.jpg)
លោក មាជ សុវណ្ណារ៉ា (ស្ដាំ) និងសកម្មជនអតីត CNRP នៅតុលាការកំពូលកាលពីឆ្នាំមុន។ ផា លីណា
ភ្នំពេញៈ សំណុំរឿងអតីតសកម្មជនគណបក្សសង្គ្រោះជាតិចំនួន ១១ នាក់ដែលពាក់ព័ន្ធនឹងករណីធ្វើកុបកម្មនៅជិតស្ពាននាគក្បែរវត្តភ្នំកាលពីឆ្នាំ ២០១៤ ត្រូវបានសាលាឧទ្ធរណ៍សម្រេចពន្យារពេលដោយមិនកំណត់កាលពីថ្ងៃសុក្រ បន្ទាប់ពីបានបើកសវនាការជំនុំជម្រះ ហើយទើបតែស្ដាប់ចម្លើយជនជាប់ចោទបានត្រឹម ៣ នាក់។
នៅក្នុងអង្គសវនាការដែលដឹកនាំដោយលោកចៅក្រម ប្លង់ សំណាង ប្រធានក្រុមប្រឹក្សាជំនុំជម្រះ និងមានសហប្រធានលោកស្រីចៅក្រម គឹម ដានី និងលោកចៅក្រម ងួន រតនា ខណៈតំណាងមហាអយ្យការមាន លោក ង៉ែត សារ៉ាត និងលោកព្រះរាជអាជ្ញា អ៊ឹម សុផាន នោះលោក មាជ សុវណ្ណារ៉ា បានឆ្លើយបំភ្លឺប្រាប់ចៅក្រមថា៖ «ពាក់ព័ន្ធនឹងរឿងក្តីនេះ គឺតុលាការចោទប្រកាន់គ្មានយុត្តិធម៌សម្រាប់រូបខ្ញុំទេព្រោះថានៅថ្ងៃកើតហេតុនោះខ្ញុំមិនបានដឹកនាំធ្វើកុបកម្មអីនោះទេ»។
ស្រដៀងគ្នានេះដែរលោក អឿន ណារិទ្ធ អតីតជំនួយការរបស់អតីតតំណាងរាស្ត្រលោកស្រី មូរ សុខហួរ និងលោក ឃិន ជំរឿន បានឆ្លើយបំភ្លឺក្នុងសវនាការដែរថា៖ «មុនពួកខ្ញុំទៅទីនោះ គឺបានបើកមើលព័ត៌មានតាមរយៈហ្វេសប៊ុកហើយក៏បានឃើញពីសកម្មភាពធ្វើកូដកម្មនោះ ប៉ុន្តែមិនមែនចូលរួមក្នុងការបង្កហិង្សាអីនោះទេ។ ការចោទថា ជាមេដឹកនាំធ្វើកុបកម្មគឺជារឿងមួយដែលអយុត្តិធម៌»។
អង្គសវនាការដែលក្រុមមេធាវីការពារសិទ្ធិឲ្យជនជាប់ចោទទាំង ១១ រូបមាន វត្តមានត្រឹមតែ ៦ រូបក្នុងចំណោម ៨ រូបរួមមាន មេធាវីលោក សំ សុគង់, លោកមេធាវី កែត ឃី,មេធាវី ម៉េង សុភារី, មេធាវី ចាន់ ចេង និងមេធាវី ២ រូបទៀត ខណៈលោកមេធាវី ជូង ជូងី និងលោកមេធាវី ហែម សុជាតិអវត្តមាន។
ប៉ុន្តែយ៉ាងណាក៏ដោយក្រុមមេធាវីទាំងនោះមិនបានសន្និដ្ឋានអ្វីទេនៅមុនពេលចៅក្រមសម្រេចពន្យារពេលសវនាការលើសំណុំរឿងនេះ។
ចៅក្រម ប្លង់ សំណាង បានប្រាប់ក្រុមមេធាវីថា ការពន្យារពេលនោះ «ដោយសារតែពេលវេលា ដូច្នេះតុលាការនឹងបន្តធ្វើនៅពេលណាមួយសមស្របបន្តទៀត ប៉ុន្តែមិនទាន់កំណត់ថ្ងៃខែជាក់លាក់ជូនមេធាវីទេព្រោះចាំមើលសាលជំនុំជម្រះបើទំនេរថ្ងៃណា តុលាការនឹងដាក់កម្មវិធី ហើយតុលាការនឹងកោះអញ្ឆើញមេធាវី ហើយតុលាការក៏សូមចិត្តកុំឲ្យមេធាវីតវ៉ាសុំពេលកៀកពេក ឬលឿនពេកអី»។
គួររំឭកដែរថានៅមុនសវនាការកាលពីថ្ងៃសុក្រចុងសប្ដាហ៍នោះ មានការរអាក់រអួលចរន្តអគ្គិសនី ដែលជាហេតុធ្វើឲ្យអង្គសវនាការត្រូវពន្យារពេលរហូតដល់ម៉ោងប្រមាណជាង ៩ ព្រឹកទើបអាចផ្តើម និងបានបញ្ចប់នៅម៉ោងប្រមាណជា ១២ ថ្ងៃត្រង់។
ដោយឡែកសវនាការនោះក៏មានវត្តមានដើមបណ្តឹងរដ្ឋប្បវេណីចូលរួម ១១ នាក់ផងដែរក្នុងចំណោម ៣៩ នាក់។
គួររំឭកដែរថាតាមអង្គហេតុនៃសំណុំរឿងនេះកាលពីថ្ងៃទី ១៤ កក្កដាឆ្នាំ ២០១៤ មានក្បួនធ្វើកូបកម្មធំមួយនៅស្ពាននាគនៅជិតរមណីយដ្ឋានវត្តភ្នំរាជធានីភ្នំពេញហើយនៅពេលនោះក៏មានការវាយតប់គ្នារវាងក្រុមកុបករ និងកងសន្តិសុខប្រចាំខណ្ឌដូនពេញបណ្តាលឲ្យមានរបួសទាំងសងខាង។ បន្ទាប់មកជនជាប់ចោទត្រូវបានសមត្ថកិច្ចឃាត់ខ្លួនជាបន្តបន្ទាប់។
សំណុំរឿងនេះត្រូវបានសាលាដំបូងរាជធានីភ្នំពេញបើកសវនាការ និងប្រកាសសាលក្រមនៅថ្ងៃទី ២១ ខែកក្កដាឆ្នាំ ២០១៥ ដោយសម្រេចផ្តន្ទាទោសឲ្យលោក មាជ សុវណ្ណារ៉ា លោក ឃិន ជំរឿន,អឿន ណារិទ្ធ ក្នុងម្នាក់ៗជាប់ពន្ធនាគារ ២០ ឆ្នាំ និង ៨ នាក់ទៀតឲ្យជាប់ពន្ធនាគារម្នាក់ៗ ៧ ឆ្នាំចោទបទ «ដឹកនាំកុបកម្ម និងចូលរួមកុបកម្ម» តាមបញ្ញត្តិមាត្រា ៤៥៦,៤៥៧ នៃក្រមព្រហ្មទណ្ឌ និងបង្គាប់ឲ្យរួមគ្នាសងដើមបណ្តឹង ៣២ នាក់ក្នុងម្នាក់ៗ ៨ លានរៀល និង ៧ នាក់ទៀតឲ្យសងម្នាក់ៗ ២០ លានរៀល៕
