កោះកុង អាជ្ញាធរខេត្តកោះកុង នៅថ្ងៃទី ១៩ ខែកុម្ភៈ បានថ្លែងថា គណៈកម្មាធិការមួយ បាននិងកំពុងស៊ើបអង្កេតការបូមខ្សាច់លុបពីលើ ដើមកោងកាងខុសច្បាប់ នៅក្នុងតំបន់សហគមន៍ នៃដែនជម្រកសត្វព្រៃពាមក្រសោប ប៉ុន្តែក្រុមមន្រ្តីបានអះអាងថា ពួកគេ នៅមិនទាន់ដឹងថា តើនរណានៅពីក្រោយបទល្មើសនេះ ទេ បើទោះបីជាបានពិនិត្យទីតាំងនេះដំបូងតាំងពីខែធ្នូ។
លោក សុខ សុធី អភិបាលរងខេត្តកោះកុង បានថ្លែងនៅថ្ងៃទី ១៩ ខែកុម្ភៈថា ការបូមខ្សាច់លុបបំពេញតំបន់នេះគឺខុសច្បាប់ ដោយសារពួកគេខ្វះលិខិតអនុញ្ញាត ពីក្រសួងរ៉ែនិងថាមពល និងក្រសួងបរិស្ថាន។
លោកបានថ្លែងថា៖ «រាល់សកម្មភាពទាំងអស់របស់ពួកគេ បានបំពានច្បាប់»។ នៅពេលក្រោយមកលោកបានអះអាងថា លោកនៅមិនទាន់ដឹងថា តើនរណាជាអ្នកទទួលខុសត្រូវទេ។
ដីពីរហិកតា ដែលត្រូវបានបូមខ្សាច់លុបបំពេញគឺស្ថិតនៅក្នុងដីចំនួន ១០៣៥ ហិកតា ដែលជាតំបន់សហគមន៍ស្ថិតនៅក្នុងដែនជម្រកសត្វព្រៃពាមក្រសោប ដែលត្រូវបានបង្កើតឡើង ក្រោមអនុក្រឹត្យឆ្នាំ ២០០៩ ដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន។
លោក Alex Gonzalez-Davidson ដែលជាសហស្ថាបនិក នៃអង្គការមាតាធម្មជាតិ បានថ្លែងថា ការអនុវត្តការបូមខ្សាច់លុបបំពេញព្រៃកោងកាងគឺដើម្បីលក់ព្រៃនោះនាពេលបន្ទាប់ ទៅអ្នកដេញថ្លៃខ្ពស់ជាងគេ បានកើតឡើងក្នុងរយៈកាលប៉ុន្មានឆ្នាំនេះ។
លោកបានថ្លែងថា៖ «ទោះយ៉ាងណាក្តី អ្វីដែលធ្វើឲ្យមានបទល្មើសថ្មីៗបំផុតនេះដែលគួរឲ្យកត់សម្គាល់គឺថា វាកំពុងកើតឡើង នៅក្នុងដែនជម្រកសត្វព្រៃពាមក្រសោប ដែលត្រូវបានការពារដោយច្បាប់»។ «...ចំពោះថាតើនរណានៅពីក្រោយ ខ្ញុំប្រាកដថា អាជ្ញាធរដឹងយ៉ាងច្បាស់ថា នរណានៅពីក្រោយ ខណៈកោះកុងទាំងមូល តែងតែនិយាយប្រាប់យើងអំពីឈ្មោះលោក ជា លាងហុង ប្រធានក្រុមហ៊ុន KH Niron»។
លោក លាងហុង មិនបានឆ្លើយតបនឹងសំណើសុំអត្ថាធិប្បាយ។ នៅពេលលោក សុធី ត្រូវបានសួរអំពីលោក លាងហុង លោកបានបដិសេធថា វាជា«ពាក្យចចាមអារ៉ាម»។
លោក សុខ សុខុម នាយកអង្គការជាតិស្រាវជ្រាវកម្ពុជា បានថ្លែងថា លោកកំពុងប្រមូលឯកសារអំពីករណីនេះ ហើយនឹងបង្ហាញរបាយការណ៍របស់លោកនាខែក្រោយ។
លោកបានថ្លែងថា លោកគ្រោងស៊ើបអង្កេតករណីដទៃៗទៀត ពាក់ព័ន្ធនឹងការរំលោភយកតំបន់ព្រៃកោងកាងក្នុងខេត្តកោះកុង៕ PS
រាយការណ៍បន្ថែមដោយ Yesenia Amaro