.jpg)
រថយន្តក្រុងទាំងនេះត្រូវបានផ្ដល់ឲ្យដោយប្រទេសជប៉ុន នាពេលកន្លងមក។ រថយន្តក្រុង១២០គ្រឿងត្រូវបានត្រៀមសម្រាប់ដឹកប្រជាពលរដ្ឋដោយមិនបង់ប្រាក់ក្នុងថ្ងៃបុណ្យចូលឆ្នាំ។ ភ្នំពេញ ប៉ុសិ៍្ត
ភ្នំពេញៈ សាលារាជធានីភ្នំពេញត្រៀមបញ្ចេញរថយន្តក្រុងទាំង ១២០ គ្រឿង ដើម្បីដឹកប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ កម្មករ សិស្ស និស្សិត ចេញពីរាជធានីភ្នំពេញ ទៅកាន់បណ្តាខេត្ត ក្នុងឱកាសបុណ្យចូលឆ្នាំខ្មែរខាងមុខនេះ ដោយឥតគិតថ្លៃ ចាប់ពីថ្ងៃទី ១២ រហូតដល់ថ្ងៃទី ១៨ ខែ មេសា ហើយក៏បានប្រកាសប្រាប់អ្នកធ្វើដំណើរពីទីតាំងនៃចំណតនីមួយៗរបស់រថយន្តក្រុង ទាំងនោះដែលត្រូវចេញដំណើរផងដែរ។
សេចក្ដីជូនដំណឹងរបស់សាលារាជធានីភ្នំពេញកាលពីថ្ងៃទី ៥ ខែ មេសា ផ្សាយថា រថយន្តក្រុងទាំង ១២០ គ្រឿងនេះ នឹងចេញដំណើរពីម៉ោង ៥:៣០ នាទីព្រឹក ដូចជា ភ្នំពេញ-កណ្ដាល-ស្វាយរៀង មានរថយន្តក្រុងចំនួន ៥ គ្រឿង ចេញដំណើរពីផ្លូវ ៦០ ម៉ែត្រទល់មុខក្រុមហ៊ុន មែរសឺដែស តាមផ្លូវជាតិលេខ ១ ទៅដល់ចំណតរថយន្តទីរួមខេត្តស្វាយរៀង។ ភ្នំពេញ-កណ្ដាល-ព្រៃវែង មានរថយន្តក្រុងចំនួន ៥ គ្រឿង ចេញដំណើរពីផ្លូវ ៦០ ម៉ែត្រដូចគ្នា តាមផ្លូវជាតិលេខ ១ ទៅដល់ចំណតរថយន្តទីរួមខេត្តព្រៃវែង។ ភ្នំពេញ-កណ្ដាល-តាកែវ មានរថយន្ត ៥ គ្រឿង ចេញដំណើរពីផ្លូវ ៦០ ម៉ែត្រដែរ តាមផ្លូវជាតិលេខ ២ ទៅដល់ចំណតរង្វង់មូលអូរចំបក់។
ភ្នំពេញ-កែប មានរថយន្តក្រុងចំនួន ៥ គ្រឿង ចេញដំណើរពីផ្សារសិនជូរីផ្លាហ្សា តាមផ្លូវជាតិលេខ ៣ ទៅដល់សាលាបឋមសិក្សាដំណាក់ចង្អើរ។ ភ្នំពេញ-កំពត មានរថយន្តក្រុងចំនួន ៥ គ្រឿង ចេញដំណើរពីផ្សារសិនជូរីផ្លាហ្សា តាមផ្លូវជាតិលេខ ៣ ទៅដល់ចំណតរថយន្តទីរួមខេត្តកំពត។ ភ្នំពេញ-កំពង់ស្ពឺ មានរថយន្តក្រុង ៣ គ្រឿង ចេញដំណើរពីផ្សារសិនជូរីផ្លាហ្សា តាមផ្លូវជាតិលេខ ៤ ទៅដល់ចំណតរថយន្តផ្សារកំពង់ស្ពឺ។ ភ្នំពេញ-ព្រះសីហនុ មានរថយន្តក្រុង ៧ គ្រឿង ចេញដំណើរពីផ្សារសិនជូរីផ្លាហ្សា តាមផ្លូវជាតិលេខ ៤ ទៅដល់វិមានឯករាជ្យខេត្តព្រះសីហនុ។
ភ្នំពេញ-កំពង់ឆ្នាំង មានរថយន្តក្រុង ៥ គ្រឿង ចេញដំណើរពីសួនឫស្សីកែវ តាមផ្លូវជាតិលេខ ៥ ទៅដល់ចំណតរថយន្តផ្សារលើ។ ភ្នំពេញ-ពោធិ៍សាត់ មានរថយន្តក្រុង ១០ គ្រឿង ចេញដំណើរពីសួនឫស្សីកែវ តាមផ្លូវជាតិលេខ ៥ ទៅដល់ទីតាំងបុរីឧកញ៉ា ភូ ប៉ុយ។ ភ្នំពេញ-បាត់ដំបង មានរថយន្តក្រុង ១៥ គ្រឿង ចេញដំណើរពីទីតាំង និងផ្លូវជាមួយគ្នា ទៅដល់ចំណតផ្សារប៉ុមប៉ុយ។ ភ្នំពេញ-បន្ទាយមានជ័យ មានរថយន្តក្រុង ១៥ គ្រឿង ចេញដំណើរពីទីតាំង និងផ្លូវដូចគ្នាដែរ ទៅដល់ចំណតរថយន្តថ្មីក្រុងសេរីសោភ័ណ។
ភ្នំពេញ-កំពង់ធំ មានរថយន្តក្រុង ៥ គ្រឿង ចេញដំណើរពីរង្វង់មូលទេពមច្ឆានៅជ្រោយចង្វារ តាមផ្លូវជាតិលេខ ៦ ទៅដល់ភោជនីយដ្ឋានស្ទឹងសែន។ ភ្នំពេញ-សៀមរាប មានរថយន្តក្រុងចំនួន ១៥ គ្រឿង ចេញដំណើរពីរង្វង់មូលទេពមច្ឆានៅជ្រោយចង្វារ តាមផ្លូវជាតិលេខ ៦ ទៅដល់ផ្លូវ ៦០ ម៉ែត្រខេត្តសៀមរាប។
ភ្នំពេញ-កំពង់ចាម មានរថយន្តក្រុង ៥ គ្រឿង ចេញដំណើរពីមុខរាជាយស្ម័យយាន តាមផ្លូវជាតិលេខ ៦,៧ ទៅដល់ចំណតរថយន្តខេត្ត។ ភ្នំពេញ-ត្បូងឃ្មុំ មានរថយន្តក្រុង ៥ គ្រឿង ចេញដំណើរពីទីតាំង និងផ្លូវជាមួយគ្នា ទៅដល់ចំណតផ្សារសួង។ ភ្នំពេញ-ក្រចេះ មានរថយន្តក្រុងចំនួន ៥ គ្រឿង ចេញដំណើរពីមុខរាជាយស្ម័យយាន តាមផ្លូវជាតិលេខ ៦,៨ ទៅដល់រង្វង់មូលព្រាបស និងភ្នំពេញ-ស្ទឹងត្រែង មានរថយន្តក្រុង ៥ គ្រឿង ចេញដំណើរពីទីតាំង និងផ្លូវដូចគ្នាដែរ ទៅដល់ចំណតរថយន្តស្ទឹងត្រែង។
ជាមួយគ្នានេះ រថយន្ត ១១៥ គ្រឿងផ្សេងទៀត រួមទាំងកាណូតដឹកអ្នកដំណើរ ៤ គ្រឿងនឹងត្រូវប្រើប្រាស់សម្រាប់ដឹកពលរដ្ឋនៅរាជធានីភ្នំពេញរយៈពេល ៧ ថ្ងៃដូចគ្នា ដោយមិនគិតថ្លៃ។
រថយន្តក្រុងរាជធានីភ្នំពេញត្រៀមដឹកពលរដ្ឋក្នុងថ្ងៃបុណ្យចូលឆ្នាំ។ភ្នំពេញ ប៉ុសិ៍្ត
ទោះជាយ៉ាងណា លោក ដូស សារ័ត្ន បុគ្គលិកក្រុមហ៊ុនឯកជនមួយក្នុងរាជធានីភ្នំពេញ និងមានស្រុកកំណើតនៅខេត្តកំពង់ស្ពឺបានប្រាប់ថា ក្នុងឱកាសចូលឆ្នាំថ្មីនេះ លោកសម្រេចចិត្តមិនធ្វើដំណើរតាមរថយន្តក្រុងដែលដឹកមិនយកលុយនោះឡើយ ដោយសារជារៀងរាល់ឆ្នាំ លោកតែងមានទម្លាប់ជិះម៉ូតូ។ ម្យ៉ាងទៀត លោកព្រួយបារម្ភ ចំពោះការទុកចោលម៉ូតូក្នុងផ្ទះជួល ដែលលោកមិនបាននៅមើលថែរក្សា។
លោកនិយាយថា៖ «បើសិនជាគ្មានម៉ូតូខ្ញុំនឹងជិះ (ឡានក្រុង) តែជាទូទៅមានម៉ូតូជិះអ៊ីចឹង គឺជិះម៉ូតូហើយ»។
ប៉ុន្តែយុវជនម្នាក់ទៀតឈ្មោះ ម៉ាន បញ្ញា ជានិស្សិតនៅសាកលវិទ្យាល័យភ្នំពេញ និងមានស្រុកកំណើតនៅខេត្តតាកែវ លើកឡើងថា ដោយគិតឃើញពីការកើតមានគ្រោះថ្នាក់ចរាចរណ៍កើតឡើងច្រើននៅក្នុងពិធីបុណ្យទាន ដូច្នោះ លោកបានគិតថា នឹងធ្វើដំណើរទៅលេងស្រុកតាមរយៈរថយន្តក្រុងមិនអស់លុយរបស់សាលារាជធានីភ្នំពេញ។
លោកនិយាយថា៖ «(រថយន្តក្រុង) មានសុវត្ថិភាព អត់ហុយ អត់ក្ដៅ សន្សំសំចៃ ហើយថែមទាំងសប្បាយបានជិះគ្នាច្រើន។ ព្រោះឥឡូវឡានច្រើន ហើយអ្នកបើកបរស្រវឹង និងមិនសូវគោរពច្បាប់ចរាចរណ៍ ហើយបើកបរហួសល្បឿនកំណត់»។
ការដាក់ឱ្យដំណើរការរថយន្តក្រុងដឹកពលរដ្ឋមិនយកកម្រៃក្នុងអំឡុងបុណ្យចូលឆ្នាំនេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃព្រហស្បតិ៍ថា ដោយសារលោកមិនអាចហាមឃាត់កុំឱ្យក្រុមអ្នករត់រថយន្តឈ្នួលដំឡើងថ្លៃបាន នៅក្នុងពិធីបុណ្យទានម្ដងៗ។
លោក ហ៊ុន សែន បញ្ជាក់ថា៖ «ព្រោះខ្ញុំមិនចង់និយាយបញ្ហាច្រំដែលជាមួយម្ចាស់រថយន្ត (ឈ្នួល) ទៀតទេ ដែលកាលមុននេះ គឺប៉ុន្មានឆ្នាំហើយ ដែលខ្ញុំបានអំពាវនាវឱ្យពួកគេកុំដំឡើងថ្លៃ ក្នុងពេលចូលឆ្នាំនិងពេលភ្ជុំ ក៏ប៉ុន្តែមួយចំនួនក៏បានស្ដាប់ តែមួយចំនួនមិនបានស្ដាប់ទេ ដូច្នេះហើយដែលយើងត្រូវបញ្ចេញរថយន្តរបស់យើងតែម្ដង»។
ចំពោះលោក សន ពិសី ជាអ្នករត់តាក់ស៊ីរថយន្តតូចពីភ្នំពេញ-ព្រៃវែង បាននិយាយថា ទោះជាសាលាក្រុងមានរថយន្តក្រុងដឹកពលរដ្ឋទៅស្រុកមិនយកលុយអំឡុងពេលចូលឆ្នាំ ប៉ុន្តែលោកមិនបានព្រួយបារម្ភខ្លាចគ្មានអ្នកជិះរថយន្តរបស់លោកឡើយ ព្រោះលោកថា អ្នកដំណើរនៅតែជ្រើសរើសរថយន្តឈ្នួលដែលអាចដឹកពួកគាត់រហូតទៅដល់ផ្ទះ ប៉ុន្តែរថយន្តក្រុងវិញ ដឹកអ្នកដំណើរដល់ត្រឹមចំណតប៉ុណ្ណោះ។
លោកថា៖ «កាលណាពួកគាត់ (អ្នកដំណើរ) ជិះរថយន្តក្រុងហ្នឹង ហើយគេដឹកដាក់ត្រឹមចំណត អ៊ីចឹងពួកគេត្រូវជិះម៉ូតូឌុប ឬរ៉ឺម៉កបន្ថែមដើម្បីទៅផ្ទះ អ៊ីចឹងអស់លុយដដែល និងចំណាយពេលយូរទៀត។ ប៉ុន្តែបើពួកគេជិះឡានឈ្នួលវិញ វាលឿនជាង ដោយពួកយើងដឹកពួកគាត់រហូតដល់ផ្ទះ»។
ជាមួយគ្នានេះ លោក ហង្ស កុសល អ្នករត់តាក់ស៊ីប្រភេទរថយន្តកៅអី ១២ អស់រយៈពេល ១១ ឆ្នាំម្នាក់ បានលើកឡើងដូចគ្នាទៅនឹងការលើកឡើងរបស់លោក ពិសី ដែរ ចំពោះមូលហេតុដែលអ្នកដំណើរនៅតែជ្រើសរើសរថយន្តឈ្នួល។ លើសពីនេះ លោកបន្ថែមថា អ្នករត់រថយន្តឈ្នួលទាំងអស់ នឹងដំឡើងថ្លៃដឹកនៅអំឡុងបុណ្យចូលឆ្នាំខាងមុខនេះ។
លោកបន្តថា៖ «នៅប៉ុន្មានថ្ងៃទៀតក្នុងឱកាសបុណ្យចូលឆ្នាំ នឹងដំឡើងថ្លៃពី ១ ម៉ឺនរៀល ទៅដល់ ១ ម៉ឺន ៥ ពាន់រៀល ដោយសារនៅពេលបុណ្យចូលឆ្នាំ មានតែអ្នកដំណើរចេញពីភ្នំពេញ ប៉ុន្តែនៅពេលចេញពីខេត្តព្រៃវែងមកវិញ គឺគ្មានអ្នកដំណើរឡើយ ដូច្នោះពួកខ្ញុំត្រូវដំឡើងថ្លៃ»។
កាលពីថ្ងៃទី ៣ ខែ មេសានេះ លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានចេញសេចក្ដីណែនាំ ដើម្បីទប់ស្កាត់គ្រោះថ្នាក់ចរាចរណ៍នៅក្នុងឱកាសបុណ្យចូលឆ្នាំខាងមុខនេះ ដោយលោកបានអំពាវនាវទៅកាន់ពលរដ្ឋចំនួន ១១ ចំណុច ដូចជា ត្រូវពិនិត្យលក្ខណៈបច្ចេកទេសយានយន្តជានិច្ចមុនបើកបរ មិនត្រូវផ្ទុកអ្នកដំណើរ ឬទំនិញលើសច្បាប់កំណត់ ត្រូវពាក់មួកសុវត្ថិភាពជានិច្ចត្រូវពាក់ខ្សែក្រវាត់សុវត្ថិភាពជានិច្ច ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្ដាំជានិច្ច មិនត្រូវបើកបរក្រោមឥទ្ធិពលគ្រឿងស្រវឹង មិនត្រូវបត់ ឬវ៉ាជែងក្នុងភាពប្រថុយប្រថាន ឬធ្វេសប្រហែស មិនត្រូវបើកបរក្នុងស្ថានភាពងងុយដេកដាច់ខាត ត្រូវបើកបរក្នុងស្មារតីប្រុងប្រយ័ត្នជានិច្ច និងប្រកបដោយសីលធម៌យោគយល់អធ្យាស្រ័យ និងហាមការបាចទឹកលើអ្នកដំណើរតាមដងផ្លូវ៕
