សកម្មភាពស្ដារពើកចេញកសិណ្ធុក្រុងអង្គរ របស់ក្រុមការងារអាជ្ញាធរអប្សរា កាលពីម្សិលមិញ។ រូបថត អាជ្ញាធរអប្សរា
សៀមរាប៖ ក្រុមការងារនៃនាយកដ្ឋានគ្រប់គ្រងទឹកនៃអាជ្ញាធរជាតិអប្សរាបាន និងកំពុងស្ដារពើក (កំប្លោក ស្មៅ) ចេញពីក្នុងកសិណ្ធុក្រុងអង្គរធំ ដើម្បីចូលរួមអភិរក្សក៏ដូចជាបង្កើនសោភណភាពនៅតំបន់អង្គរឡើងវិញក្នុងគោលបំណងទាក់ទាញភ្ញៀវទេសចរ។
លោក ញ៉ែម រស្មី មន្ត្រីបច្ចេកទេសនៃនាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានឱ្យដឹងថា ការស្តារពើកនេះបានចាប់ផ្តើមតាំងពីថ្ងៃទី ២៤ មេសា មកម៉្លេះ និងប្រើកម្លាំងមនុស្សចំនួន ៤០ នាក់ ដោយការអនុវត្តជំហានដំបូងធ្វើឡើងនៅកសិណ្ធុខាងលិច ឬជាប់ខ្លោងទ្វារតាកាវនៃក្រុងអង្គរធំ។
លោកបានបន្តថា ការស្ដារពើកនេះ មានទទឹងប្រវែង ១០០ ម៉ែត្រ និងបណ្ដោយ ១ ៥០០ ម៉ែត្រ ប៉ុន្តែក្រុមការងារបានជួបការលំបាកខ្លះៗ ដោយសារពើកនោះមានសភាពក្រាស់ៗ។ «ក្រុមការងារស្តារពើកបានបង្ហាញសកម្មភាពដ៏មមាញឹកក្នុងការអូសទាញ និងលើកពើកដ៏ក្រាស់ចេញពីទឹកមកទម្លាក់លើគោកជាប់ច្រាំងកសិណ្ធុ ព្រោះស្មៅ និងរុក្ខជាតិតូចៗ ដែលកកក្លាយជាពើកនោះមានសភាពក្រាស់ ធ្ងន់ និងកន្លែងខ្លះស្ទើរមើលទឹកមិនឃើញ ដែលមានកំណកដីប្រមាណ ៦ តឹក នៅផ្នែកខាងក្រោម»។
លោកបានឱ្យដឹងថា ពើកដ៏ក្រាស់នេះ កកើតឡើងដោយសាររុក្ខជាតិតូចៗក្នុងទឹក ដូចជាកំប្លោក ស្លែ នៅក្នុងទឹករយៈពេលយូរ និងកង្វះការសម្អាតគ្រប់គ្រាន់ ទើបបណ្តាលឱ្យកកក្រាស់កើតទៅជាពើក។
យ៉ាងណាក្តី លោកថា ក្រុមការងារកំពុងរកវិធីសាស្រ្តផ្សេងទៀត ដើម្បីជំរុញឱ្យការងារបានលឿន ពោលគឺនឹងប្រើឧបករណ៍ជំនួយដើម្បីអូសពើកចេញពីកសិណ្ធុ ខណៈបច្ចុប្បន្នប្រើកម្លាំងមនុស្សសុទ្ធសាធ។
លោក រស្មី បានរំពឹងថា ក្រោយការស្តារពើកនេះ បរិស្ថាននៅកសិណ្ធុខាងលិចនៃក្រុងអង្គរធំ នឹងប្រែជាស្រស់ស្អាត និងអាចទាក់ទាញភ្ញៀវទេសចរបន្ថែមមួយកម្រិតទៀត។
ទីប្រឹក្សាសភាពាណិជ្ជកម្ពុជា និងទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា ការស្តារពើករួម និងការកែលម្អ នៅក្នុងតំបន់អង្គរនេះ ពិតណាស់នឹងទាក់ទាញភ្ញៀវទេសចរបន្ថែមទៀត ក្រោយពីស្ថានភាពកូវីដ ១៩ មានភាពធូរស្រាល។
សកម្មភាពស្ដារពើកចេញកសិណ្ធុក្រុងអង្គរ របស់ក្រុមការងារអាជ្ញាធរអប្សរា កាលពីម្សិលមិញ។ រូបថត អាជ្ញាធរអប្សរា
លោកថា៖ «ជារឿងល្អណាស់ ការកែលម្អនេះ ការតុបតែងដើម្បីទាក់ទាញ ពីព្រោះយើងដឹងហើយក្នុងវិស័យទេសរណ៍ ដើម្បីទាក់ទាញភ្ញៀវ ទី១ គឺសោភណភាព ទី២ ទេសភាព ទី៣ ទិដ្ឋភាព ទី៤ គុណភាព និងទី៥ គឺសុវត្ថិភាព»។ «ដូច្នេះការលក់របស់យើងមិនមែនលក់ប្រាសាទទេ គឺសេវាកម្មទាំងអស់នេះ ដូច្នេះយើងសូមកោតសរសើរអាជ្ញាធរជាតិអប្សរា ដែលបានពិគ្រោះយោបល់ជាមួយអង្គការយូនីស្កូ ដើម្បីកែច្នៃ តុបតែង កែលម្អទាំងអស់នេះ… »។
លោក ញ៉ែម រស្មី ឱ្យដឹងថា ការស្តារពើកនេះ មានការឧបត្ថម្ភពីសប្បុរសជននានា ក្នុងនោះរួមមានលោកស្រី ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោកស្រី ភឿង សកុណា ប្រធានក្រុមប្រឹក្សាភិបាលអាជ្ញាធរជាតិអប្សរា និងជារដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ និងសប្បុរសជនមួយចំនួនទៀត។
ទាក់ទងនឹងតំបន់អង្គរនេះ កាលពីថ្ងៃទី ២៥ មេសា អាជ្ញាធរជាតិអប្សរា និងគ្រឹះស្ថានអង្គរបានចាប់ផ្តើមបើកឱ្យសាធារណជនចូលទស្សនាប្រាសាទនានា ចាប់ពីថ្ងៃទី ២៦ មេសា បន្ទាប់ពីត្រូវបានបិទមួយរយៈពេលខ្លី ដើម្បីទប់ស្កាត់ការឆ្លងរាលដាលជំងឺកូវីដ ១៩។
ជាមួយគ្នានេះ អាជ្ញាធរជាតិអប្សរាបានឱ្យដឹងដែរថា ថ្ងៃដំបូងនៃការបើកឡើងវិញនេះ រមណីយដ្ឋានអង្គរទទួលបានភ្ញៀវទេសចរ ចំនួន ៧០១ នាក់ ខណៈអាជ្ញាធរនៅតែពង្រឹងវិធានការទប់ស្កាត់ជំងឺកូវីដ ១៩ ដដែល៕
.jpg)
