ភ្នំពេញៈ អង្គការអុកស្វាម (Oxfam) និងអង្គការ ៤ ផ្សេងទៀតបានរួមគ្នាធ្វើយុទ្ធនាការតាមបណ្តាញសង្គមរយៈពេល ១ ខែដើម្បីកៀរគរអ្នកគាំទ្រឱ្យបាន ១ លាននាក់ដើម្បីផ្ញើសារស្នើទៅថ្នាក់ដឹកនាំពិភពលោកសូមឲ្យផ្តល់ជូនដោយស្មើភាពឥតគិតថ្លៃដល់មនុស្សគ្រប់រូប នៅពេលរកឃើញវ៉ាក់សាំងប្រឆាំងជំងឺកូវីដ១៩។
អង្គការ ៤ ផ្សេងទៀតក្រៅពីអង្គការអុកស្វាមរួមមានគណៈកម្មាធិការសហប្រតិបត្តិការដើម្បីកម្ពុជា (CCC) វេទិកាអង្គការមិនមែនរដ្ឋាភិបាលស្តីពីកម្ពុជា (NGOF) គណៈកម្មាធិការសម្របសម្រួលសកម្មភាពសុខភាព (HACC) និងអង្គការគ្រូពេទ្យគ្មានព្រំដែន (MSF)។ យុទ្ធនាការនេះចាប់ផ្តើមធ្វើពីថ្ងៃទី ២១ ខែឧសភា ដល់ ថ្ងៃទី ២០ ខែមិថុនា។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជាបានប្រាប់ភ្នំពេញប៉ុស្តិ៍ថា អង្គការទាំងនេះចង់ឱ្យមានការបែងចែកថ្នាំបង្ការដែលនឹងត្រូវផលិតបានក្នុងពេលឆាប់ៗខាងមុខត្រូវធ្វើការបែងចែកប្រកបដោយយុត្តិធម៌ និងស្មើមុខគ្នាចំពោះមនុស្សជាតិទាំងមូល។
លោកបន្តថា ការបែងចែកនេះត្រូវតែដល់ដៃអ្នកដែលកំពុងរងគ្រោះបានមុនគេ ព្រោះពួកគាត់មានការខ្វះខាតក្នុងការការពារខ្លួន ដែលអាចធ្វើឱ្យពួកគាត់ងាយរងគ្រោះ។ ជនទាំងនោះរួមមាន ជនភៀសខ្លួនដែលប្រឈមហើយមិនសូវមានការយកចិត្តទុកដាក់ ប្រជាជនក្រីក្រ ស្ត្រីមេម៉ាយដែលខ្វះការគាំទ្រ និងកុមារជាពិសេសក្មេងមិនទាន់ចេះនិយាយដែលពិបាកក្នុងការធ្វើការប្រាស្រ័យទាក់ទង។
លោក តឹក វណ្ណារ៉ា ថ្លែងថា៖ «សម្រាប់យើងដែលជាអង្គការសង្គមស៊ីវិល គឺយើងស្នើឱ្យពិភពលោកយកចិត្តទុកដាក់បន្ថែម ហើយនិងពិភាក្សាគ្នា ដើម្បីឱ្យមានលំហូធនធានគ្រប់គ្រាន់នៅក្នុងការការពារហើយឆ្លើយតបទៅនឹងការប្រយុទ្ធប្រឆាំងនឹងការរីករាលដាលនៃជំងឺកូវីដ១៩»។
ធនធានគ្រប់គ្រាន់គឺលោក វណ្ណារ៉ា ចង់សំដៅទាំងធនធានថវិកា ធនធានសម្ភារ ធនធានបច្ចេកទេស ឱសថថ្នាំបង្ការសិក្សាស្រាវជ្រាវហើយ និងលំហូរព័ត៌មានដើម្បីឱ្យប្រជាពលរដ្ឋទូទាំងពិភពលោកមានលទ្ធភាពគ្រប់គ្រាន់ក្នុងការការពារខ្លួនពីការរីករាលដាលពីជំងឺនេះ។
អង្គការទាំង ៥ នេះបានបញ្ជាក់ក្នុងសេចក្តីប្រកាសព័ត៌មានរួមថា ជាបទពិសោធនៅក្នុងឆ្នាំ ២០០៩ នៅពេលមានការរាតត្បាតនៃជំងឺផ្តាសាយជ្រូកជាសកលប្រទេសអ្នកមាន បានបញ្ជាទិញវ៉ាក់សាំងពីក្រុមហ៊ុនផលិតក្នុងបរិមាណទ្រង់ទ្រាយធំ និងមុនគេ។ នេះធ្វើឱ្យប្រទេសដទៃទៀតក្នុងពិភពលោកទទួលបានវ៉ាក់សាំងក្នុងបរិមាណទាប និងយឺតជាងប្រទេសទាំងនោះយ៉ាងឆ្ងាយដែលមិនអាចផ្តល់វ៉ាក់សាំងដល់ប្រជាពលរដ្ឋរបស់ខ្លួនបានទេ។
សេចក្តីប្រកាសព័ត៌មានបន្តថា ចាប់តាំងពីការផ្ទុះវីរុសកូវីដ១៩មក ប្រទេសអ្នកមានបាននិងកំពុងព្យាយាមទទួលបានផ្តាច់មុខទៅលើសម្ភារសំខាន់ៗសម្រាប់ការពារអាយុជីវិតដូចជាអុកស៊ីសែនតេស្តវិនិច្ឆ័យរោគឧបករណ៍បញ្ចូលអុកស៊ីសែន និងឧបករណ៍ការពារខ្លួន។
សេចក្តីប្រកាសព័ត៌មានបញ្ជាក់ថា៖ «ទាំងអស់នេះបង្ហាញថា វាគឺជាហានិភ័យ ព្រោះថា វ៉ាក់សាំងនៅពេលណាដែលត្រូវបានគេរកឃើញនឹងមានសម្រាប់តែអ្នកមានសំណាងមួយចំនួនតូចប៉ុណ្ណោះ ហើយត្រូវបានគេបង្កើតឡើងសម្រាប់រកប្រាក់ចំណេញមិនមែនសម្រាប់មនុស្សដែលត្រូវការវាបំផុតនោះទេ»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលមិនអាចទាក់ទងដើម្បីសុំការបញ្ជាក់បានទេកាលពីម្សិលមិញ៕