ស្ទឹងត្រែងៈ មន្ត្រីនគរបាលជាស្ត្រីដែលបានបំបៅដោះកូនក្នុងពេលបំពេញការងារនៅស្រុកសៀមប៉ាងត្រូវបានដំឡើងឋានន្តរស័ក្ដិកាលពីម្សិលមិញ ដើម្បីលើកទឹកចិត្តដល់ស្ត្រីជានគរបាល ដែលបានពុះពារបំពេញការងារ និងបានដើរតួនាទីជាម្តាយគំរូដល់ស្ត្រីដទៃក្នុងការបំបៅដោះកូន។
ការដំឡើងឋានន្តរស័ក្ដិនេះធ្វើឡើងបន្ទាប់ពីស្ត្រីជាមន្ត្រីនគរបាលរូបនេះ ត្រូវបានថ្នាក់ដឹកនាំរបស់ខ្លួនហៅទៅចុះកិច្ចសន្យាឱ្យបញ្ឈប់ការបង្ហោះរូបភាពបំបៅដោះកូន ដែលធ្វើឱ្យផ្ទុះការរិះគន់យ៉ាងខ្លាំងពីមជ្ឈដ្ឋានជាច្រើន រួមទាំងពីក្រសួងមហាផ្ទៃផងដែរ។
ប៉ុន្តែប្រធានការិយាល័យចាត់តាំងបុគ្គលិកនៃស្នងការដ្ឋាននគរបាលខេត្តស្ទឹងត្រែងលោក ឃួន គឹមលី ប្រាប់ភ្នំពេញប៉ុស្តិ៍ ថាការបំពាក់ឋានន្តរស័ក្ដិនេះគឺដើម្បីជាសក្ខីភាព និងលើកទឹកចិត្តដល់ស្ត្រីដែលបានបំពេញការងារបានល្អក្នុងអង្គភាពរបស់ខ្លួន។
លោកថា៖ «សេចក្តីសម្រេចមានហើយ រឿងឡើងស័ក្តិ គាត់ (ស្ត្រី) ឡើងស័ក្ដិពីអនុសេនីយ៍ទោទៅអនុសេនីយ៍ឯក កម្មវិធីបំពាក់ស័ក្តិឱ្យគាត់ ស័ក្តិ ៣ ចុះក្រោម ខាងអគ្គស្នងការនគរបាលជាតិ អ្នកចេញ»។ ការបំពាក់ស័ក្ដិនេះមិនត្រឹមលើកទឹកចិត្តដល់គាត់ម្នាក់ទេ គឺលើកទឹកចិត្តដល់ស្ត្រីទាំងអស់ ដោយឡែកសម្រាប់ស្ត្រីជានគរបាលខេត្តស្ទឹងត្រែងដែលបានពុះពារក្នុងការងារហើយក៏ជាសក្ខីកម្មមួយបញ្ជាក់ថា គាត់ជានារីបានប្រឹងប្រែងបំពេញការងារ។
លោក គឹមលី បានគូសបញ្ជាក់ថា ការផ្តល់ឋានន្តរស័ក្ដិដល់អនុសេនីយ៍ទោលោកស្រី ស៊ីថុង សុខា ត្រូវបានស្នើឡើងតាំងពីប៉ុន្មានខែមុនមកម្ល៉េះ និងធ្វើឡើងតាមនីតិវិធីច្បាប់។ លោកថា៖ «យើងរៀបចំសំណើសុំដំឡើងស័ក្ដិឱ្យគាត់យូរដែរហើយ (២ ខែមុន) និងបានបញ្ជូនទៅនាយកដ្ឋានបុគ្គលិកដែរ ប៉ុន្តែស្របពេលនោះគឺមានហេតុការណ៍កើតឡើង សេចក្តីសម្រេចឡើងស័ក្ដិធ្លាក់មកលឿន ស្របពេលជាមួយគ្នា»។
លោកស្រីអនុសេនីយ៍ទោ ស៊ីថុង សុខា អធិការរងទទួលបន្ទុកផែនសណ្តាប់ធ្នាប់នៃអធិការដ្ឋាននគរបាលស្រុកសៀមប៉ាងមានវ័យ ៣០ ឆ្នាំបានចូលបម្រើការងារជានគរបាលតាំងពីឆ្នាំ ២០១២។ លោកស្រីបានប្រាប់ភ្នំពេញប៉ុស្តិ៍ថា លោកស្រីនឹងខិតខំបំពេញការងារបន្ថែមទៀត ដើម្បីបម្រើដល់ប្រយោជន៍សាធារណៈ បន្ទាប់ពីឡើងឋានន្តរស័ក្ដិ។
លោកស្រីថា៖ «ខ្ញុំត្រូវដំឡើងពីអនុសេនីយ៍ទោ (ស័ក្ដិ ២) ទៅអនុសេនីយ៍ឯក (ស័ក្ដិ ៣) ខ្ញុំត្រូវតែប្រឹងបន្តទៀត ទោះបីខ្ញុំហត់នឿយម៉េចក៏ដោយ។ ខ្ញុំត្រូវតែប្រឹងទៀតព្រោះអីការងារជានគរបាលខ្ញុំស្រឡាញ់តាំងពីតូច ព្រោះខ្ញុំចង់បម្រើជាតិ ហើយចង់ក្លាយជាមនុស្សម្នាក់ដែលរឹងមាំដូចមនុស្សប្រុសដែលធ្វើបាន»។
លោកស្រី សុខា ក៏ផ្តាំផ្ញើដល់ស្ត្រី និងមាតាទាំងអស់ត្រូវមានភាពក្លាហាន និងរឹងមាំ ទោះស្ថិតក្នុងកាលៈទេសៈណាក៏ដោយ។
លោកស្រីបញ្ជាក់ថា៖ «ខ្ញុំសូមផ្តាំទៅស្ត្រីដែលជាមាតាគ្រប់គ្នាឱ្យមានភាពរឹងមាំអង់អាចហើយនិងបំបៅដោះកូនដោយទឹកដោះ ទោះបីជារវល់យ៉ាងណាក៏ដោយត្រូវឆ្លៀតពេលផ្គត់ផ្គង់ទឹកដោះដល់កូនឱ្យបានពេញលេញ»។
ជាមួយគ្នានេះដែរលោកស្រី ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា បានឧបត្ថម្ភថវិកា ១០ លានរៀល ខណៈសប្បុរសជនផ្សេងទៀតក៏បានឧបត្ថម្ភថវិកាមួយចំនួនដល់លោកស្រី ស៊ីថុង សុខា ដើម្បីជាការលើកទឹកចិត្ត និងជួយសម្រាលការលំបាកក្នុងជីវភាពរស់នៅប្រចាំថ្ងៃ។
ការដំឡើងឋានន្តរស័ក្ដិនេះធ្វើឡើងបន្ទាប់លោកស្រី សុខា បានបង្ហោះរូបភាពបំបៅដោះកូនកាលពីថ្ងៃទី ២ ខែ មីនា ឆ្នាំ ២០២១ ដោយសរសេរថា៖ «ព្រោះតែពាក្យថា ម្តាយមិនថា ក្នុងកាលៈទេសៈណាទេដើម្បីកូនភ្លេចអស់ហើយភាពអៀនខ្មាស (នេះហើយជីវិតពិត)»។
ប៉ុន្តែក្រោយការបង្ហោះនេះ លោកស្រីត្រូវបានថ្នាក់ដឹកនាំរបស់ខ្លួនអញ្ជើញទៅធ្វើកិច្ចសន្យាជាលាយលក្ខណ៍អក្សរ មិនឱ្យបង្ហោះរូបភាពបែបនេះ ដោយចាត់ទុកថា ប៉ះពាល់ស្ត្រី និងអង្គភាពនគរបាល។ បន្ទាប់ពីទទួលបានដំណឹងនេះ ក្រុមការងារយេនឌ័រ ក្រសួងមហាផ្ទៃបានផ្ញើលិខិតទៅអភិបាលខេត្តស្ទឹងត្រែងឱ្យពិនិត្យ និងស្រាវជ្រាវលើករណីនេះ និងជំរុញឱ្យមានការលើកទឹកចិត្តដល់ស្ត្រីជាមន្ត្រីនគរបាលដែលបំបៅដោះកូននេះដោយលើកឡើងថា ការបំបៅដោះកូនគឺជាការចាំបាច់សម្រាប់ម្តាយដែលគួរឱ្យគោរព និងគួរតែមានការលើកទឹកចិត្ត៕
វីដេអូ៖