.jpg)
រថយន្តក្នុងគ្រោះថ្នាក់ចរាចរណ៍ ដែលបណ្តាលឲ្យស្ត្រីជនជាតិចិនម្នាក់ស្លាប់។ សហការី
ក្រចេះ:ស្ត្រីជនជាតិចិនម្នាក់ បានស្លាប់ភ្លាមៗ នៅនឹងកន្លែងកើតហេតុ នៅពេលរថយន្តដែលគាត់ធ្វើដំណើរជាមួយបានជួបគ្រោះថ្នាក់ចរាចរណ៍ដោយបុកពីក្រោយរថយន្តដឹកឈើដែលកំពុងធ្វើដំណើរស្របទិសគ្នានៅលើកំណាត់ផ្លូវជាតិលេខ ៧ ត្រង់ចំណុចភូមិ-ឃុំអូរគ្រៀង ស្រុកសំបូរ កាលពីយប់ថ្ងៃទី ៣១ ខែ មីនា ឆ្នាំ ២០១៩។
លោក តូច ស៊ីថា នាយនគរបាលប៉ុស្តិ៍ឃុំអូរគ្រៀង បានឲ្យដឹងកាលពីម្សិលមិញថា ស្ត្រីរងគ្រោះជនជាតិចិនដែលបានស្លាប់ក្នុងគ្រោះថ្នាក់ចរាចរណ៍នោះ ឈ្មោះ Shi Liang Fei អាយុ ៤៣ ឆ្នាំ មានស្រុកកំណើតនៅខេត្ត Zhe Jiang ប្រទេស ចិន បានចូលមកស្នាក់នៅនិងបម្រើការងារក្នុងប្រទេស កម្ពុជា កាលពីថ្ងៃទី ១៩ ខែ កុម្ភៈ ឆ្នាំ ២០១៧។
លោក ស៊ីថា ដែលបានដឹកនាំកម្លាំងនគរបាលប៉ុស្តិ៍ចុះទៅពិនិត្យផ្ទាល់ ដល់កន្លែងកើតហេតុនោះ បានថ្លែងថា នៅមុនពេលកើតហេតុ រថយន្តស្ត្រីរងគ្រោះ ដែលបើកបរដោយបុរសជនជាតិចិនឈ្មោះ Qian Lijun អាយុ ៥២ ឆ្នាំ បានធ្វើដំណើរពីខេត្តស្ទឹងត្រែង ក្នុងទិសដៅទៅរាជធានីភ្នំពេញ។
ប៉ុន្តែដោយខ្វះការប្រុងប្រយ័ត្ន លោក Lijun ដែលគ្មានប័ណ្ណបើកបរជាប់ខ្លួន បានបុកពីក្រោយរថយន្តកែច្នៃដឹកឈើក្ដារបន្ទះ ១ គ្រឿងដែលបើកបរដោយឈ្មោះមាន ម៉ុល អាយុ ២០ ឆ្នាំ ជាអ្នករស់នៅក្នុងភូមិ-ឃុំ កើតហេតុខាងលើ និងដែលកំពុងធ្វើដំណើរស្របទិសគ្នា នៅលើកំណាត់ផ្លូវជាតិលេខ ៧ ត្រង់ចំណុចភូមិ-ឃុំអូរគ្រៀង ស្រុកសំបូរ ពេញមួយទំហឹងតែម្ដង។
លោកថា៖ «យោងតាមការពិនិត្យភាពជាក់ស្ដែងនៅកន្លែងកើតហេតុ និងការសាកសួរព័ត៌មានជំហានដំបូង គ្រោះថ្នាក់ចរាចរណ៍នេះ បង្កឡើងដោយអ្នកបើកបរជនជាតិចិនឈ្មោះ Qian Lijun ដែលបើកបរក្នុងល្បឿនលឿន និងខ្វះការប្រុងប្រយ័ត្ន ទៅបុកពីក្រោយរថយន្តអ្នកដទៃ បង្កឲ្យអ្នករួមដំណើរជាមួយខ្លួនស្លាប់»។
លោក ស៊ីថា បន្តថា ក្រោយការពិនិត្យ និងវាស់វែង សមត្ថកិច្ចបាននាំយករថយន្តបង្កហេតុ និងរថយន្តដឹកឈើនោះ មករក្សាទុកនៅប៉ុស្តិ៍នគរបាលរដ្ឋបាលឃុំអូរគ្រៀង ដើម្បីរង់ចាំការដោះស្រាយនៅពេលក្រោយ ខណៈសពស្ត្រីរងគ្រោះ ត្រូវបានបញ្ជូនមកភ្នំពេញ ជាមួយបុរសជនជាតិចិនដែលជាអ្នកបើករថយន្តបង្កដើម្បីបញ្ជូនឲ្យសាច់ញាតិនាំយកទៅធ្វើបុណ្យតាមប្រពណី។
លោក ហ៊ន ប៉ូច ស្នងការរងទទួលបន្ទុកផ្នែកចរាចរណ៍ផ្លូវគោកខេត្តក្រចេះ បានឲ្យដឹងថា យោងតាមមាត្រា ៨៥ នៃច្បាប់ចរាចរណ៍ផ្លូវគោក ក្នុងប្រទេសកម្ពុជា អ្នកបើកបរជនជាតិចិន ដែលគ្មានប័ណ្ណបើកបរជាប់ខ្លួននិងបើកបរបង្កគ្រោះថ្នាក់ចរាចរណ៍បណ្ដាលឲ្យអ្នករួមដំណើរជាមួយស្លាប់បែបនេះ អាចប្រឈមនឹងការផ្ដន្ទាទោសជាប់ពន្ធនាគារពី ១ ឆ្នាំ ទៅ ៣ ឆ្នាំ និងពិន័យជាប្រាក់ពី ៤ លានរៀល ដល់ ១៥ លានរៀល។
លោកថ្លែងថា៖ «តាមធម្មតាជនបរទេសដែលអាចបើករថយន្តក្នុងប្រទេសដទៃទៀត ក្រៅពីប្រទេសរបស់ខ្លួន ចាំបាច់ ត្រូវមានប័ណ្ណបើកបរអន្តរជាតិ ឬប័ណ្ណបើកបរដែលចេញដោយប្រទេសដែលខ្លួនកំពុងបំពេញការងារនិងស្នាក់នៅ ប៉ុន្តែ លោក Qian Lijun មិនមានប័ណ្ណបើកបរជាប់ខ្លួននោះទេ។ ម្យ៉ាងទៀត គាត់បានបើកបរទៅបុកពីក្រោយរថយន្តអ្នកដទៃ ដែលធ្វើដំណើរស្របទិសគ្នា»។
ទោះជាបែបណាក្ដី លោក អៀ ចរិយា ទីប្រឹក្សា វិទ្យាស្ថានជាតិសុវត្ថិភាពចរាចរណ៍ផ្លូវគោកថ្លែងថា អ្នកបើកបររថយន្តដឹកឈើ ក៏អាចរួមចំណែកក្នុងការទទួលខុសត្រូវលើករណីនេះផងដែរ ប្រសិនបើរកឃើញថា គាត់បានដឹកឈើខុសលក្ខណ្ឌបច្ចេកទេស ។
លោកពន្យល់ថា៖ «ក្នុងករណីដឹកទំនិញលយចេញពីទ្រុងរថយន្តចាំបាច់ត្រូវដាក់ស្លាកសញ្ញាសម្គាល់អំពីសុវត្ថិភាពចរាចរណ៍ ដើម្បីឲ្យគេបានដឹង បើពុំដាក់ទេនោះ គឺជាកំហុសឆ្គងផ្នែកបច្ចេកទេសដែលទាមទារឲ្យអ្នកដឹកជញ្ជូនបែបនោះមានការទទួលខុសត្រូវផ្នែកច្បាប់ចំពោះជនរងគ្រោះ»។
បើតាមលោកស៊ីថា លោក មាន ម៉ុល ដែលជាអ្នកបើករថយន្តកែច្នៃដឹកឈើនោះ បានដឹកក្ដារបន្ទះ ១៤០ សន្លឹក លយចេញពីទ្រុងរថយន្ត ប៉ុន្តែបានចងទៃពណ៌ សសម្រាប់ជាសញ្ញាសម្គាល់ពីសុវត្ថិភាពចរាចរណ៍បានត្រឹមត្រូវហើយគាត់បើកយឺ៕
