កណ្ដាល: សាលាដំបូងខេត្តកណ្ដាលនៅថ្ងៃទី ១៤ វិច្ឆិកានេះនឹងបើកសវនាការសួរដេញដោលឪពុកក្មេងស្រីម្នាក់ដែលអះអាងថា ត្រូវព្រះសង្ឃ លន់សុវណ្ណដា គ្រូសូត្រស្ដាំ នៅវត្តស្វាយជ្រំ ភូមិស្វាយជ្រំ ឃុំស្វាយជ្រំ ស្រុកខ្សាច់កណ្ដាល ចាប់រំលោភជាច្រើនលើកដោយអវត្តមានសង្ឃសង្ស័យ។
សាច់ញាតិព្រះសង្ឃ លន់ សុវណ្ណដា បានដាក់ពាក្យប្ដឹងឈ្មោះ ស៊ុន សូតសុផល ហៅ ស៊ុន ប៊ុច ភេទប្រុសអាយុ ៤៧ ឆ្នាំមានទីលំនៅនៅឃុំស្វាយជ្រំ ស្រុកខ្សាច់កណ្ដាល ត្រូវជាឪពុកក្មេងស្រីម្នាក់ជាប់ចោទពីបទ «ប្រមាថចំពោះព្រះសង្ឃ ដូនជី និងតាជី» ប្រព្រឹត្តនៅភូមិស្វាយជ្រំ ឃុំស្វាយជ្រំ កាលពីថ្ងៃទី ២២ ខែមេសា ឆ្នាំ ២០១៨ តាមបញ្ញត្តិមាត្រា ៥១៦ នៃក្រមព្រហ្មទណ្ឌ។
ការប្ដឹងនេះធ្វើឡើងបន្ទាប់ពីឪពុកក្មេងស្រីម្នាក់ឈ្មោះ ស.ច ឆ.វ អាយុ ១៩ ឆ្នាំ កាលពីថ្ងៃទី ២២ ខែមេសាបានទៅស្រែកទាមទាររកយុត្តិធម៌ជូនកូនស្រីរបស់ខ្លួនដោយចោទប្រកាន់ព្រះសង្ឃមួយអង្គមានតួនាទីជាព្រះគ្រូសូត្រស្តាំ និងជាសមណនិស្សិតនៃសាលាភូមិន្ទរដ្ឋបាល និងត្រូវជាក្មួយបង្កើតរបស់ព្រះគ្រូចៅអធិការវត្តស្វាយជ្រំ និងជាអនុគណស្រុកខ្សាច់កណ្តាលដោយចោទថាបានចាប់រំលោភសេពសន្ថវៈនាងអស់រយៈពេល ៥ ឆ្នាំរហូតមានកូនជាច្រើនលើក និងត្រូវរំលូតចោលហើយនារីពី ៤ ទៅ ៥ នាក់ផ្សេងទៀតក៏ត្រូវសង្ឃអង្គនេះចាប់រំលោភដែរ។
តាមដីកាកោះហៅជនជាប់ចោទឲ្យចូលរួមសវនាការរបស់លោក ឈួន សុភា តំណាងអយ្យការអមសាលាដំបូងខេត្តកណ្ដាលចុះថ្ងៃទី ៣ តុលា បានបញ្ជាក់ថា៖ «បង្គាប់មកឈ្មោះ ស៊ុន សូតសុផល (ហៅ) ស៊ុន ប៊ុច ភេទប្រុស អាយុ ៤៧ ឆ្នាំមានទីលំនៅឃុំស្វាយជ្រំដើម្បីចូលទៅកាន់ទីកន្លែងសាលសវនាការនៃសាលាដំបូងខេត្តកណ្ដាលនៅថ្ងៃទី ១៤ ខែវិច្ឆិកា ឆ្នាំ ២០១៨ នៅវេលាម៉ោង ០៩: ០០ នាទីព្រឹកនៅសាលសវនាការលេខ ២ ជាកំហិតដើម្បីធ្វើការជំនុំជម្រះ»។
ទាក់ទិននឹងការកោះហៅទៅចូលរួមសវនាការនេះលោក ស៊ុន សូតសុផល ហៅ ស៊ុន ប៊ុច ជាឪពុកនារីរងគ្រោះបានថ្លែងថាលោកគ្រាន់តែស្រែកតវ៉ា ដើម្បីទាមទាររកយុត្តិធម៌ឲ្យកូនស្រីដែលព្រះសង្ឃអង្គនេះបានរំលោភតែប៉ុណ្ណោះ ប៉ុន្ដែបែរជាក្លាយទៅជាជនជាប់ចោទបែបនេះទៅវិញ។
លោកបញ្ជាក់ថា៖ «ខ្ញុំហួសចិត្តខ្លាំងណាស់! ចំពោះនីតិវិធីតុលាការខេត្តកណ្ដាលក្នុងនាមខ្ញុំជាឪពុកម្នាក់ ហើយកូនស្រីត្រូវបានព្រះសង្ឃចាប់រំលោភនាងនៅក្នុងកុដិតាំងពីនៅក្មេងរួចលួងលោមបោកបញ្ឆោតនាងរួមភេទក្នុងន័យស្នេហាជាហូរហែរហូតមកបែកធ្លាយរឿងទាំងដែល លន់ សុវណ្ណដា ជាព្រះសង្ឃបែរជាគ្មានចំណាត់ការអ្វីទាំងអស់សម្រាប់ខ្ញុំគ្រាន់តែស្រែករកយុត្តិធម៌បែរជាជាប់ចោទទៅវិញ»។
មុនពេលតុលាការកោះហៅនេះឪពុកក្មេងស្រីរងគ្រោះរូបនេះកាលពីថ្ងៃទី ៥ ខែមិថុនា ឆ្នាំ ២០១៨ បានដាក់ពាក្យប្ដឹងព្រះសង្ឃ លន់ សុវណ្ណដា ដោយចោទពីបទ «រំលោភ និងរួមភេទជាមួយអនីតិជនវ័យក្រោម ១៥ ឆ្នាំព្រោះការប្រព្រឹត្តតាំងពីនាងនៅអាយុ ១៣ ឆ្នាំ» ដោយទាមទារសំណង ២០ ម៉ឺនដុល្លារ។ ក្រោយពីដាក់ពាក្យបណ្ដឹងតុលាការបានកោះហៅព្រះសង្ឃ លន់ សុវណ្ណដា ចំនួន ២ លើកហើយ ប៉ុន្តែសង្ឃអង្គនេះមិនចូលខ្លួនបំភ្លឺដោយកំពុងរត់ភៀសខ្លួន។
លោក ប៊ុន យ៉ុង អធិការរងស្រុកខ្សាច់កណ្ដាលបានថ្លែងថា ឪពុកក្មេងស្រីរងគ្រោះបានដាក់ពាក្យបណ្ដឹងទៅកាន់ស្នងការដ្ឋាននគរបាលខេត្ត និងតុលាការផងដែរ។ ក្រោយពីទទួលបណ្ដឹងនេះសមត្ថកិច្ចបានចុះស្រាវជ្រាវ ហើយលទ្ធផលត្រូវបានប្រគល់ជូនស្នងការដ្ឋាននគរបាលខេត្តជាអ្នកចាត់ចែង។
លោកបញ្ជាក់ថា៖ «ខ្ញុំអត់អាចប្រាប់ពីលទ្ធផលជាក់ស្ដែងបានទេព្រោះខ្ញុំបានបញ្ជូនទៅស្នងការខេត្ត ហើយខាងខេត្តក៏បានបញ្ជូនទៅតុលាការដែរ ហើយតុលាការគេចាត់ចែងហើយ អ៊ីចឹងវាហួសពីដែនសមត្ថកិច្ចខ្ញុំ ហើយព្រះសង្ឃហ្នឹងមិនឃើញគង់នៅវត្តហ្នឹងទៀតទេ»។
តាមមាត្រា ៥១៦ បទប្រមាថចំពោះព្រះសង្ឃ ដូនជី និងតាជី «ការប្រមាថដូចបញ្ញតិ្តក្នុងកថាខណ្ឌទី ១ នៃមាត្រា ៥០២ (បទប្រមាថ) នៃក្រមនេះដែលប្រព្រឹត្តឡើងចំពោះព្រះសង្ឃ ដូនជី ឬតាជីនៅក្នុងក្របខ័ណ្ឌនៃមុខងារ ឬក្នុងឱកាសនៃការបំពេញមុខងារត្រូវផ្ដន្ទាទោសដាក់ពន្ធនាគារពី ១ ថ្ងៃទៅ ៦ ថ្ងៃ និងពិន័យជាប្រាក់ពី ១០០០ រៀលទៅ ១ សែនរៀល៕