ភ្នំពេញ៖ ស្រ្តីជនជាតិខ្មែរ អាយុ៥៦ឆ្នាំម្នាក់ទៀត រស់នៅក្នុងខណ្ឌ៧មករា រាជធានីភ្នំពេញ បានទទួលមរណភាពដោយសារជំងឺកូវីដ១៩ នាថ្ងៃពុធទី៣១ ខែមីនា ឆ្នាំ២០២១នេះ ដែលនេះជាករណីស្លាប់ទី១២ហើយ ដោយសារជំងឺកូវីដ ក្នុងប្រទេសកម្ពុជា។ នេះបើតាមសេចក្តីប្រកាសរបស់ក្រសួងសុខាភិបាលចេញនៅល្ងាចថ្ងៃនេះ។
ក្រសួងបានឱ្យដឹងថា នៅថ្ងៃទី២៦ ខែមីនា ឆ្នាំ២០២១ ស្ត្រីរូបនេះ ត្រូវបានរកឃើញថា មានវិជ្ជមានវីរុសកូវីដ១៩ ដោយមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា ហើយត្រូវបានដាក់ឱ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត នៅថ្ងៃដដែលនោះដែរ។
អ្នកជំងឺមានស្ថានភាពធ្ងន់ធ្ងរ តាំងពីចូលសម្រាកដំបូង ដែលតម្រូវឱ្យក្រុមគ្រូពេទ្យ ប្រើប្រាស់ម៉ាស៊ីនជំនួយដង្ហើម ដើម្បីជួយសង្គ្រោះរហូតដល់ថ្ងៃទី ៣១ ខែមីនា ឆ្នាំ២០២១។ ទោះបីជាក្រុមគ្រូពេទ្យបានខិតខំយកចិត្តទុកដាក់ជួយសង្គ្រោះ តាមបច្ចេកទេសយ៉ាងណាក៏ដោយ ក៏នៅតែមិនអាចជួយសង្គ្រោះជីវិតអ្នកជំងឺបានឡើយ។
ក្រសួងបានបញ្ជាក់ថា ៖ «ការសន្និដ្ឋានរបស់ក្រុមគ្រូពេទ្យ ស្ត្រីនេះបានស្លាប់បាត់បង់ជីវិតដោយសារវិបត្តិផ្លូវដង្ហើមធ្ងន់ធ្ងរ និងរលាកសួតទាំងសងខាងធ្ងន់ធ្ងរ បណ្តាលមកពីវីរុសកូវីដ១៩នៅវេលាម៉ោង ១០ :៣៧នាទីព្រឹក»៕