ភ្នំពេញៈ អាជ្ញាធរជាតិប្រយុទ្ធនឹងជំងឺអេដស៍គ្រោងចែកស្រោមអនាម័យជាង ៥ សែនស្រោម ដល់សាធារណជនក្នុងអំឡុងពេលបុណ្យអុំទូកចុងសប្ដាហ៍នេះដើម្បីធ្វើយុទ្ធនាការផ្សព្វផ្សាយពីបញ្ហាមេរោគអេដស៍ និងជំងឺអេដស៍ ជាពិសេសចំពោះគោលដៅអ្នកស្រឡាញ់ភេទដូចគ្នា និងក្រុមអ្នកចាក់គ្រឿងញៀន។ នេះបើតាមលោក ហោ ប៊ុនឡេង អនុប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងប្រាប់ភ្នំពេញប៉ុស្ដិ៍កាលពីម្សិលមិញ។
លោកថ្លែងថា៖ «យើងចែកស្រោមអនាម័យនេះមិនមែនក្នុងគោលបំណងចែកឲ្យយកទៅប្រើទេ ប៉ុន្ដែគោលបំណងសំខាន់នោះ គឺជាការជំរុញការយល់ដឹងនៃការប្រើប្រាស់ស្រោមអនាម័យដល់ប្រជាពលដ្ឋ។ យុទ្ធនាការនេះជាការផ្សព្វផ្សាយឲ្យពលរដ្ឋយល់ពីបញ្ហាអេដស៍ និងបង្ហាញនូវមធ្យោបាយនៃការប្រើប្រាស់ស្រោមអនាម័យ ដើម្បីបង្ការលើបញ្ហានេះ»។
លោក ប៊ុនឡេង បានអះអាងថា ការចែកស្រោមអនាម័យនេះមិនមែនជាការជំរុញឲ្យពលរដ្ឋរួមភេទទេ ប៉ុន្ដែជាការការពារទុកជាមុនផងដែរ ប្រសិនបើពួកគាត់មានបំណងក្នុងការរួមភេទ។ អាជ្ញាធរជាតិប្រយុទ្ធនឹងជំងឺអេដស៍បានសហការជាមួយអង្គការផ្សេងៗក្នុងការរៀបចំទីតាំងសម្រាប់ផ្សព្វផ្សាយ និងពិនិត្យឈាមរកមេរោគអេដស៍ ដោយឥតគិតថ្លៃដល់សាធារណជនចំនួន ៣ ទីតាំង គឺនៅសួនច្បារជ្រោយចង្វារ សួនច្បារវត្ដភ្នំ និងនៅកោះពេជ្រផងដែរ។
លោក ប៊ុនឡេង ថ្លែងថា៖ «កុមារបានប្រែក្លាយជាយុវជនជារៀងរាល់ឆ្នាំ ដូច្នេះយុទ្ធនាការផ្សព្វផ្សាយពីបញ្ហាអេដស៍នេះ យើងត្រូវតែធ្វើជាបន្តបន្ទាប់ ហើយការអប់រំបច្ចុប្បន្ននេះគឺយើងបានបញ្ជ្រាបនូវចំណេះដឹងថ្មីៗពីបញ្ហាអេដស៍នេះទៅដល់យុវជនថែមទៀត»។
លោក ប៊ុនឡេង បានឲ្យដឹងថាកម្ពុជាអាចត្រួតត្រាស្ថានការណ៍រាលដាលមេរោគអេដស៍ គឺមិនអនុញ្ញាតឲ្យវាបន្តកើតឡើងតទៅទៀតទេ ដោយបានផ្ដោតជាសំខាន់ទៅលើក្រុមនារីដែលពួកគាត់បម្រើការសប្បាយនៅតាមកន្លែងកម្សាន្តសប្បាយផ្សេងៗជាដើម។
លោក ប៊ុនឡេង ថ្លែងថា៖ «យើងសឹងតែត្រួតត្រាបានទាំងស្រុងតែម្ដង លែងឲ្យបញ្ហាអេដស៍នេះកើតឡើងជាបញ្ហាទៀតហើយ។ ប៉ុន្ដែអ្វីដែលយើងនៅមានការព្រួយបារម្ភខ្លះដែរនោះគឺក្រុមអ្នកដែលចាក់គ្រឿងញៀន និងក្រុមបុរសស្រលាញ់បុរស។ ដូច្នេះបានយើងនៅតែបន្តធ្វើ និងកំណត់ថាកម្ពុជាយើងនឹងលុបបំបាត់អេដស៍នេះឲ្យបាននៅឆ្នាំ ២០២៥»។
លោក ជួប សុខចំរើន នាយកប្រតិបត្តិអង្គការខាណាបានអះអាងថានឹងសហការជាមួយអាជ្ញាធរជាតិប្រយុទ្ធនឹងជំងឺអេដស៍ក្នុងការចូលរួមផ្សព្វផ្សាយការអប់រំតាមរយៈសៀវភៅ សារ និងសម្ភារអប់រំផ្សេងៗទៀតលើបញ្ហាអេដស៍។
លោកថ្លែងថា៖ «ប្រជាជនដែលមកកម្សាន្តក្នុងឱកាសបុណ្យអុំទូក ពួកគាត់អាចអានសារដែលយើងបានផ្សព្វផ្សាយ និងទទួលបានសៀវភៅអប់រំពីបញ្ហាអេដស៍ ជំងឺអេដស៍ និងបញ្ហាសុខភាពផ្សេងទៀត។ យើងក៏មានជាបន្ទប់ សម្រាប់ពិគ្រោះ និងផ្ដល់ប្រឹក្សាពាក់ព័ន្ធនឹងការធ្វើតេស្តឈាមអំពីមេរោគអេដស៍ក្នុងអំឡុងពេលពិធីបុណ្យ ៣ ថ្ងៃនេះផងដែរ»។
លោក សុខចំរើន បានបញ្ជាក់ថាក្នុងពេលថ្មីៗនេះ អង្គការ ខាណា បានរកឃើញថា ក្រុមស្រឡាញ់ភេទដូចគ្នា គឺជាក្រុមដែលកំពុងប្រឈមមុខក្រោយពេលពួកគេបានមកធ្វើតេស្តឈាមរួចឃើញមានផ្ទុកមេរោគអេដស៍។
លោកបានថ្លែងថា៖ «ករណីដែលរកឃើញថ្មី ភាគច្រើនជាក្រុមអ្នកដែលស្រលាញ់ភេទដូចគ្នា បុរសស្រលាញ់បុរសដែលស្ថិតនៅក្នុងវ័យក្មេង។ ខាងអង្គការខ្ញុំបានរកឃើញជាទូទៅក្នុង ១ ថ្ងៃ អត្រាដែលយើងរកឃើញប្រហែលជា ១ នាក់»។ អាជ្ញាធរជាតិប្រយុទ្ធនឹងជំងឺអេដស៍បានឲ្យថា អត្រាឆ្លងជំងឺអេដស៍នៅកម្ពុជាបានថយចុះស្ថិតក្នុងស្ថានការណ៍គ្រប់គ្រងបាន។ ខណៈតាមការប៉ាន់ស្មានថា បច្ចុប្បន្នកម្ពុជាមានអ្នករស់នៅជាមួយមេរោគអេដស៍ជាង ៧ ម៉ឺននាក់ក្នុងនោះអ្នកទទួលសេវាព្យាបាលដោយឱសថប្រឆាំងនឹងមេរោគអេដស៍មានជាង ៥ ម៉ឺននាក់៕