ភ្នំពេញៈ សាលារាជធានីភ្នំពេញបានត្រៀមធុងសំរាមប្រមាណ ១៦៧១ ធុង និងកម្លាំងសម្អាតប្រមាណ ៨០០ នាក់ដើម្បីកុំឱ្យកើតមានបាតុភាពរាយប៉ាយសំរាមពាសវាលពាសកាល ខណៈដែលក្រសួងបរិស្ថានក៏នឹងពង្រាយមន្ត្រី និងអ្នកស្ម័គ្រចិត្តប្រមាណជា ៣០០ នាក់ចុះអប់រំពលរដ្ឋពីផលប៉ះពាល់ចំពោះការចោលសំរាមក្នុងពិធីបុណ្យអុំទូករយៈពេល ៣ ថ្ងៃនេះផងដែរ។
តាមការផ្សព្វផ្សាយរបស់សាលារាជធានីភ្នំពេញការដាក់ធុងសំរាមទាំងចំនួន ១៦៧១ ធុងនេះនឹងធ្វើនៅតាមទីតាំងសំខាន់ៗ ដូចជា មាត់ទន្លេ តាមសួនច្បារ ទីតាំងប្រគំតន្ត្រី និង ទីកន្លែងស្នាក់នៅរបស់កីឡាករអុំទូកដោយមានកម្លាំង ចំនួន ៨៣៥ នាក់សម្រាប់កើបសំរាម និងចុះអប់រំកុំឱ្យមានការចោលសំរាមផ្ដេសផ្ដាសនៅក្នុងពិធីបុណ្យអុំទូក បណ្តែតប្រទីប សំពះព្រះខែ និងអកអំបុក។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានថ្លែងថា ការរៀបចំសំរាមនេះជាការសមស្របដែលទាមទារឱ្យមានការចូលរួមពីប្រជាពលរដ្ឋគ្រប់ស្រទាប់។
លោកបានបន្តថា៖ «យើងបានត្រៀមអស់ហើយសម្រាប់ការងារទាំងអស់ហ្នឹង។ យើងត្រូវដឹងថាបញ្ហាសំរាមដែលនៅលើដងផ្លូវវាអត់ចោទ ឬក៏ជាមូលហេតុ ឬចំនួនធុងសំរាមដែលបញ្ឈរលើផ្លូវទេ។ សំរាមដែលនៅតាមដងផ្លូវ វាអាស្រ័យលើពលរដ្ឋរបស់យើងថា តើចូលរួមកម្រិតណា?»។
លោកថា៖ «នេះជាការត្រៀមលក្ខណៈមួយសមស្របរួចហើយ។ អ្វីដែលនៅសល់ថែមទៀតគឺការរៀបចំការចូលរួមរបស់បងប្អូនប្រជាពលរដ្ឋរបស់យើង ហើយការប្រមូលកើបរបស់យើងត្រូវធ្វើទាំងយប់ទាំងថ្ងៃ ដើម្បីឱ្យពិធីរបស់យើងបានល្អ អត់មានសំរាម»។
លោកបានបញ្ជាក់ថា៖ «អាជ្ញាធររបស់យើងខិតខំគ្រប់រូបភាព គ្រប់មធ្យោបាយទាំងអស់ដើម្បីគ្រប់គ្រងបញ្ហាសំរាមនេះ អ៊ីចឹងមិនថាគោលដៅណាយើងខិតខំធ្វើម៉េចឱ្យការកើបអីឱ្យល្អប្រសើរ មិនចង់ឱ្យមានបាតុភាពអ្វីកើតឡើងរឿងបញ្ហាសំរាមនោះទេ ។ យើងចង់ឱ្យចប់ពិធីសប្បាយហើយទីក្រុងយើងស្អាត»។
យ៉ាងណាក្ដីលោក មាសភក្តី មិនបានបញ្ជាក់ពីការប្រើប្រាស់វិធានការច្បាប់ក្រៅពីការអប់រំផ្សព្វផ្សាយនោះទេ។
លោកបានបន្ថែមថា៖ «រឿងការអនុវត្តវិធានការច្បាប់ប្រហែលជាយើងត្រូវមើលតាមកាលៈទេសៈដែរ។ ប្រាកដណាស់ច្បាប់មិនមានលក្ខខណ្ឌទេ។ នៅក្នុងពិធីបុណ្យទានកំពុងជួបជុំសប្បាយរីករាយ ហើយរយៈពេលតែ ៣ ថ្ងៃ អ៊ីចឹងគួរតែប្រើវិធានការណាមួយដែលអាជ្ញាធររបស់យើងត្រូវធ្វើឱ្យមានប្រសិទ្ធភាពខ្ពស់បំផុតចំពោះបញ្ហាសំរាមនេះ»។
ដោយឡែកក្រសួងបរិស្ថានក៏នឹងដាក់ពង្រាយមន្ត្រី និងយុវជនស្ម័គ្រចិត្តប្រមាណជា ៣០០ នាក់ ដើម្បីដើរត្រួតពិនិត្យ និងអប់រំពលរដ្ឋឲ្យយល់ដឹងពីផលប៉ះពាល់បរិស្ថានដោយសារការបោះចោលសំរាមជាមួយនឹងការព្រមានផាកពិន័យចំពោះអ្នកបោះចោលសំរាម ខណៈក្រុមហ៊ុនស៊ិនទ្រីនឹងដាក់ពង្រាយកម្មករ ២៧៤ នាក់ និងរថយន្ត ៤៥ គ្រឿងដើម្បីប្រមូល និងដឹកសំរាមនៅក្នុងពិធីបុណ្យអុំទូករយៈពេល ៣ ថ្ងៃ៕