ភ្នំពេញៈ ឯកអគ្គរដ្ឋទូតអូស្ត្រាលីប្រចាំកម្ពុជាបង្ហាញក្ដីបារម្ភអំពីហិង្សាលើស្ត្រី ការចាប់ខ្លួនសកម្មជននយោបាយ និងការតវ៉ានៅមុខសាលាដំបូងរាជធានីភ្នំពេញ ខណៈមន្ត្រីជាន់ខ្ពស់ទូតរូបនេះជួបជាមួយអគ្គស្នងការនគរបាលជាតិ លោក នេត សាវឿន។ អូស្ត្រាលី នឹងបើកវគ្គបណ្ដុះបណ្ដាលដល់ប៉ូលិសកម្ពុជាពាក់ព័ន្ធនឹងការការពារកុមារ ការលាងសម្អាតប្រាក់ និងឧក្រិដ្ឋកម្មឆ្លងដែន។
លោក Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា លើកឡើងនូវក្ដីបារម្ភមួយចំនួនប្រាប់ទៅលោក នេត សាវឿន ក្នុងជំនួបពិភាក្សាការងារកាលពីថ្ងៃពុធនៅអគ្គស្នងការដ្ឋាននគរបាលជាតិ។ លោកថ្លែងថា ក្នុងស្ថានភាពជំងឺកូវីដ១៩នេះ លោកសង្កេតឃើញមានអំពើហិង្សាកើតឡើងច្រើន ជាពិសេសពាក់ព័ន្ធនឹងស្ត្រីភេទ។ លោកប្រាប់លោក នេត សាវឿន ថាវត្តមានរបស់លោកនៅកម្ពុជាក៏ដើម្បីជួយធ្វើយ៉ាងណាឲ្យកម្ពុជាសម្រេចបានសមភាពយ៉េនឌ័រ។ នេះបើតាមការផ្សាយរបស់អគ្គស្នងការដ្ឋាននគរបាលជាតិ។
អ្នកនាំពាក្យស្ថានទូតអូស្ត្រាលីប្រាប់ភ្នំពេញប៉ុស្តិ៍តាមអ៊ីមែលពីម្សិលមិញថា បញ្ហាអាទិភាពនៃជំនួយអភិវឌ្ឍន៍របស់អូស្ត្រាលីសម្រាប់កម្ពុជា គឺដើម្បីជួយទប់ស្កាត់ និងកាត់បន្ថយអំពើហិង្សាលើស្ត្រីដែលបញ្ហានេះជាបញ្ហាសំខាន់សម្រាប់អូស្ត្រាលីក៏ដូចជាសម្រាប់កម្ពុជា។ លោក Pablo Kang អរគុណលោក នេត សាវឿន សម្រាប់កិច្ចសហប្រតិបត្តិការល្អរវាងស្ថានទូតអូស្ត្រាលី អង្គការសហប្រជាជាតិផ្នែកស្ត្រី និងសមត្ថកិច្ចខេត្តព្រះសីហនុដែលរៀបចំវគ្គបណ្ដុះបណ្ដាលសម្រាប់ប្រឹក្សាអំពើហិង្សា។
អ្នកនាំពាក្យស្ថានទូតបន្តថា៖ «លោកឯកអគ្គរដ្ឋទូតលើកពីបញ្ហាតវ៉ា ជាបន្តបន្ទាប់នៅមុខសាលាដំបូងរាជធានីភ្នំពេញធ្វើឡើងដោយភរិយា និងកូនស្រីអ្នកដែលត្រូវបានចាប់ខ្លួននៅឆ្នាំនេះ។ ស្ត្រីខ្លះមានទំនាក់ទំនងជាមួយក្រុមគណបក្សនយោបាយប្រឆាំងខ្លះ។ ជាពិសេសលោកឯកអគ្គរដ្ឋទូតបានឃើញវីដេអូនៅលើយូធូបអំពីការប្រព្រឹត្តលើស្ត្រីទាំងនោះពីសំណាក់ប៉ូលិស និងសន្តិសុខ។ លោកលើកបញ្ហានេះក្នុងនាមស្ត្រីទាំងនេះ។ លោកឯកអគ្គរដ្ឋទូតតែងពិភាក្សាពីបញ្ហាសិទ្ធិមនុស្សជាមួយតំណាងរដ្ឋាភិបាលក្នុងប៉ុន្មានខែចុងក្រោយនេះ»។
ប៉ុន្តែលោក នេត សាវឿន ថ្លែងថាការឃាត់ខ្លួនមិនមែនធ្វើឡើងលើគណបក្សនយោបាយប្រឆាំងនោះទេគឺឃាត់ខ្លួនបុគ្គដែលធ្វើខុសច្បាប់ ហើយការអនុវត្តច្បាប់មិនលម្អៀងទៅគណបក្សនយោបាយណាមួយឡើយ។
លោកថាចំពោះការតវ៉ានៅមុខតុលាការ បើសមត្ថកិច្ចមិនទប់ស្កាត់វានឹងនាំឲ្យមានបញ្ហាធំដុំអាចយកការទាមទារដោះលែងនោះទៅជាចលនាប្រឆាំងមួយ។ ជាពិសេសខុសនឹងវិធានការរបស់ក្រសួងសុខាភិបាលក្នុងការបង្ការទប់ស្កាត់ជំងឺកូវីដ១៩ ដែលហាមការជួបជុំគ្នា។ ការប្រមូលផ្តុំ ឬការធ្វើបាតុកម្មត្រូវមានច្បាប់អនុញ្ញាតពីអាជ្ញាធរមានសមត្ថកិច្ច។ នេះបើតាមអគ្គស្នងការនគរបាលជាតិ។
លោក នេត សាវឿន បន្តថាការដោះលែងណាមួយត្រូវជ្រើសរើសរកមេធាវីស្របច្បាប់ ដើម្បីយកទៅការពារនៅចំពោះមុខតុលាការ។ ពួកគេមិនត្រូវនាំគ្នាធ្វើការតវ៉ាដើម្បីដាក់សម្ពាធទៅតុលាការនោះទេ។ រាជរដ្ឋាភិបាល ក្រសួង មហាផ្ទៃ និងអគ្គស្នងការដ្ឋាននគរបាលជាតិតែងតែលើកទឹកចិត្តការពារកុំឲ្យមានអំពើហិង្សាណាមួយកើតឡើង។ លោកថា សមត្ថកិច្ចតែងតែត្រូវបានអប់រំឲ្យចៀសវាងការប៉ះទង្គិចណាមួយ។
ជំនួបពីថ្ងៃពុធក៏មានវត្តមានលោក Anthony Maguire តំណាងនគរបាលសហព័ន្ធអូស្ត្រាលី ថ្មីប្រចាំកម្ពុជាផងដែរ។ លោកថ្លែងថា នគរបាលសហព័ន្ធអូស្ត្រាលីបានទទួលកញ្ចប់ថវិកាប្រមាណ ៣ សែនដុល្លារអូស្ត្រាលី [ជាង ២១ ម៉ឺនដុល្លារ] ដើម្បីរៀបចំបើកវគ្គបណ្តុះបណ្តាលដល់នគរបាលជាតិកម្ពុជា ពាក់ព័ន្ធទៅនឹងការការពារកុមារ ការលាងសម្អាតប្រាក់ និងបទឧក្រិដ្ឋឆ្លងដែន។
អគ្គស្នងការដ្ឋានបន្តថា ទោះបីជាមានបញ្ហាខ្លះដោយសារជំងឺកូវីដ១៩ក៏ដោយនៅពេលដ៏ខ្លីខាងមុខ លោកមានការប្តេជ្ញាខ្ពស់ក្នុងការរៀបចំបើកវគ្គបណ្តុះបណ្តាល ដើម្បីបង្ហាញពីកិច្ចសហការល្អរវាងអូស្ត្រាលី និងកម្ពុជា៕