.jpg)
សពជនរងគ្រោះដែលជាអ្នកអ្នកពុះដីឡូត៍អ្នកពុះដីឡូត៍ នៅក្រុងសិរីសោភ័ណ ខេត្តបន្ទាយមានជ័យ។ រូបថត FB
បន្ទាយមានជ័យៈ មន្ត្រីនគរបាលមូលដ្ឋានបានឲ្យដឹងពីថ្ងៃទី ៧ កក្កដា ថា បុរស ២ នាក់ត្រូវបានរន្ទះបាញ់ស្លាប់ពីល្ងាចថ្ងៃចន្ទ ខណៈពួកគេកំពុងចុះមើលក្រុមការងាររៀបចំពុះដីឡូត៍ធ្វើផ្ទះល្វែងនៅភូមិថ្មី សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដែលករណីនេះធ្វើឲ្យចំនួនអ្នកស្លាប់ដោយរន្ទះបាញ់កើនដល់ ៣១ នាក់ គិតពីដើមឆ្នាំមក។
លោក ផាត់ វណ្ណី នាយនគរបាលប៉ុស្តិ៍ស្ដីទីសង្កាត់ទឹកថ្លាបានប្រាប់ភ្នំពេញប៉ុស្តិ៍ថា ជនរងគ្រោះឈ្មោះ សៀក ជីឆូវ អាយុ ៣៤ ឆ្នាំ មានលំនៅក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យត្រូវបានរន្ទះបាញ់ស្លាប់ភ្លាមៗនៅកន្លែងកើតហេតុ ខណៈដៃគូរកស៊ីពុះដីឡូត៍សង់ផ្ទះល្វែងរបស់គាត់ម្នាក់ទៀតឈ្មោះ យ៉ាង លី អាយុ ៣៣ ឆ្នាំ មានលំនៅក្នុងភូមិ ៤ សង្កាត់ព្រះពន្លា ក្រុងសិរីសោភ័ណបានស្លាប់តាមផ្លូវពេលក្រុមការងារ និងសាច់ញាតិកំពុងដឹកទៅមន្ទីរពេទ្យក្រុងសិរីសោភ័ណ។
លោក វណ្ណី បានបន្តថា មុនពេលកើតហេតុផ្ទៃមេឃមានសភាពអួអាប់ និងមានធ្លាក់ខ្យល់ ប៉ុន្តែមិនខ្លាំងនោះទេ។ បន្ទាប់មកគេឃើញជនរងគ្រោះទាំង ២ នាក់ និងក្រុមការងារ ៣ នាក់ផ្សេងទៀតបាននាំគ្នាចុះទៅពិនិត្យ និងវាស់វែងទីតាំងដីឡូត៍ដើម្បីពុះជាឡូត៍តូចៗសម្រាប់សាងសង់ផ្ទះល្វែងលក់។
លោក វណ្ណី បានបញ្ជាក់ថា៖ «ពេលកំពុងទាញខ្សែចាក់វាស់វែងនោះក៏ស្រាប់តែមានផ្លេកបន្ទោរព្រាកៗ និងមានភ្លៀងរលឹម លាយឡំនឹងរន្ទះបាញ់ព្រមគ្នាតែម្ដងបណ្ដាលឲ្យឈ្មោះ សៀក ជីឆូវ ស្លាប់នៅនឹងកន្លែង ហើយឈ្មោះ យ៉ាង លី បានដួលសន្លប់ និងបានស្លាប់នៅពាក់កណ្ដាលផ្លូវក្នុងគ្រាដែលក្រុមគ្រួសារ និងកម្មករបានដឹកទៅមន្ទីរពេទ្យក្រុងសិរីសោភ័ណ»។
លោកបានបន្តថា សពជនរងគ្រោះទាំង ២ ត្រូវបានក្រុមគ្រួសារនាំយកទៅរៀបចំពិធីបុណ្យនៅគេហដ្ឋានរៀងៗខ្លួន។
ដោយឡែកនៅឯឃុំឃ្លាំងមាស ស្រុកបវេល ខេត្តបាត់ដំបងវិញមានផ្ទះពលរដ្ឋជាង ២០ ខ្នងបានរងការខូចខាតស្ទើរទាំងស្រុងដោយសារករណីភ្លៀងលាយឡំខ្យល់កន្ត្រាក់កាលពីរសៀលថ្ងៃចន្ទ។ នេះបើតាមមន្ត្រីនគរបាលមូលដ្ឋានកាលពីថ្ងៃទី ៧ ខែកក្កដា។
លោក សុខ សារិន អធិការនគរបាលស្រុកបវេលបានថ្លែងថា៖ «បាតុភូតភ្លៀងលាយឡំខ្យល់កន្ត្រាក់ និងរន្ទះបាញ់កាលពីរសៀលថ្ងៃចន្ទបានបង្កការខូចខាតផ្ទះពលរដ្ឋសរុប ២៥ ខ្នង និងងាប់គោអស់ ២ ក្បាល ប៉ុន្តែបានជួយសង្គ្រោះស្រូវពលរដ្ឋជិត ១០០ ហិកតា ដែលរងផលប៉ះពាល់ពីគ្រោះរាំងស្ងួតនាពេលកន្លងមកឲ្យស្រស់បំព្រងឡើងវិញ»។
លោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្តិ៍កាលពីថ្ងៃអង្គារថា ការស្លាប់របស់អ្នករកស៊ីពុះដីឡូត៍សាងសង់ផ្ទះល្វែង ២ នាក់ក្នុងក្រុងសិរីសោភ័ណខាងលើនេះបានធ្វើឲ្យចំនួនជនរងគ្រោះដែលស្លាប់ដោយរន្ទះបាញ់កើនដល់ ៣១ នាក់ និង ២១ នាក់ទៀតរងរបួសគិតត្រឹមថ្ងៃទី ៧ ខែកក្កដា នៅឆ្នាំនេះ។
លោក កែវ វី បានថ្លែងថា គិតត្រឹម ៦ ខែ ឆ្នាំ ២០២០ បាតុភូតរន្ទះបាញ់បានបណ្ដាលឲ្យមនុស្ស ២៩ នាក់ស្លាប់ និង ២១ នាក់ទៀតរងរបួស ស្លាប់គោ ក្របី ៤៥ ក្បាល និងខូចខាតផ្ទះ ៩ ខ្នង។ ចំណែកបាតុភូតខ្យល់កន្ត្រាក់បានបង្កឲ្យមនុស្ស ៤ នាក់ស្លាប់ និង ៤៣ នាក់ទៀតរងរបួស និងខូចខាតផ្ទះពលរដ្ឋទាំងស្រុងចំនួន ៧១១ ខ្នង និង ៤ ៥០៥ ខ្នងទៀតខូចខាតមធ្យម។ ក្រៅពីនោះក៏បានធ្វើឲ្យខូចខាតដំបូលសាលារៀន និងអគាររដ្ឋបាលសាធារណៈរបស់រដ្ឋសរុប ៤៨ ខ្នងផងដែរ។
លោកបានបញ្ជាក់ថា៖ «ប៉ុន្តែតួលេខនេះបានថយចុះគួរឲ្យកត់សម្គាល់បើធៀបនឹងរយៈពេលដូចគ្នាកាលពីឆ្នាំមុន»។
យោងតាមរបាយការណ៍បូកសរុបរយៈពេល ៦ ខែ ឆ្នាំ ២០១៩ របស់គណៈកម្មាធិការជាតិគ្រប់គ្រងគ្រោះមហន្តរាយ គ្រោះធម្មជាតិរន្ទះបាញ់បានបង្កឲ្យមនុស្ស ៦២ នាក់ស្លាប់ និង ៦០ នាក់ទៀតរងរបួសព្រមទាំងងាប់គោ ក្របីចំនួន ៨០ ក្បាល។ ចំណែកខ្យល់កន្ត្រាក់បានបង្កឲ្យមនុស្ស ៤ នាក់ស្លាប់ និង ៧៧ នាក់ទៀតរងរបួស ព្រមទាំងបង្កឲ្យផ្ទះពលរដ្ឋចំនួន ១ ១៩៣ ខ្នង ដួលរលំ និងផ្ទះចំនួន ៩ ៨១៩ ខ្នងទៀតរួមទាំងអគាររដ្ឋបាលសាធារណៈសរុប ៦២ ខ្នងផងបានប៉ើងរបើកដំបូល៕
