ក្រសួងសុខាភិបាល បានឲ្យដឹងថា សំណាកកម្មករចំនួន ៩៤ នាក់ ដែលទទួលបានពីក្រសួងការងារ ក្នុងអំឡុងដាក់ឲ្យនៅដាច់ដោយឡែក លើកម្មករ ក្រោយឈប់សម្រាកក្នុងឱកាសបុណ្យចូលឆ្នាំខ្មែរ មានលទ្ធផលអវិជ្ជមានទាំងអស់ ខណៈដែលក្រសួងការងារ នៅតែបន្តទទួលត្រួតពិនិត្យទៅលើកម្មករ។
លោក លី សូវ៉ាន់ អ្នកនាំពាក្យក្រសួងសុខាភិបាល បានប្រាប់ភ្នំពេញប៉ុស្តិ៍ ពីម្សិលមិញថា គិតត្រឹមម៉ោង ២ រសៀល ថ្ងៃទី ២៣ ខែមេសា នេះ ក្រសួងបានធ្វើតេស្តទៅលើសំណាកកម្មករចំនួន ៩៤ នាក់ ដែលក្រសួងការងារ បានបញ្ជូនមក គឺលទ្ធផលបង្ហាញថា អវិជ្ជមានទាំងអស់ មិនមានកម្មករណាម្នាក់មានឆ្លងជំងឺនេះទេ។
លោកបញ្ជាក់ថា៖ «រហូតម៉ោង ២ រសៀលសំណាកកម្មករទទួលបានចំនួន ៩៤ សំណាក គឺអវិជ្ជមានទាំងអស់»។
បើតាមសេចក្តីប្រកាសព័ត៌មានប្រចាំថ្ងៃ របស់ក្រសួងការងារ ក្នុងរយៈពេល ៣ ថ្ងៃ គិតចាប់ពីថ្ងៃទី ២០ ដល់ព្រឹកថ្ងៃទី ២៣ ខែមេសា មានកម្មករមកពិនិត្យសុខភាព នៅតាមមណ្ឌលចត្តាឡីស័កទាំង ១០ ក្នុងរាជធានីភ្នំពេញសរុបចំនួន ២៨៥០ នាក់ ដោយនៅថ្ងៃទី ១ មាន ១ ០១៨ នាក់ ថ្ងៃទី ២ មាន ១ ២២១ នាក់ ចំណែកថ្ងៃទី ៣ មាន ៥១៦ នាក់ ព្រមទាំងត្រឹមព្រឹកថ្ងៃទី ៤ មានចំនួន ៩៥ នាក់។
សេចក្តីប្រកាសព័ត៌មាន ចុះថ្ងៃទី ២៣ មេសា បានឲ្យដឹងថា សម្រាប់ថ្ងៃទី ២២ ក្រសួងការងារ បានដាក់ឲ្យកម្មករធ្វើចត្តាឡីស័កនៅផ្ទះ ១៤ ថ្ងៃ មានចំនួន ៥០៥ នាក់ ហើយរយៈពេល ៤ ថ្ងៃកន្លងមកនេះ ការដាក់ឲ្យធ្វើចត្តាឡីស័កនៅផ្ទះ ១៤ ថ្ងៃ មានចំនួនសរុប ២ ៧០៣ នាក់។
លោក ហេង សួរ អ្នកនាំពាក្យក្រសួងការងារ បានប្រាប់ភ្នំពេញប៉ុស្តិ៍នៅថ្ងៃទី ២៣ ខែមេសា ថា កម្មករដែលពិនិត្យឃើញមានអាការៈសង្ស័យ គឺតម្រូវឲ្យស្នាក់នៅក្នុងបន្ទប់ចត្តាឡីស័កកម្រិត ២ ដោយតម្រូវយកសំណាកទៅពិសោធន៍បន្តនៅវិទ្យាស្ថានប៉ាស្ទើរ។
លោកបន្តថា ក្នុងករណីសំណាកទាំងនោះ ដែលពិនិត្យមិនឃើញវិជ្ជមាន នោះច្បាស់ណាស់ ក្រុមការងារ នឹងអនុញ្ញាតឲ្យកម្មករចេញពីបន្ទប់កម្រិត២។
លោកបញ្ជាក់ថា៖«សូមមើលក្នុងសេចក្តីប្រកាសព័ត៌មាន។ អ្នកដែលយើងអនុញ្ញាតឲ្យចេញពី QC2 (កម្រិត ២) គឺ មានន័យថា លទ្ធផលរបស់គាត់គឺអវិជ្ជមាន»។
អ្នកស្រី សាន ឡាវ កម្មការិនីរោងចក្រ CTW បានប្រាប់ភ្នំពេញប៉ុស្តិ៍ បន្ទាប់ពីចេញពីបន្ទប់ដាច់ដោយឡែកកម្រិត ១ នៅក្នុងវិទ្យាល័យជម្ពូវ័ន្ត នៅថ្ងៃទី ២៣ ខែមេសា ថា អ្នកស្រីមានអាការៈធម្មតា និងត្រូវបានអនុញ្ញាតឲ្យចេញទៅផ្ទះ កាលពីថ្ងៃទី ២១ ដោយមិនតម្រូវឲ្យយកសំណាកទៅពិនិត្យបន្តនោះទេ។
អ្នកស្រីបន្តថា៖ «ខ្ញុំនៅហ្នឹង មួយយប់ ២ ថ្ងៃ ដោយបាយអាហារ ហូបចុក កន្លែងស្នាក់នៅ គឺត្រឹមត្រូវ។ បន្ទប់ខ្ញុំ មានគ្នា ៦ នាក់ ហើយបានចេញទៅផ្ទះថ្ងៃដូចគ្នា មិនមានអ្នកណាកើតអីទេ។ វាល្អតើ នៅពេលដែលគេដាក់យើងដាច់ដោយឡែកបែបនេះ»។
លោក ហែន ភារៈ វេជ្ជបណ្ឌិតផ្នែកផ្លូវដង្ហើម បានប្រាប់ភ្នំពេញប៉ុស្តិ៍នៅថ្ងៃទី ២៣ ខែមេសា ថា ការដាក់ឲ្យកម្មករ នៅដាច់ដោយឡែកនេះ គឺជាវិធានការត្រឹមត្រូវ ដើម្បីការពារកុំឲ្យមានការចម្លងទៅកាន់សហគមន៍ ដែលជាកត្តាព្រួយបារម្ភខ្លាំងបំផុត សម្រាប់កម្ពុជា។ ជាមួយគ្នានេះ លោកសង្ឃឹមថា កម្ពុជានឹងបន្តវិធានការទប់ស្កាត់ការឆ្លងជំងឺនេះ ហើយមិនគួរណាមានការធ្វេសប្រហែសនោះទេ។
លោកបញ្ជាក់ថា៖ «ការទប់ស្កាត់បានក្នុងដំណាក់កាលនេះ គឺជាមោទនភាពមួយហើយ ទប់ស្កាត់ការឆ្លង និងជាសះស្បើយដោយមិនមានការស្លាប់។ ប៉ុន្តែយើងកុំមោទនភាពទៀត ថាមិនអីទេៗ យើងទម្លាក់ដៃ ព្រោះធម្មតាមេរោគ បើឆ្លងពីម្នាក់ទៅម្នាក់ ហើយបន្តឆ្លងទៅបន្តទៀត គឺវាមានការប្រែប្រួល ហើយមិនប្រាកដថា អាចទប់ស្កាត់បាននោះទេ»។
លោក ភារៈ បន្ថែមថា ស្របពេលដែលកម្ពុជា មិនទាន់មានច្បាប់ដាក់ប្រទេសក្នុងភាពអាសន្ន ដូច្នេះរដ្ឋាភិបាលគួរតែបន្តហាមប្រាមការជួបជុំជាលក្ខណៈទ្រង់ទ្រាយធំបន្តទៀត និងផ្សព្វផ្សាយឲ្យប្រជាពលរដ្ឋបន្តការប្រុងប្រយ័ត្ន និងរក្សាអនាម័យឲ្យបានខ្ជាប់ខ្ជួនជាប់ជានិច្ច ព្រោះថា បើកម្ពុជាមានករណីផ្ទុះជាលើកទី ២ លទ្ធផលអាចនឹងហួសពីការរំពឹងទុក៕