ឧត្តរមានជ័យៈ ស្នងការដ្ឋាននគរបាលខេត្តឧត្តរមានជ័យនឹងបញ្ជូនអតីតចៅអធិការវត្តម្នាក់ទៅសាលាដំបូងខេត្តនៅថ្ងៃទី ១៩ ខែសីហានេះ បន្ទាប់ពីចាប់ខ្លួនកាលពីថ្ងៃទី ១៧ ខែសីហានៅវត្តគិរីដីថ្មី ពាក់ព័ន្ធនឹងការវ៉ៃសម្លាប់អ្នករត់ម៉ូតូឌុបម្នាក់រឿងដែលអតីតសង្ឃអង្គនេះចាញ់ល្បែងជំពាក់ប្រាក់គេ និងមានស្រីស្នេហ៍ជាច្រើននាក់។
លោក ឡឹក សុខា ស្នងការរងទទួលផែនព្រហ្មទណ្ឌកម្រិតធ្ងន់ឲ្យដឹងថា សមត្ថកិច្ចបញ្ជូនតែម្នាក់ទៅតុលាការទេ។ ចំណែកបុរសជាប្អូនមិនជាប់ពាក់ព័ន្ធទេ ហើយសមត្ថកិច្ចបានឲ្យគាត់ទៅផ្ទះវិញហើយ។ «មុនដំបូងយើងឃាត់ ២ នាក់បងប្អូន ប៉ុន្តែក្រោយពីសាកសួររកការពិតគឺបុរសជាប្អូនមិនពាក់ព័ន្ធទេ»។
លោក យិន ណារ៉េត ប្រធានការិយាល័យ ព្រហ្មទណ្ឌ កម្រិតធ្ងន់នៃស្នងការដ្ឋាននគរបាលខេត្តឧត្តរមានជ័យបានថ្លែងពីម្សិលមិញថា ជនសង្ស័យជាអតីតចៅអធិការវត្តនោះឈ្មោះ ឆាយ ឡុង អាយុ ២៧ ឆ្នាំ រីឯជនរងគ្រោះឈ្មោះ ផាត់ ហាត់ ភេទ ប្រុស អាយុ ៦២ ឆ្នាំជាអ្នករត់ម៉ូតូឌុបរស់នៅភូមិដីថ្មី ស្រុកអន្លង់វែង។ ជនសង្ស័យនឹងត្រូវសមត្ថកិច្ចបញ្ជូនទៅសាលាដំបូងខេត្ត ឧត្តរមានជ័យនៅថ្ងៃនេះ។ «យើងចាប់ និងបញ្ជូនជនសង្ស័យទៅតុលាការ ពេលនេះព្រោះយើងផ្អែកលើភ័ស្តុតាង និងសាក្សីដែលបង្ហាញពីការប្រព្រឹត្តរបស់ជនសង្ស័យ»។
លោក ណារ៉េត រំឭកប្រាប់តាមសម្តីជនសង្ស័យថារវាងជនសង្ស័យ និងជនរងគ្រោះជាមនុស្សស្គាល់គ្នាស្និទ្ធស្នាល ព្រោះជនសង្ស័យឧស្សាហ៍ប្រើជនរងគ្រោះឲ្យឌុបទៅសូត្រមន្ត ឬប្រើឲ្យជួយធ្វើការងារផ្សេងៗ។ ប៉ុន្តែថ្វីដ្បិតតែជនសង្ស័យជាសង្ឃមែន តែជនម្នាក់នេះជាមនុស្សញៀនល្បែងស៊ីសងរហូតដល់ចាញ់ល្បែងអស់លុយពីខ្លួន ហើយជំពាក់លុយជនរងគ្រោះ ៣២ លានរៀលទៀតផង។ ក្រៅពីនេះជនសង្ស័យក៏មានស្រីញីច្រើននាក់ផងដែរ ដែលពេលខ្លះយកមកដេកនៅចេតីយ៍ក្នុងវត្ត និងនៅតាមព្រៃដែលកូននេនក្នុងវត្តបានប្រាប់។
លោកបន្តថាលុយចំនួន ៣២ លានរៀលនោះមិនមែនជារបស់ជនរងគ្រោះទេ តែគាត់បានទៅចងការគេយកមកឲ្យជនសង្ស័យព្រោះជនសង្ស័យបាននិយាយប្រាប់ជនរងគ្រោះថា គាត់ជាអ្នកធានាចេញថ្លៃការប្រាក់ឲ្យម្ចាស់លុយ។ ប៉ុន្តែចាប់តាំងពីបានខ្ចីលុយគេមកគឺជនសង្ស័យមិនដែលឲ្យការប្រាក់ទៅជនរងគ្រោះដើម្បីយកទៅសងគេទេ ដែលធ្វើឲ្យម្ចាស់លុយទារពីជនរងគ្រោះ ហើយជនរងគ្រោះទារពីជនសង្ស័យដែលហេតុដូច្នេះហើយទើបជនសង្ស័យសម្លាប់ជនរងគ្រោះបំបិទមាត់។
លោក ណារ៉េត ប្រាប់តាមសម្តីប្រពន្ធជនរងគ្រោះថានៅវេលាថ្ងៃត្រង់ថ្ងៃទី ១៣ សីហា ឆ្នាំ ២០១៩ ខណៈប្តីរបស់អ្នកស្រីកំពុងនៅផ្ទះស្រាប់តែជនសង្ស័យបានទូរស័ព្ទហៅប្តីអ្នកស្រីឲ្យទិញនំបុ័ងជាង ១០ ដើមយកទៅឲ្យគាត់នៅវត្ត។ បន្ទាប់ចេញពីផ្ទះបានប្រហែលជាកន្លះម៉ោង ស្ត្រីជាប្រពន្ធបានទូរស័ព្ទសួរប្តីហើយជនរងគ្រោះប្រាប់ថា កំពុងនៅតាមផ្លូវហើយក៏បិទទូរស័ព្ទទៅ។
លុះដល់ពេលល្ងាចថ្ងៃទី ១៣ សីហា ដដែលស្ត្រីជាប្រពន្ធបានទូរស័ព្ទទៅប្តីតែទាក់ទងមិនបានរហូតបាត់ដំណឹងហើយអ្នកស្រីបានទៅដាក់ពាក្យបណ្តឹងនៅប៉ុស្តិ៍នគរបាលឃុំដីថ្មី។ សមត្ថកិច្ចរួមនឹងក្រុមគ្រួសារសាច់ញាតិបានដើររកនៅតាមកន្លែងណាដែលជនរងគ្រោះធ្លាប់ទៅតែរកមិនឃើញ។ លោកប្រាប់ថា៖ «ករណីនេះយើងប្រើពេល ៥ ថ្ងៃ និងប្រើមនុស្សជិត ១០០ នាក់ទាំងពលរដ្ឋផងដោយយើងក៏មានតម្រុយខ្លះពីសាក្សី»។
លោកថាបន្ទាប់មកសមត្ថកិច្ចបាននិមន្តអតីតចៅអធិការវត្តរូបនេះមកសាកសួរនៅថ្ងៃទី ១៤ ,១៥ និងថ្ងៃទី ១៦ សីហានៅអធិការដ្ឋាននគរបាលស្រុកអន្លង់វែង ដោយជនសង្ស័យថានៅថ្ងៃទី ១៣ សីហា នោះគាត់បានជិះម៉ូតូជាមួយជនរងគ្រោះ ហើយគាត់បានឲ្យជនរងគ្រោះទម្លាក់គាត់នៅរង្វង់មូលទីរួមស្រុកអន្លង់វែង ព្រោះឲ្យប្អូនប្រុសមកឌុបទៅវត្តវិញ។ ប៉ុន្តែក្នុងរយៈពេល ៣ ថ្ងៃនោះជនសង្ស័យមិនសារភាពទេ។ លោកបន្តថាដោយជនសង្ស័យមិនព្រមឆ្លើយសារភាពនោះ សមត្ថកិច្ចក៏បានហៅប្អូនប្រុសម្នាក់របស់ជនសង្ស័យមកសួរនាំពីរឿងរ៉ាវដែលជនសង្ស័យថាឲ្យប្អូនទៅទទួលហើយចម្លើយរវាងពួកគេគឺឆ្លើយខុសគ្នា ហើយពេលឆ្លើយទល់មុខនឹងប្អូនប្រុសនោះ ជនសង្ស័យបានដាក់ទឹកមុខធ្វើឲ្យសមត្ថកិច្ចចាប់តម្រុយបាន។
ពេលនោះជនសង្ស័យសួរសមត្ថកិច្ចថា បើគាត់ឆ្លើយត្រង់តើប្អូនប្រុសរបស់គាត់មានទោសដែរទេ។ លោកថា៖ «គាត់ថាឲ្យប្អូនទៅឌុបនៅម៉ោងជាង ១ ថ្ងៃត្រង់ តែប្អូនគាត់ថាទៅឌុបជនសង្ស័យនៅម៉ោងជាង ៨ យប់នៅផ្លូវចេញពីព្រៃកន្លែងសម្លាប់ជនរងគ្រោះ។ នេះជាចម្លើយខុសគ្នា»។ សមត្ថកិច្ចបានចាប់ខ្លួនជនសង្ស័យនៅថ្ងៃទី ១៧ សីហា។
ចំពោះវត្ថុតាងមានញញួ ១ ដែលជនសង្ស័យដាក់ក្នុងថង់យាម ហើយឲ្យជនរងគ្រោះឌុបទៅកន្លែងស្ងាត់ និងបានយកញញួវាយក្បាលជនរងគ្រោះពីក្រោយស្លាប់។ បន្ទាប់មកជននេះបានច្រកសពជនរងគ្រោះក្នុងការុងហើយដឹកតាមម៉ូតូយកទៅបោះចោលក្នុងព្រៃដែលទីតាំងសម្លាប់ និងទីតាំងយកសពទៅចោលមានចម្ងាយ ៧ គីឡូម៉ែត្រ។ ជនសង្ស័យបានទុកម៉ូតូជនរងគ្រោះចោលនៅមាត់ផ្លូវដឹកសពចោលនៅចំណុចភូមិអូរចិញ្ចៀនឃុំអន្លង់វែង ដោយម៉ូតូមានប្រឡាក់ឈាម៕