៈកម្មាធិការជាតិរៀបចំការបោះឆ្នោតបានអំពាវនាវឲ្យអ្នកសង្កេតការណ៍ជាតិ និងអន្តរជាតិចូលរួមនៅក្នុងការសង្កេតការណ៍បោះឆ្នោតនាពេលខាងមុខ។
លោក គន្ធាមី បានថ្លែងថា៖ «យើងស្វាគមន៍សមាជិកព្រឹទ្ធសភាអាមេរិកឲ្យត្រឡប់មកធ្វើជាអ្នកសង្កេតការណ៍បោះឆ្នោត។ នេះជាចំណុចល្អចំពោះការវាយតម្លៃបរិយាកាសការបោះឆ្នោតនាពេលខាងមុខ»។
លោក ឌឹម សុវណ្ណារុំ អ្នកនាំពាក្យ គ.ជ.ប. បានថ្លែងថាចំនួនអ្នកសង្កេតការណ៍ជាតិ និងអន្តរជាតិមិនទាន់មាននៅឡើយទេ ខណៈនីតិវិធីនៃការដាក់ពាក្យកំពុងបន្តធ្វើ។
លោកបានថ្លែងថា៖ «ប្រទេសជាច្រើនបាន និងកំពុងដាក់ពាក្យជាអ្នកសង្កេតការណ៍ ហើយយើងស្វាគមន៍ទាំងអស់គ្នា មិនថា ប្រទេសតូច ឬធំនោះទេ»។
ខណៈដែលលោកនាយករដ្ឋមន្ត្រី ហ៊ុន សែន អំពាវនាវឲ្យប្រជាពលរដ្ឋទៅបោះឆ្នោតហើយមិនមានអតីតបក្សសង្គ្រោះជាតិ ដែលជាគូប្រជែងនយោបាយនឹងបក្សកាន់អំណាចនោះអតីតប្រធានបក្សប្រឆាំងមួយនេះលោក សម រង្ស៊ី ក៏បានអំពាវនាវកុំឲ្យពលរដ្ឋទៅបោះឆ្នោតដោយចាត់ទុកការបោះឆ្នោតនោះក្លែងក្លាយ៕PS
