ភ្នំពេញៈ ឯកអគ្គរាជទូតកម្ពុជាប្រចាំសាធាណរដ្ឋកូរ៉េលោក ឡុង ឌីម៉ង់ បានប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា ក្រុមការងារស្ថានទូតបានជួយអន្តរាគមន៍ដល់ពលករខ្មែរម្នាក់ដែលមានជំងឺបាត់បង់ស្មារតីឱ្យបានត្រឡប់ទៅកាន់ប្រទេសកម្ពុជា វិញហើយ បន្ទាប់ពីបានជួយអន្តរាគមន៍នាំយកទៅព្យាបាលនៅមន្ទីរពេទ្យក្នុងប្រទេសកូរ៉េបានធូរស្រាលឡើងវិញ។
លោក ឡុង ឌីម៉ង់ បានថ្លែងថា ពលករខ្មែរដែលមានជំងឺបាត់បង់ស្មារតី ឬភ្លេចការចងចាំនោះ ឈ្មោះ រ៉ន មករា ជាកម្មករបម្រើការងារនៅក្នុងរោងចក្រផលិតគ្រឿងបន្លាស់ និងដំឡើងទូទឹកកកមួយក្នុងតំបន់ Gimhae ភាគខាងត្បូងទីក្រុង Busan។
បន្ទាប់ពីជួយអន្តរាគមន៍នាំពលកររូបនោះយកទៅព្យាបាលនៅក្នុងមន្ទីរពេទ្យ រហូតបានធូរស្រាលឡើងវិញ ក្រុមការងារស្ថានទូតក៏បានជួយអន្តរាគមន៍រៀបចំឯកសារផ្សេងៗជូនដល់គាត់ ដើម្បីត្រឡប់ទៅកម្ពុជាវិញផងដែរ ព្រោះគាត់បានធ្វើឱ្យបាត់បង់នូវឯកសារសំខាន់ៗមួយចំនួន រួមមាន លិខិតឆ្លងដែន និងបណ្ណសម្គាល់ខ្លួននៅកន្លែងការងាររបស់ពលករនោះ ក្នុងប្រទេសកូរ៉េជាដើម។
លោកបានបញ្ជាក់ថា៖ «នៅពេលនេះគាត់បានទៅដល់ប្រទេសកម្ពុជា វិញហើយ និងកំពុងធ្វើចត្តាឡីស័ក ១៤ ថ្ងៃ នៅក្នុងមន្ទីរពេទ្យមិត្តភាពកម្ពុជា-រុស្ស៊ី ក្នុងរាជធានីភ្នំពេញ»។
បើតាមលោកឯកអគ្គរាជទូតក្នុងអំឡុងពេលធ្វើដំណើរតាមជើងយន្តហោះពីកូរ៉េមកកម្ពុជាវិញកាលពីយប់ថ្ងៃទី ២៦ ខែ កុម្ភៈ ឆ្នាំ ២០២១ លោក រ៉ន មករា ត្រូវបានក្រុមការងារស្ថានទូត ជូនដំណើររហូតដល់ខាងក្នុងព្រលានយន្តហោះ និងបានផ្ដាំផ្ញើដល់មិត្តរួមការងាររបស់គាត់មួយចំនួន ព្រមទាំងពលករខ្មែរនៅកូរ៉េមួយចំនួនទៀត ដែលត្រូវធ្វើដំណើរត្រឡប់មកកម្ពុជាវិញដែរនោះជួយមើលថែរគាត់រហូតដល់ភ្នំពេញ។ ក្រុមការងារក៏បានទាក់ទងដល់ក្រុមគ្រួសាររបស់គាត់នៅកម្ពុជាឱ្យមកចាំទទួលគាត់ ពេលគាត់ទៅដល់ព្រលានយន្តហោះអន្តរជាតិភ្នំពេញផងដែរ។
ចំពោះករណីស្ត្រីខ្មែរម្នាក់ ឈ្មោះ ឌុច រតនា ដែលបានរៀបការជាមួយបុរសជនជាតិកូរ៉េ ហើយបានបាត់ខ្លួន ក្រោយពីនាងបានទៅរស់នៅផ្ទះខាងប្ដីក្នុងទីក្រុង Seoul បានជាង ២ ខែដោយគ្មានមូលហេតុនោះ លោក ឡុង ឌីម៉ង់ បានប្រាប់ ភ្នំពេញ ប៉ុស្តិ៍ថា ២ ថ្ងៃក្រោយពីស្ថានទូតបានប្រកាសស្វែងរកនាងតាមប្រព័ន្ធ Facebook ផ្លូវការរបស់ស្ថានទូត [ខ្មែរនៅកូរ៉េ] កាលពីថ្ងៃទី ២២ ខែ កុម្ភៈ ឆ្នាំ ២០២១ នាងបានផ្ដល់ដំណឹងតាមរយៈ Comment លើប្រព័ន្ធ Facebook ថា នាងមាន «សុវត្ថិភាព» ជាធម្មតា ប៉ុន្តែនាងមិនប្រាប់ពីទីតាំងដែលនាងកំពុងស្នាក់នៅនោះទេ។
ទោះយ៉ាងណា ក្រុមការងារស្ថានទូតនៅតែ ទទូចសុំឱ្យនាងមកបង្ហាញខ្លួននៅស្ថានទូត ដើម្បីរាយការណ៍ពីមូលហេតុដែលនាំឱ្យនាងត្រូវគេចចេញពីផ្ទះបុរសជាប្ដី ជាប្រយោជន៍ដើម្បីស្ថានទូតមានកិច្ចជួយអន្តរាគមន៍តាមផ្លូវច្បាប់៕