.jpg)
ឱសថខុសច្បាប់ និងសាប៊ូក្លែងក្លាយដែលសមត្ថកិច្ចរឹបអូសបាននាពេលកន្លងមក។ រូបថត CCC
ភ្នំពេញៈ នៅក្នុងរយៈពេល ៩ ខែក្នុងឆ្នាំ ២០២០ គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) បានបង្ក្រាបឱសថខុសច្បាប់ ផលិតផលវេជ្ជសាស្ត្រ និងផលិតផលក្លែងក្លាយខុសច្បាប់បានជិត ៦០០ តោន។
លោក តាន់ សុខវិជ្ជា ប្រធានលេខាធិការដ្ឋាននៃ គ.ប.ផ.ក បានថ្លែងពីថ្ងៃអង្គារក្នុងកិច្ចប្រជុំស្តីពី «យន្តការអនុវត្តន៍ការប្រយុទ្ធប្រឆាំងផលិតផលក្លែងក្លាយ និងទិសដៅអនុវត្តន៍បន្ត» នាទីស្តីការក្រសួងមហាផ្ទៃថា ចាប់ពីខែមករាដល់ខែកញ្ញា ឆ្នាំ ២០២០ នេះ គ.ប.ផ.ក បានចុះបង្ក្រាបឱសថខុសច្បាប់ ផលិតផលវេជ្ជសាស្ត្រ និងផលិតផលក្លែងក្លាយខុសច្បាប់ទូទៅសរុបបានចំនួន ១៣៤ ករណី ស្មើនឹង ៥៩៤,៦៥ តោន។
ក្នុងចំណោមការបង្ក្រាបនោះរួមមានឱសថ ១៩ ករណីផលិតផលវេជ្ជសាស្ត្រប្រឆាំងនឹងមេរោគកូវីដ១២ករណី ផលិតផលឧបភោគបរិភោគ ៣៥ ករណី ផលិតផលគ្រឿងសម្អាង ២៩ ករណី ផលិតផលប្រើប្រាស់ ២០ ករណី និងផលិតផលថ្នាំជក់ ១៩ ករណី។
បើតាមលោក តាន់ សុខវិជ្ជា ករណីបង្ក្រាបទាំងនេះធ្វើឡើងនៅរាជធានីភ្នំពេញ ១១១ ករណីនៅខេត្តកណ្តាល ១១ ករណី កំពង់ស្ពឺ ២ ករណី តាកែវ ១ ករណី ព្រះសីហនុ ២ ករណី បាត់ដំបង ១ ករណី កំពង់ចាម ១ ករណី ត្បូងឃ្មុំ ៤ ករណី និងខេត្តស្វាយរៀង ១ ករណី។
បើតាមលោក សុខវិជ្ជា ក្នុងករណីទាំងនោះមានអាជីវកម្ម ៩ ត្រូវរកឃើញថា បានអនុលោមតាមច្បាប់ ១០៥ ករណីកិច្ចសន្យាអប់រំ និង ១ ករណី ផាកពិន័យតាមវិធានក្រសួងពាក់ព័ន្ធ។ បញ្ជូនសំណុំរឿងទៅតុលាការ ១៣ ករណីដោយឃាត់ខ្លួនមនុស្ស ២០ នាក់ ហើយក្នុងនោះកំពុងបន្តនីតិវិធី ១១ ករណី (មនុស្ស ១៨ នាក់) និងតុលាការសម្រេច ២ ករណីដែលមានមនុស្ស ២ នាក់ដាក់ពន្ធនាគារ។
លោក មៀច សុផាន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានថ្លែងថា គ.ប.ផ.ក គឺធ្វើការបង្ក្រាបឱសថខុសច្បាប់ ផលិតផលវេជ្ជសាស្ត្រ និងផលិតផលក្លែងក្លាយខុសច្បាប់គឺដើម្បីធានា និងការពារសុខុមាលភាពប្រជាពលរដ្ឋជាចម្បងដោយជំរុញការងារផ្សព្វផ្សាយអប់រំបង្ការ និងទប់ស្កាត់ការអនុវត្តកិច្ចប្រតិបត្តិការបង្ក្រាប និងកិច្ចសហប្រតិបត្តិការ សម្របសម្រួលជាមួយបណ្តាអន្តរក្រសួងស្ថាប័នពាក់ព័ន្ធនានា ដើម្បីរួមគ្នាប្រយុទ្ធប្រឆាំងផលិតផលក្លែងក្លាយដែលករណីនេះមិនមែនជាសមត្ថកិច្ចផ្តាច់មុខរបស់ក្រសួង ឬស្ថាប័នណាមួយតែឯងនោះទ្បើយ។
លោកបានបន្តថា៖ «ទោះបីជាបច្ចុប្បន្ននេះការងារប្រយុទ្ធប្រឆាំងបទល្មើសផលិតផលក្លែងក្លាយទទួលបានជោគជ័យយ៉ាងណាក៏ដោយ ក៏បទល្មើសនេះកំពុងរីករាលដាលពី ១ ថ្ងៃទៅ ១ ថ្ងៃ និងកើតឡើងស្ទើរតែគ្រប់ទីកន្លែង ហើយត្រូវបានសកលលោកចាត់ទុកជាបទល្មើសឧក្រិដ្ឋឆ្លងដែនដែលមានលក្ខណៈជាអង្គការចាត់តាំង»។
លោក សុផាន់ណា បានដឹកនាំអង្គប្រជុំពិភាក្សា ដើម្បីប្រមូលធាតុចូលផ្សេងៗ ដែលតំណាងអន្តរក្រសួងស្ថាប័ននានា និងមន្ត្រីជំនាញចូលរួមជាមតិយោបល់ ដើម្បីបញ្ចូលក្នុងយន្តការអនុវត្ត ទិសដៅបន្ត និងបញ្ចូលក្នុងការងារផែនការសកម្មភាព ៥ ឆ្នាំ គឺពីឆ្នាំ ២០២០ ដល់ឆ្នាំ ២០២៥ របស់ គ.ប.ផ.ក។
ប្រធានសហព័ន្ធវិនិយោគកម្ពុជា និងជាប្រធានសហព័ន្ធពាណិជ្ជកម្មតាមប្រព័ន្ធអេឡិចត្រូនិកកម្ពុជាលោក ឡី សុភាព ប្រាប់ភ្នំពេញប៉ុស្តិ៍ម្សិលមិញថា ការពង្រឹងនូវការបង្ក្រាបករណីផលិតផលក្លែងក្លាយនេះជាសកម្មភាពមួយដ៏ល្អសម្រាប់ឱ្យជនខិលខូចរាងចាល និងឈប់ប្រព្រឹត្តអំពើខុសច្បាប់បែបនេះបន្តទៀត។
លោកបញ្ជាក់ថា៖ «យើងគួរតែចូលរួមទាំងអស់គ្នាក្នុងការលុបបំបាត់នូវផលិតផលក្លែងក្លាយ ហើយខ្ញុំសូមអំពាវនាវទៅដល់មនុស្សគ្រប់គ្នាត្រូវភ្ញាក់រឭក និងត្រូវស្រឡាញ់ជីវិតខ្លួនឯង។ គ្រប់ភាគីដែលពាក់ព័ន្ធ ពិសេសប្រជាពលរដ្ឋដែលជាអ្នកប្រើប្រាស់ផ្ទាល់ត្រូវតែចូលរួមទាំងអស់គ្នា»៕
វីដេអូ៖
