.jpg)
លោក ផៃ ស៊ីផាន អ្នកនាំពាក្យរាជរដ្ឋាភិបាល ថ្លែងក្នុងសន្និសីទកាលពីម្សិលមិញ។ ហេង ជីវ័ន
ភ្នំពេញៈ អង្គការសង្គមស៊ីវិលជាតិ និងអន្តរជាតិចំនួន ១១ កោតសរសើរដល់រដ្ឋសភា និងក្រសួងសេដ្ឋកិច្ច និងហិរញ្ញវត្ថុដែលតែងតែទទួលយកមតិយោបល់ និងធាតុចូលរបស់សង្គមស៊ីវិលក្នុងការធ្វើសេចក្ដីព្រាងច្បាប់ស្ដីពីហិរញ្ញវត្ថុ សម្រាប់ការគ្រប់គ្រងប្រចាំឆ្នាំ និងបានស្នើឱ្យរាជរដ្ឋាភិបាល គួរបង្កើតវេទិកាទៀងទាត់ឱ្យសាធារណជនចូលរួមផ្តល់ជាមតិយោបល់លើបញ្ហានេះផងដែរ។
លិខិតចុះថ្ងៃទី ២០ ខែវិច្ឆិកា ចំនួន ៤ ទំព័ររបស់អង្គការសង្គមស៊ីវិលដែលក្នុងនោះក៏មានអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា អង្គការតម្លាភាពកម្ពុជា វិទ្យាស្ថានតស៊ូមតិ និងគោលនយោបាយ និងអង្គការសម្ព័ន្ធភាពដៃគូដើម្បីអភិវឌ្ឍតាមបែបប្រជាធិបតេយ្យផងដែរនោះបានកោតសរសើរ និងអបអរដល់រដ្ឋសភា រាជរដ្ឋាភិបាល និងក្រសួងសេដ្ឋកិច្ច និងហិរញ្ញវត្ថុដែលបានបំពេញភារកិច្ចដ៏ជោគជ័យនាពេលកន្លងមក។
ក្រុមអង្គការទាំងនេះក៏កោតសរសើរដែលរដ្ឋសភា និងក្រសួងសេដ្ឋកិច្ច និងហិរញ្ញវត្ថុបានបើកឱកាស និងស្វាគមន៍នូវរាល់ការផ្ដល់យោបល់ធាតុចូល និងអនុសាសន៍ពីអ្នកពាក់ព័ន្ធនានា ដើម្បីធ្វើឱ្យក្របខណ្ឌគោលនយោបាយ និងសេចក្ដីព្រាងច្បាប់ស្ដីពីការគ្រប់គ្រងហិរញ្ញវត្ថុសម្រាប់ការគ្រប់គ្រងប្រចាំឆ្នាំមានភាពគ្រប់ជ្រុងជ្រោយ និងមានការចូលរួម។
លិខិតក្រុមអង្គការដដែលបានស្នើសុំឱ្យរដ្ឋាភិបាលធ្វើការផ្សព្វផ្សាយសេចក្ដីព្រាងច្បាប់នេះឱ្យបានពេញលេញសម្រាប់ប្រជាពលរដ្ឋ និងបង្កើតឱ្យមានកិច្ចពិភាក្សារវាងរដ្ឋសភា ក្រសួង ប្រជាពលរដ្ឋ និងអង្គការសង្គមស៊ីវិលដើម្បីរួមចំណែកជាមួយនឹងរដ្ឋាភិបាលក្នុងការពង្រឹងតម្លាភាព ដែលការធ្វើដូច្នេះជាផ្នែកមួយនៃការធ្វើកំណែទម្រង់។ «ជាមួយគ្នានេះដែរ រាជរដ្ឋាភិបាលគួរបង្កើតវេទិកា ឬយន្តការទៀងទាត់មួយសម្រាប់សាធារណជនចូលរួមវិភាគទានជាបដិមតិ (មតិផ្ទុយ) ក្នុងន័យស្ថាបនាក្នុងដំណើរការត្រួតពិនិត្យការអនុវត្តថវិកាដែលបានអនុម័តរួច»។
ក្រុមអង្គការបានស្នើឱ្យរដ្ឋាភិបាលគិតគូរហ្មត់ចត់ក្នុងការធានាឱ្យបាននូវការប្រមូលចំណូល។ ចំណូល និងចំណាយត្រូវធ្វើឡើងឱ្យមានសមតុល្យគ្នា ដើម្បីបញ្ចៀសការខ្ចីថវិកាពីបរទេសកាន់តែច្រើនថែមទៀត។ ក្រសួងទាំងអស់គួរតែកាត់បន្ថយការចំណាយមិនចាំបាច់ ហើយការចំណាយលើវិស័យការពារជាតិ សន្តិសុខ សណ្ដាប់ធ្នាប់សាធារណៈគួរតែបន្ថយដើម្បីយកចិត្តទុកដាក់លើវិស័យសេដ្ឋកិច្ច និងសង្គមឱ្យបានច្រើន។
ដោយស្វាគមន៍ការអន្តរាគមន៍ទាក់ទងនឹងជំងឺកូវីដ ១៩ ក្រុមអង្គការដដែលស្នើឱ្យរដ្ឋាភិបាលបន្ថែមការយកចិត្តទុកដាក់លើជំងឺមិនឆ្លង ការលៃលកបង្កើនថវិកាសម្រាប់វិស័យអប់រំ បណ្ដុះបណ្ដាលវិជ្ជាជីវៈឱ្យបានច្រើនជាងឆ្នាំមុន ព្រមទាំងយកចិត្តទុកដាក់លើថវិកាសម្រាប់ចំណាយនៅថ្នាក់ក្រោមជាតិ។
នៅកម្រិតម៉ាក្រូសេដ្ឋកិច្ច ក្រុមអង្គការទាំង ១១ បានស្នើឱ្យរដ្ឋាភិបាលប្រមូលចំណូលដោយឈរលើគោលការណ៍យុត្តិធម៌សង្គម សមធម៌ និង វិសមភាពសង្គម។ រដ្ឋាភិបាលគួរយកចិត្តទុកដាក់លើការចំណាយលើវិស័យអាទិភាព កម្ចី និងបំណុលបរទេសបញ្ហាប៉ះពាល់ពីកូវីដ១៩ និងការផ្អាកប្រព័ន្ធអនុគ្រោះពន្ធ EBA។
លិខិតរបស់អង្គការសង្គមស៊ីវិលបញ្ចប់ថា៖ «អាស្រ័យដូចបានគោរពជម្រាបជូនខាងលើ សូមរដ្ឋសភា និងក្រសួងសេដ្ឋកិច្ច និងហិរញ្ញវត្ថុមេត្តាទទួលយកនូវធាតុចូលសំខាន់ៗរបស់អង្គការសង្គមស៊ីវិល ដើម្បីពិចារណាដោយសេចក្ដីអនុគ្រោះ។ ក្រុមការងារយើងខ្ញុំ ត្រៀមខ្លួនជាស្រេចក្នុងការជួបពិភាក្សា ផ្លាស់ប្ដូរមតិយោបល់ក្នុងគោលបំណងរួមចំណែកអភិវឌ្ឍប្រទេសកម្ពុជាឱ្យបានរីកចម្រើន ឆ្ពោះទៅសម្រេចគោលដៅអភិវឌ្ឍន៍ប្រកបដោយចីរភាព»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាថ្លែងថា លិខិតនេះជាលិខិតបង្ហាញពីគោលជំហររបស់អង្គការសង្គមស៊ីវិល សម្រាប់ឱ្យរដ្ឋសភា និងសាធារណជនពិចារណា។ វាមានលក្ខណៈដូចជាលិខិតចំហ។
លោក ឡេង ប៉េងឡុង អ្នកនាំពាក្យរដ្ឋសភាថ្លែងថា លោកមិនបានឃើញលិខិតនោះទេ ហើយស្នើឱ្យសួរទៅលោក ជៀម យាបប្រធានគណៈកម្មការសេដ្ឋកិច្ចហិរញ្ញវត្ថុ ធនាគារ និងសវនកម្មនៃរដ្ឋសភា។ ប៉ុន្តែភ្នំពេញប៉ុស្តិ៍មិនអាចទាក់ទងលោក ជាម យៀប បានទេ។
ប៉ុន្តែលោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងពីម្សិលមិញថា ការធ្វើសេចក្ដីព្រាងច្បាប់ស្ដីពីការគ្រប់គ្រងហិរញ្ញវត្ថុតែងទទួលធាតុចូលពីភាគីផ្សេងៗរួមមានទាំងគណបក្សនយោបាយនានានៅក្នុងឧត្តមក្រុមប្រឹក្សាពិគ្រោះយោបល់។ ចំពោះការព្រួយបារម្ភលើបំណុលសាធារណៈ និងការខ្ចីប្រាក់បន្ថែមពីបរទេស លោក ស៊ីផាន ថ្លែងថា៖ «យើងខ្ចីគេទៅតាមលទ្ធភាពដែលយើងអាចសង។
យើងបានរៀបចំយុទ្ធសាស្ត្រថ្មីមួយទៀតក្នុងការស្ដារឡើងវិញបន្ទាប់ពីកូវីដ។ យើងខ្ចីអ្វីដែលមានសារៈសំខាន់សម្រាប់ស្ដារសេដ្ឋកិច្ចរបស់យើងបន្ទាប់ពីកូវីដ ហើយការប្រាក់ទាបបំផុត។ យើងមានផែនទីត្រឹមត្រូវក្នុងការរក្សាកម្ចីឱ្យក្រោមពិតានសុវត្ថិភាពនៃការសងបំណុលទៅវិញ»៕
