ឧត្តរមានជ័យៈ អយ្យការអមសាលាដំបូងខេត្តឧត្តរមានជ័យបានចោទប្រកាន់មនុស្ស ៤ នាក់ កាលពីម្សិលមិញ រឿងគ្រឿងញៀន ក្រោយពីចាប់ខ្លួនបាននៅសង្កាត់អូរស្មាច់ ក្រុងសំរោង ខេត្តឧត្តរមានជ័យ។
លោក ហង់ ហ្រ៊ីដា អ្នកនាំពាក្យតុលាការខេត្តឧត្តរមានជ័យបានឱ្យដឹងនៅថ្ងៃទី ២៦ ឧសភាថា បុរសជាជនសង្ស័យទាំង ៤ នាក់ មានអាយុចាប់ ២៩ ដល់ ៣៧ ឆ្នាំ ក្នុងចំណោមជនសង្ស័យទាំង ៤ នាក់នេះ មានម្នាក់ត្រូវបានចោទប្រកាន់បន្ថែមរឿងប៉ុនប៉ងមនុស្សឃាត។
លោកថ្លែងថា៖ «ដូច្នេះមនុស្ស ៣ នាក់ត្រូវចោទបទជួញដូរ និងប្រើប្រាស់គ្រឿងញៀន។
ចំណែកជនម្នាក់ត្រូវចោទបទជួញដូរគ្រឿងញៀន និងបទប៉ុនប៉ងមនុស្សឃាតមានស្ថានទម្ងន់ទោស»។
លោក ថោង សាមិ ស្នងការរងទទួលការងារផែនគ្រឿងញៀនបានឱ្យដឹងនៅថ្ងៃទី ២៦ ខែឧសភាផងដែរថា កាលពីថ្ងៃទី ២៣ ឧសភាដោយមានការសម្របសម្រួលផ្លូវច្បាប់ពីព្រះរាជអាជ្ញានៃសាលាដំបូងខេត្តបន្ទាយមានជ័យ និងដឹកនាំដោយលោកឧត្តមសេនីយ៍ទោស្នងការនគរបាលខេត្តឧត្តរមានជ័យបានចុះបង្ក្រាបករណីជួញដូរ និងប្រើប្រាស់គ្រឿងញៀនស្ថិតនៅសង្កាត់អូរស្មាច់ ក្រុងសំរោង។
ពេលនោះសមត្ថកិច្ចឃាត់ជនសង្ស័យបាន ៣ នាក់ និង រឹបអូសបានវត្ថុតាងមានថ្នាំញៀនមេតំហ្វេតាមីន ៨ កញ្ចប់តូច រថយន្ត ១ គ្រឿង កាំបិត ៣ ដើម រួមនឹងសម្ភារប្រើប្រាស់គ្រឿងញៀនមួយចំនួនទៀត។
លោក សាមិ បានឱ្យដឹងថា ជនសង្ស័យម្នាក់ទៀតមានដីកាតាមចាប់ខ្លួនផងដែរពីតុលាការខេត្តឧត្តរមានជ័យពាក់ព័ន្ធការប្រើប្រាស់អាវុធវែងប្រភេទ AK-៤៧ បាញ់ទៅលើសមត្ថកិច្ចបណ្ដាលឱ្យរបួសធ្ងន់ហើយបានគេចខ្លួន៕