លោក ឃួង ស្រេង ពេលចែកបណ្ណកម្មសិទ្ធិដល់អ្នកនៅជ្រោយចង្វារថ្មីៗនេះ។ រូប ហ្វេសប៊ុក
ភ្នំពេញៈ លោក ឃួង ស្រេង អភិបាលរាជធានីភ្នំពេញបានអះអាងថា ការដោះស្រាយបញ្ហារបស់ពលរដ្ឋដែលរងប៉ះពាល់ដោយសារគម្រោងអភិវឌ្ឍន៍ទីក្រុងរណបនៅជ្រោយចង្វាររបស់ក្រុមហ៊ុន OCIC នឹងត្រូវបញ្ចប់ក្នុងពេលឆាប់ៗនេះ ខណៈក្រុមហ៊ុនបានបញ្ជាក់ថា ពលរដ្ឋដែលនៅសេសសល់មានត្រឹមតែជាង ៧ ភាគរយ។
កាលពីថ្ងៃទី ២០ មករាលោក ឃួង ស្រេង បានប្រគល់បណ្ណកម្មសិទ្ធិជូនពលរដ្ឋចំនួន ៥១ គ្រួសារ ដែលរងផលប៉ះពាល់ដោយសារការអភិវឌ្ឍនៅជ្រោយចង្វារបស់ក្រុមហ៊ុន OCIC។ លោកបានអះអាងថា នេះគឺជាការចែកបណ្ណកម្មសិទ្ធិលើកទី ៥ ដែលគិតសរុបមានចំនួន ៣៤១ បណ្ណ ហើយអ្នកនៅសល់គ្រោងនឹងដោះស្រាយបញ្ចប់ឆាប់ៗនេះ។
លោកបានថ្លែងថា៖ «ការចែកបណ្ណប្រគល់ជូនប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍន៍ក្រុងរណបជ្រោយចង្វារនេះឆ្លុះបញ្ចាំងពីការយកចិត្តទុកដាក់ខ្ពស់របស់ប្រមុខរដ្ឋាភិបាលក្នុងការធានាសិទ្ធិកាន់កាប់ស្របច្បាប់របស់ប្រជាពលរដ្ឋសំដៅលើកម្ពស់ជីវភាព សុខុមាលភាព និងកាត់បន្ថយភាពក្រីក្រ រួមទាំងរួមចំណែកការពង្រឹងយុត្តិធម៌ និងស្ថិរភាពសង្គម»។
ជាមួយគ្នានេះលោក ពុង ឃាវសែ អគ្គនាយកក្រុមហ៊ុននៅ OCIC បានលើកឡើងនៅក្នុងកម្មវិធីនោះដែរថា ពលរដ្ឋដែលរងផលប៉ះពាល់ចំនួន ៩២,០៦ ភាគរយ ទទួលបានការដោះស្រាយ ខណៈជាង ៧ ភាគរយ ឬស្មើនឹងជាង ៨០ គ្រួសារទៀតនឹងត្រូវដោះស្រាយបញ្ចប់ឆាប់ៗនេះ។
លោកថា៖ «ក្រុមហ៊ុនបាននិងកំពុងអភិវឌ្ឍទីក្រុងរណបជ្រោយចង្វារឱ្យក្លាយជាទីក្រុងទំនើបនាពេលខាងមុខនេះដោយមានទាំងមជ្ឈមណ្ឌលពាណិជ្ជកម្ម អគាររដ្ឋបាល សួនច្បារ ផ្លូវគមនាគមន៍ធំទូលាយ សួនកម្សាន្ត និងអគារលំនៅឋានប្រណីតៗ ផ្សារទំនើប សម្រាប់ការរស់នៅបែបស៊ីវិល័យរបស់ប្រជាពលរដ្ឋក្នុងទីក្រុង»។
លោក ជា សុផាត ជាពលរដ្ឋម្នាក់ដែលរងផលប៉ះពាល់ពីគម្រោងនេះបានថ្លែងពីម្សិលមិញថាកាលពីឆ្នាំ ២០១៣ ក្រុមហ៊ុន OCIC បានបូមខ្សាច់ចាក់ពន្លិចដីអាស្រ័យផល និងដីលំនៅឋានរបស់ពលរដ្ឋប្រហែល ៣០០ គ្រួសារដែលមានផ្ទៃដី ៣៨៧ ហិកតា។
លោកបន្តថា បច្ចុប្បន្ននេះនៅសល់ពលរដ្ឋជាង ៧០ គ្រួសារ ដែលមានផ្ទៃដីជិត ៥០ ហិកតា មិនទាន់យល់ព្រមទទួលយកសំណងនៅឡើយ ដោយសារគោលការណ៍របស់សាលារាជធានីភ្នំពេញគឺបានសម្រេចឱ្យពលរដ្ឋក្នុង ១ គ្រួសារ ទទួលយកដី ១០ ភាគរយ និង ៩០ ភាគរយ ទុកប្រគល់ឱ្យសាលារាជធានី និងក្រុមហ៊ុន។
លោក ជា សុផាត បន្ថែមថាដំណោះស្រាយដែលពលរដ្ឋជាង ៧០ គ្រួសារ ចង់បានគឺស្នើសុំវៀលដីលំនៅឋានមកវិញ និងសុំទទួលយកដី ៥០ ភាគរយ នៃដីអាស្រ័យផល ហើយប្រសិនបើអាជ្ញាធរចង់ទិញយកដីទាំងនោះ គឺគិតតាមតម្លៃដីទីផ្សារសេរី។
លោកថា៖ «ឱ្យពួកយើងទទួលយកដំណោះស្រាយយ៉ាងមេច ហើយសួរមើលថា តើមានច្បាប់ឯណាដែលម្ចាស់ដីបាន ១០ ភាគរយ សាលាក្រុង ៥០ និងក្រុមហ៊ុនយកដីយើង ៤០ ភាគរយ។ ខ្ញុំមិនដឹងជាគេយកច្បាប់មកពីណាមកដោះស្រាយហ្នឹង ហើយអ៊ីចឹង! បានជាពួកខ្ញុំចេះតែចេញតវ៉ាកន្លងមក»។
លោក ជា សុផាត បញ្ជាក់ថាដីរបស់លោកដែលប៉ះពាល់គឺលោកទិញ និងកាន់កាប់តាំងពីឆ្នាំ ១៩៩២ មកដោយមានបង្កាន់ដៃដែលមានការទទួលស្គាល់ពីអាជ្ញាធរតាំងពីសម័យនោះហើយដីពលរដ្ឋខ្លះមានទាំងប្លង់រឹងទៀត។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញបានបញ្ជាក់ថា ការប្រគល់ដីទៅឱ្យពលរដ្ឋវិញ ១០ ភាគរយ គឺគោលការណ៍មួយដែលត្រូវបានយកមកដោះស្រាយយូរណាស់មកហើយ។ លោកបន្តថា សាលារាជធានីភ្នំពេញនឹងខិតខំបន្តទៀត ដើម្បីដោះស្រាយដោយយកគោលការណ៍ដដែលនេះទៅចរចាជាមួយពលរដ្ឋដែលនៅសេសសល់។
លោកថា៖ «ប្រជាពលរដ្ឋជាច្រើនទៅហើយដែលព្រមទទួលយកគោលការណ៍ហ្នឹង។ អ៊ីចឹង! ពួកគាត់ធ្លាប់បានប៉ុណ្ណឹង ហើយដល់អ្នកផ្សេងមិនអាចទទួលបានលើសពីហ្នឹងបានទេ។ អ៊ីចឹង! យើងនឹងខិតខំចរចាដោះស្រាយបន្តទៀត»។
ការអភិវឌ្ឍទីក្រុងរណបជ្រោយចង្វារគឺជាគម្រោងរបស់រដ្ឋបាលរាជធានីភ្នំពេញហើយដែលក្រុមហ៊ុន OCIC របស់លោក ពុង ឃាវសែ ទទួលបានសិទ្ធិវិនិយោគក្នុងទំហំទឹកប្រាក់ប្រមាណជាង ២ ពាន់លានដុល្លារ ដោយប្រើប្រាស់រយៈពេលសាងសង់ប្រមាណជា ១៥ ឆ្នាំ ចាប់ផ្ដើមពីឆ្នាំ ២០១១ ដល់ឆ្នាំ ២០២៦ លើផ្ទៃដីទំហំ ៣៨៧ ហិកតា ក្នុងគោលដៅប្រែក្លាយតំបន់នេះឱ្យទៅជាទីក្រុងរណបរាជធានីភ្នំពេញ៕
.jpg)
