ព្រះសីហនុៈ អ្នកនាំពាក្យសាលាដំបូងខេត្តព្រះសីហនុលោក លឹម ប៊ុនហេង បានប្រាប់ភ្នំពេញប៉ុស្ដិ៍កាលពីម្សិលមិញថា សាលាដំបូងខេត្ដព្រះសីហនុនឹងបើកសវនាការនៅថ្ងៃទី ២៥ ខែមិថុនា ខាងមុខនេះលើសំណុំរឿងបាក់រលំអគារកម្ពស់ ៧ ជាន់ នៅខេត្ដព្រះសីហនុកាលពីថ្ងៃទី ២២ ខែមិថុនា ឆ្នាំ ២០១៩ ដែលមានជនរងគ្រោះស្លាប់ និងរបួសជិត ៥០ នាក់។
ក៏ប៉ុន្តែលោក ប៊ុនហេង មិនទាន់អាចបញ្ជាក់ជាមុនបាននៅឡើយទេ ជុំវិញដំណើរការជំនុំជម្រះក្ដីលើករណីនេះដោយលោកអះអាងថា កំពុងស្ថិតនៅក្នុងសមត្ថកិច្ចរបស់ចៅក្រមជាអ្នកសម្រេចនៅពេលជំនុំជម្រះក្ដី។ លោកថ្លែងថា៖ «ការបើកសវនាការនេះតុលាការបានកំណត់កាលបរិច្ឆេទបែបនេះ ចំណែកភាគីដែលពាក់ព័ន្ធមានមេធាវីជាដើម គាត់នឹងចូលរួមតាមការកោះហៅរបស់តុលាការនៅថ្ងៃទី ២៥ ខែមិថុនា»។
ទាក់ទិននឹងការបើកសវនាការជម្រះក្ដីរកយុត្តិធម៌ជូនជនរងគ្រោះជិត ៥០ នាក់នេះកាលពីខែឧសភាកន្លងទៅ ក្រុមមេធាវីស្ម័គ្រចិត្តសម្តេចតេជោសែនធ្លាប់បានបង្ហាញការខកចិត្ត ដោយសារសំណុំរឿងនេះត្រូវបានលើកពេលជាបន្តបន្ទាប់។
ដោយបានបង្ហោះសារលើហ្វេសប៊ុករបស់ខ្លួនក្រុមមេធាវីស្ម័គ្រចិត្ត «សម្តេចតេជោសែន» បានអះអាងថា កាលពីថ្ងៃទី ២៧ ខែឧសភា ពួកគាត់បានចេញដំណើរពីភ្នំពេញទៅខេត្តព្រះសីហនុដើម្បីចូលរួមសវនាការការពារសិទ្ធិជូនជនរងគ្រោះដើមបណ្តឹងរដ្ឋប្បវេណីក្នុងសំណុំរឿងបាក់រលំអគារនេះ។ ប៉ុន្តែគួរឱ្យសោកស្តាយដែលសវនាការត្រូវបានក្រុមប្រឹក្សាសម្រេចលើកពេលដោយមូលហេតុមេធាវីការពារជនជាប់ចោទម្នាក់អវត្តមាន និងមេធាវីការពារជនជាប់ចោទម្នាក់ទៀតសុំលើកពេល។
ក្រុមមេធាវីស្ម័គ្រចិត្តបន្ថែមថា៖ «ពេលវេលាក្នុងការធ្វើដំណើរក្នុងរយៈចម្ងាយឆ្ងាយផង និងក្នុងខណៈពេលដែលជនរងគ្រោះដើមបណ្តឹងរដ្ឋប្បវេណីជាច្រើនរូបកំពុងទន្ទឹងរង់ចាំទទួលយុត្តិធម៌ជិត ១ ឆ្នាំទៅហើយផង»។
លោក ឈី សម្បត្ដិ អនុប្រធានក្រុមមេធាវីស្ម័គ្រចិត្ដសម្តេចតេជោសែនពីម្សិលមិញថា៖ «សម្រាប់ករណីនេះមេធាវីនៃក្រុមមេធាវីស្ម័គ្រចិត្តសម្តេចតេជោសែនបានខិតខំបំពេញភារកិច្ចប្រកបដោយការទទួលខុសត្រូវ។ ចំពោះកិច្ចការផ្សេងទៀតខ្ញុំមិនអាចបញ្ជាក់ជូនបានទេដោយសារនេះជាការសម្ងាត់វិជ្ជាជីវៈហើយកំពុងតែស្ថិតនៅក្នុងនីតិវិធីរបស់តុលាការ»។
កាលពីខែកក្កដាឆ្នាំមុន ក្រុមជនរងគ្រោះជិត ៥០ គ្រួសារ ក្នុងឧបទ្ទវហេតុបាក់រលំអគារនៅខេត្តព្រះសីហនុនេះ ធ្លាប់បានជំរុញតាមរយៈក្រុមមេធាវីស្ម័គ្រចិត្តឲ្យតុលាការពន្លឿននីតិវិធីស្វែងរកយុត្តិធម៌ ខណៈសំណុំរឿងនេះពួកគេទាមទារសំណងជំងឺចិត្តពីក្រុមហ៊ុនចិនក្នុងម្នាក់ៗពី ២ ម៉ឺនដុល្លារដល់ជាង ១០ ម៉ឺនដុល្លារ។
កាលពីថ្ងៃ ២២ ខែមិថុនា ឆ្នាំមុន អគារកម្ពស់ ៧ ជាន់ខាងលើបានបាក់រលំធ្វើឲ្យកម្មករ ២៨ នាក់ស្លាប់ និង ២៦ នាក់ទៀតត្រូវបានជួយសង្គ្រោះ។ ២ ថ្ងៃក្រោយមកមានអ្នកទទួលខុសត្រូវ និងម្ចាស់ក្រុមហ៊ុនម៉ៅការសំណង់ជនជាតិចិន ៤ នាក់ត្រូវបានតុលាការចេញដីកាឃុំខ្លួន៕