.jpg)
ពលករមកពីថៃ នៅមណ្ឌលចត្តាឡីស័ក នៅខេត្តបន្ទាយមានជ័យ។ រូប រដ្ឋបាលខេត្តបន្ទាយមានជ័យ
ភ្នំពេញៈ អនុក្រឹត្យលេខ ១២៩ ស្តីពីការទប់ស្កាត់ និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញ-ចូលបានដំឡើងនូវការផាកពិន័យទៅលើអ្នកគេចវេះ និងអ្នកផ្តើមគំនិតឱ្យគេចវេះចន្លោះពី ១ លាន ទៅដល់ ៥០ លានរៀល ខណៈអនុក្រឹត្យថ្មីមួយទៀតបានសម្រេចផាកពិន័យពី ១ លានទៅ ៥ លានរៀល ចំពោះបុគ្គលដែលគេចវេះពីការធ្វើចត្តាឡីស័ក។
យោងតាមអនុក្រឹត្យស្តីពីការកែសម្រួលមាត្រា ៨ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ពីម្សិលមិញបានចែងថា អ្នកដំណើរ ឬការីនៃយានដឹកជញ្ជូនដែលគេចវេះមិនឱ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយនឹងមន្ត្រីចត្តាឡីស័កក្នុងការអនុវត្តវិធានការសុខាភិបាល ឬមិនបំពេញតាមបែបបទ ដែលមានកំណត់ក្នុងអនុក្រឹត្យលេខ ១២៩ ចុះកាលពីខែកញ្ញា ឆ្នាំ ២០១៥ ត្រូវទទួលពិន័យអន្តរការណ៍ជាប្រាក់ពី ១ លានដល់ ៥ លានរៀល និងតម្រូវឱ្យអនុវត្តវិធានការសុខាភិបាល។
មាត្រា ៨ ថ្មីនេះបានលើកឡើងទៀតថា «ជនណាដែលផ្តើមគំនិត ដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកដំណើរ ឬការីនៃយានដឹកជញ្ជូនឱ្យគេចចេញពីការត្រួតពិនិត្យ ឬគេចវេះពីការអនុវត្តវិធានការចត្តាឡីស័កត្រូវទទួលពិន័យអន្តរការណ៍ជាប្រាក់ពី ១០ លានរៀល ដល់ ៥០ លានរៀល»។
មាត្រាថ្មីដដែលនេះបញ្ជាក់ថា ការពិន័យអន្តរការណ៍ជាសមត្ថកិច្ចរបស់ក្រសួងសុខាភិបាល។ ក្នុងករណីជនល្មើសមិនព្រមបង់ប្រាក់ពិន័យអន្តរការណ៍ក្នុងរយៈពេល ៣០ ថ្ងៃគិតចាប់ពីថ្ងៃទទួលបានសេចក្តីសម្រេច ស្តីពីការពិន័យអន្តរការណ៍ មន្ត្រីក្រសួងសុខាភិបាល ដែលមាននីតិសម្បទាជានគរបាលយុត្តិធម៌ត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីជាធរមាន។ មាត្រា ៨ ថ្មីនេះបន្ថែមថា «ការទទួលពិន័យអន្តរការណ៍នេះមិនធ្វើឱ្យជនដែលប្រព្រឹត្តបទល្មើសរួចផុតពីការទទួលខុសត្រូវខាងព្រហ្មទណ្ឌផ្សេងទៀតដែលមានចែងនៅក្នុងច្បាប់ និងបទប្បញ្ញត្តិព្រហ្មទណ្ឌជាធរមានឡើយ»។
លោក គឹម សន្តិភាពអ្នកនាំពាក្យក្រសួងយុត្តិធម៌ប្រាប់ ភ្នំពេញ ប៉ុស្តិ៍ថា ការពង្រឹងនូវវិធានការសុខាភិបាលគឺដើម្បីធានាបាននូវការយកចិត្តទុកដាក់ ដល់ពលរដ្ឋឱ្យយល់ដឹងដោយខ្លួនឯង ដើម្បីធ្វើចត្តាឡីស័ក ការពារនូវការឆ្លងមេរោគកូវីដ។
ជាមួយគ្នានេះដែរ យោងតាមសំណើរបស់រដ្ឋមន្ត្រីក្រសួងសុខាភិបាល និងក្រសួងយុត្តិធម៌ រាជរដ្ឋាភិបាលក៏បានបង្កើតនូវអនុក្រឹត្យថ្មីមួយស្តីពីវិធានការចត្តាឡីស័ក ដើម្បីទប់ស្កាត់ការឆ្លងរាលដាលនៃជំងឺកូវីដ១៩ដែលមាន ៧ ជំពូក និង ២៣ មាត្រា។ អនុក្រឹត្យនេះកំណត់ពីវិធានការនានាទាក់ទងនឹងការធ្វើចត្តាឡីស័ក ដើម្បីទប់ស្កាត់ការឆ្លងរាលដាលនៃជំងឺកូវីដ១៩សំដៅការពារអាយុជីវិត និងសុខភាពរបស់ពលរដ្ឋ ព្រមទាំងបញ្ចៀសឱ្យបានជាអតិបរមានូវផលប៉ះពាល់ដល់ផ្នែកសង្គម និងសេដ្ឋកិច្ច។
ក្នុងជំពូកទី៥ នៃអនុក្រឹត្យនេះបានចែងពីទោសបញ្ញត្តិថា «ត្រូវពិន័យអន្តរការណ៍ជាប្រាក់ពី ១ លានរៀល ទៅ ៥ លានរៀល ចំពោះបុគ្គលដែលគេចវេះពីការធ្វើចត្តាឡីស័ក និងត្រូវពិន័យអន្តរការណ៍ជាប្រាក់ពី ១ លានរៀល ទៅ ៥ លានរៀលចំពោះបុគ្គលដែលគេចពីទីកន្លែងធ្វើចត្តាឡីស័កក្នុងអំឡុងពេលធ្វើចត្តាឡីស័កដោយមិនមានការអនុញ្ញាត»។
ចំពោះបុគ្គលដែលធ្វើចត្តាឡីស័កហើយមិនសហការជាមួយមន្ត្រីសុខាភិបាល ដើម្បីយកសំណាកទៅវិភាគមេរោគកូវីដ១៩ ក៏ត្រូវពិន័យអន្តរការណ៍ពី ១ លានរៀលដល់ ៥ លានរៀលដែរ។ ការបង់ប្រាក់ពិន័យនេះក៏មិនធ្វើឱ្យបុគ្គលនោះរួចផុតពីកាតព្វកិច្ចក្នុងការឱ្យមន្ត្រីសុខាភិបាលយកសំណាកដែរ។
ជំពូកដដែលនេះបានលើកឡើងទៀតថា ចំពោះអ្នកផ្តើមគំនិត ដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់បុគ្គលដែលធ្វើចត្តាឡីស័កឱ្យគេចចេញពីការត្រួតពិនិត្យ ឬគេចវេះ ឬគេចពីកន្លែងធ្វើចត្តាឡីស័ក ត្រូវពិន័យអន្តរការណ៍ជាប្រាក់ពី ១០ លានរៀល ដល់ ៥០ លានរៀល។
ការពិន័យអន្តរការណ៍នូវចំនួនប្រាក់ដូចគ្នានេះដែរ ក៏នឹងធ្វើចំពោះគ្រឹះស្ថានសុខាភិបាលឯកជនទាំងអស់ដែលជួយលាក់បាំង និងមិនបានធ្វើការជូនដំណឹងបន្ទាន់ទៅក្រសួងសុខាភិបាលក្នុងករណីពិនិត្យឃើញថា អ្នកជំងឺដែលកំពុងទទួលសេវាព្យាបាលនៅក្នុងគ្រឹះស្ថានរបស់ខ្លួនមានតម្រុយបញ្ជាក់ថា ជាអ្នកជំងឺដែលគេចវេះពីការធ្វើចត្តាឡីស័ក ឬកំពុងគេចវេះពីកន្លែងធ្វើចត្តាឡីស័ក។ ប្រាក់ពិន័យអន្តរការណ៍នេះត្រូវធ្វើឡើងទ្វេដងក្នុងករណីអំពើល្មើសត្រូវបានប្រព្រឹត្តម្តងទៀត។
ជាមួយគ្នានេះ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានប្រកាសច្រានចោលទាំងស្រុងនូវការចុះផ្សាយដោយប្រឌិតនូវព័ត៌មានថា មានអ្នកគ្រូមួយរូបនៅអនុវិទ្យាល័យស្នួលក្នុងខេត្តក្រចេះបានស្លាប់ បន្ទាប់ពីបានចាក់វ៉ាក់សាំងកូវីដ ១៩ ស៊ីណូហ្វ៉ាម។ ករណីស្លាប់នេះ គឺដោយសារជំងឺរលាកស្រោមខួរក្បាលធ្ងន់ធ្ងរ ដែលក្រុមគ្រូពេទ្យមិនអាចជួយសង្គ្រោះបាន។
លោកស្រីថា៖ «ក្រសួងសុំស្នើឱ្យអាជ្ញាធរមានសមត្ថកិច្ច ចាត់វិធានការតាមផ្លូវច្បាប់ចំពោះអ្នកដែលប្រឌិតនូវព័ត៌មាននេះ។ ខ្ញុំសូមបញ្ជាក់ដែរថា មកដល់ពេលនេះការចាក់វ៉ាក់សាំងកូវីដ ១៩ មិនទាន់បានផ្តល់ជូនទៅដល់គ្រូបង្រៀនណាម្នាក់នៅឡើយទេ»។
អ្នកស្រី អួន គឹមយ៉ុន ម្តាយរបស់អ្នកគ្រូរងគ្រោះ ឆន ណារី អាយុ ២១ ឆ្នាំ ដែលបានស្លាប់បានបដិសេធថា កូនស្រីរបស់អ្នកស្រីមិនបានស្លាប់ដោយសារការចាក់វ៉ាក់សាំងកូវីដ ១៩ ស៊ីណូហ្វ៉ាមទេ។ «កូនស្រីខ្ញុំឈឺដោយសាររលាកស្រោមខួរក្បាលធ្ងន់ធ្ងរដែលខ្ញុំបានយកទៅព្យាបាលនៅមន្ទីរពេទ្យ តែមិនអាចជួយសង្គ្រោះជីវិតបាន។ ខ្ញុំសុំឱ្យសមត្ថកិច្ច និងអាជ្ញាធរចាត់វិធានការទៅតាមច្បាប់ដែលបានយករូប និងកិត្តិយសរបស់កូនស្រីខ្ញុំ ទៅផ្សព្វផ្សាយខុសពីការពិត»។
បើតាមក្រសួងសុខាភិបាលគិតចាប់ពីថ្ងៃទី ១០ ដល់ ១៧ ខែកុម្ភៈ មានអ្នកស្ម័គ្រចិត្តចាក់វ៉ាក់សាំងចំនួន ៣ ២៣៦ នាក់។ ចំណែករបាយការណ៍ក្រសួងការពារជាតិក្នុងរយៈពេលដូចគ្នានេះដែរ មានអ្នកចាក់វ៉ាក់សាំង ១០ ០៤៥ នាក់។
កាលពីម្សិលមិញលោក ហ៊ុន សែន ក៏បានផ្តល់ជំនួយថវិកាបន្ថែមចំនួន ១៥០ លានរៀល សម្ភារ និងស្បៀងមួយចំនួនដល់ខេត្តចំនួន ៦ ជាប់ព្រំដែនកម្ពុជា-ថៃ ដើម្បីរៀបចំធ្វើចត្តាឡីស័កសម្រាប់ពលករខ្មែរដែលវិលត្រឡប់មកពីប្រទេសថៃក្នុងនោះរួមមានខេត្តបាត់ដំបង បន្ទាយមានជ័យ ឧត្តរមានជ័យ កោះកុង ពោធិ៍សាត់ និងខេត្តព្រះវិហារ។
ក្រសួងសុខាភិបាលបានរកឃើញអ្នកដំណើរជាជនជាតិបរទេស ៤ នាក់ មានតេស្តវិជ្ជមានកូវីដ ១៩ ក្នុងនោះមានបុរសឥណ្ឌូនេស៊ី ស្ត្រីឥណ្ឌូនេស៊ី ស្ត្រីជនជាតិចិន និងបុរសជនជាតិស្វ៊ីស។ គិតត្រឹមថ្ងៃម្សិលមិញ កម្ពុជាមានអ្នកមានវីរុសកូវីដ ៤៨៣ នាក់ ក្នុងនោះអ្នកព្យាបាលជាសះស្បើយ ៤៧០ នាក់ និងអ្នកកំពុងសម្រាកព្យាបាល ១៣ នាក់៕
វីដេអូ៖
