.jpg)
ជនជាប់ចោទ ឈ្មោះ រស់ សុខុន អាយុ ២៥ ឆ្នាំ ពេលត្រូវនាំឡើងសវនាការ។ រូបថត គីម សារុំ
ភ្នំពេញៈ ជនជាប់ចោទម្នាក់ត្រូវបានតុលាការកំពូលជំនុំជម្រះពីម្សិលមិញពាក់ព័ន្ធករណីកាប់សម្លាប់កម្មករខ្មែរ ២ នាក់ប្តីប្រពន្ធប្រព្រឹត្តនៅថៃក្នុងឆ្នាំ ២០០៩ រួចគេចខ្លួនមកកម្ពុជាវិញ តែត្រូវសមត្ថកិច្ចចាប់ខ្លួនក្នុងឆ្នាំ ២០១០ នៅខេត្តឧត្ដរមានជ័យ។
ជនជាប់ចោទ ឈ្មោះ រស់ សុខុន អាយុ ២៥ ឆ្នាំ បានឆ្លើយក្នុងសវនាការថាមុនឆ្នាំ ២០១០ គាត់បានទៅធ្វើការនៅថៃហើយបានជួបជនរងគ្រោះឈ្មោះ ហួន សុខានិងប្ដីឈ្មោះ ភោគ សីហា។ លុះដល់ខែសីហាឆ្នាំ ២០០៩ ភោគសីហា បានឈ្លោះគ្នាជាមួយបុរសម្នាក់ និងបានវាយតប់គ្នា។ពេលនោះគាត់ (ជនជាប់ចោទ) ក៏ចូលទៅឃាត់ ព្រោះជនរងគ្រោះប្តីប្រពន្ធក៏ជាប់សាច់ញាតិគាត់ដែរ។ប៉ុន្តែពេលឃាត់ស្រាប់ តែភោគ សីហា វាយគាត់ធ្វើឲ្យគាត់តដៃនិងស្រវាបានកាំបិតកាប់វិញទៅ។
ជនជាប់ចោទថា៖ «ក្រុមអ្នកកាប់ជនរងគ្រោះត្រូវបានសមត្ថកិច្ចថៃចាប់ខ្លួន តែខ្ញុំមិនដឹងថាមានគ្នាប៉ុន្មាននាក់ទេ ហើយខ្ញុំរត់មកស្រុកខ្មែរវិញ»។
ក៏ប៉ុន្តែតាមកំណត់ហេតុតុលការថា ស្រ្តីរងគ្រោះត្រូវជនល្មើសចាប់អារកស្លាប់។រីឯប្តីគាត់ត្រូវបានគេកាប់ជាច្រើនកាំបិតដួលស្លាប់នៅកន្លែងកើតហេតុ (នៅថៃ)។
សំណុំរឿងនេះត្រូវសាលាដំបូងខេត្តឧត្តរមានជ័យផ្តន្ទាទោសក្នុងឆ្នាំ ២០១១ ដាក់ពន្ធនាគារ ១៥ ឆ្នាំ។ តែជនជាប់ចោទបានប្តឹងឧទ្ធរណ៍ហើយត្រូវសាលាឧទ្ធរណ៍បន្ថយទោសមកនៅ ១៤ ឆ្នាំកាលពីឆ្នាំ ២០១៥ ហើយជនជាប់ចោទក៏ប្ដឹងមកកំពូលទៀត។
លោក ឈួន ចាន់ថា តំណាងមហាអយ្យការសន្និដ្ឋានថា ជនជាប់ចោទសុំបន្ថយទោស ប៉ុន្តែឧទ្ធរណ៍បន្ថយទោសគាត់ហើយ។ លោកថា៖ «ខ្ញុំស្នើក្រុមប្រឹក្សាជំនុំជម្រះពិចារណាតាមច្បាប់»។
រីឯ លោក អុឹង វាសនា មេធាវី ជនជាប់ចោទថា កូនក្តីលោកសុំបន្ថយទោស តែបានសារភាពមករហូតដែរ។ក្រោយ ជំនុំជម្រះ លោក ចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះថា សាលដីកានេះនឹងប្រកាសនៅថ្ងៃទី ១ ខែកក្កដា៕
